ശമ്പളക്കുടിശിക; ഡോക്ടര്‍മാര്‍ സമരത്തിന്

ആലപ്പുഴ: മെഡിക്കല്‍ കോളജ് ഡോക്ടര്‍മാരുടെ 2016 മുതലുള്ള ശമ്പള കുടിശിക നല്കാത്തതില്‍ പ്രതിഷേധിച്ച് വിവിധ സമരപരിപാടികള്‍ നടത്താന്‍ കെജിഎംസിടിഎ സംസ്ഥാനസമിതി തീരുമാനിച്ചു. മറ്റു സര്‍ക്കാര്‍ ജീവനക്കാരുടെ ശമ്പളപരിഷ്‌കരണവും ശമ്പളക്കുടിശികയും സര്‍ക്കാര്‍ കഴിഞ്ഞ ദിവസം പ്രഖ്യാപിച്ചിരുന്നു.

എന്നാല്‍ സര്‍ക്കാര്‍ മെഡിക്കല്‍ കോളജ് ഡോക്ടര്‍മാര്‍ക്കെതിരെയുള്ള കടുത്ത അവഗണന സര്‍ക്കാര്‍ തുടരുകയാണ്. ഇതുവരെ അലവന്‍സ് പരിഷ്‌കരണത്തോടു കൂടെയുള്ള ശമ്പളകുടിശിക എന്നു നല്‍കുമെന്നുപോലും പറഞ്ഞിട്ടില്ല. ഇത്തരത്തില്‍ അവഗണിച്ചതിനെതിരേ 25ന് എല്ലാ മെഡിക്കല്‍ കോളജുകള്‍ക്ക് മുന്‍പിലും ഡിഎംഇ ഓഫീസിന്റെ മുന്‍പിലും രാവിലെ 11ന് പ്രതിഷേധധര്‍ണ നടത്തും.

രോഗീപരിചരണവും അധ്യാപനവും ബാധിക്കില്ല. 29ന് രാവിലെ എട്ടുമുതല്‍ 11 വരെ മൂന്നുമണിക്കൂര്‍ സൂചനാ പണിമുടക്ക് എല്ലാ മെഡിക്കല്‍ കോളജുകളിലും നടത്തും. സൂചനാ പണിമുടക്ക് സമയത്തില്‍ ഓപികളും ഇലെക്റ്റിവ് ശസ്ത്രക്രിയകളും അധ്യാപനവും നടത്തില്ല. എന്നാല്‍ കോവിഡ് ചികിത്സ, അടിയന്തര സേവനങ്ങള്‍, അടിയന്തര ശസ്ത്രക്രിയകള്‍, ഐ.സി യൂ, ലേബര്‍റൂം, അത്യാഹിതവിഭാഗം, വാര്‍ഡ് സേവനങ്ങള്‍, എന്നിവയെ പണിമുടക്കില്‍ നിന്നും ഒഴിവാക്കിയിട്ടുണ്ട്.

29 മുതല്‍, മെഡിക്കല്‍ കോളജ് ഡോക്ടര്‍മാര്‍ എല്ലാ നോണ്‍ കോവിഡ് മീറ്റിങ്ങുകള്‍, ബോര്‍ഡ് മീറ്റിങ്ങുകള്‍, അക്കാഡമിക് ഡ്യൂട്ടികള്‍, വി.ഐ.പി ഡ്യൂട്ടികള്‍, പേ വാര്‍ഡ് അഡ്മിഷന്‍ എന്നിവ ബഹിഷ്‌കരിക്കും.

ഫെബ്രുവരി അഞ്ചിന് എല്ലാ മെഡിക്കല്‍ കോളജുകളിലും 24 മണിക്കൂര്‍ റിലേ നിരാഹാരസമരം 12 മണിക്കൂര്‍ വീതം നടത്തും. ഫെബ്രുവരി 9 മുതല്‍ അനിശ്ചിതകാലസമരം നടത്തും.

സര്‍ക്കാര്‍ മെഡിക്കല്‍ കോളേജ് അധ്യാപകരുടെ ആവശ്യങ്ങള്‍ ഉടനടി അംഗീകരിക്കണമെന്നും കെ.ജി.എം.സി.ടി.എ. സംസ്ഥാന പ്രസിഡന്റ് ഡോ: ബിനോയ്. എസ് സംസ്ഥാന സെക്രട്ടറി ഡോ. നിര്‍മല്‍ ഭാസ്‌കര്‍ എന്നിവര്‍ ആവശ്യപ്പെട്ടു.