മാഡ്രിഡ്: നിലവിലെ ചാമ്പ്യന്മാരായ റയല്‍ മാഡ്രിഡ് ലാ ലിഗയില്‍ ഒന്നാം സ്ഥാനത്ത് തിരിച്ചെത്തി. സെല്‍റ്റ വിഗോയെ മടക്കമില്ലാത്ത രണ്ട് ഗോളുകള്‍ക്ക് വീഴ്‌ത്തിയതോടെയാണ് റയല്‍ വീണ്ടും ഒന്നാം സ്ഥാനത്തെത്തിയത്. ഈ വിജയത്തോടെ അവര്‍ക്ക് പതിനേഴ് മത്സരങ്ങളില്‍ മുപ്പത്തിയാറു പോയിന്റായി. പതിനാല് മത്സരങ്ങളില്‍ മുപ്പത്തിയഞ്ച് പോയിന്റുള്ള അത്‌ലറ്റിക്കോ മാഡ്രിഡാണ് രണ്ടാം സ്ഥാനത്ത്. സ്പാനിഷ് താരങ്ങളായ ലൂക്കാസ് വാസ്‌ക്വസും മാര്‍ക്കോ അസെന്‍സിയോയുമാണ് റയലിനായി ഗോളുകള്‍ നേടിയത്.
കളിയുടെ ആറാം മിനിറ്റില്‍ ലൂക്കാസ് റയല്‍ മാഡ്രിഡിനെ മുന്നിലെത്തിച്ചു. രണ്ടാം പകുതിയില്‍ അസെന്‍സിയോയും ലക്ഷ്യം കണ്ടതോടെ റയല്‍ 2-0 ന് ജയിച്ചുകയറി.
വിയാ റയല്‍ ഒന്നിനെതിരെ രണ്ട് ഗോളുകള്‍ക്ക് ലെവന്തെയെ തോല്‍പ്പിച്ചു. ഫെര്‍ നിനോ, ജെറാര്‍ഡ്് മൊറേനോ എന്നിവരാണ് വിയാ റയലിനായി സ്‌കോര്‍ ചെയ്തത്. ലെവന്തെയുടെ ആശ്വാസ ഗോള്‍ സെര്‍ജിയോ ലിയോണിന്റെ ബൂട്ടില്‍നിന്നാണ് പിറന്നത്.
റയല്‍ വല്ലാഡോളിഡ് ഏകപക്ഷീയമായ ഒരു ഗോളിന് ഗറ്റാഫെയെ കീഴടക്കി. സെവിയയും റയല്‍ ബെറ്റിസും തമ്മിലുള്ള മത്സരം സമനിലയായി. ഇരു ടീമുകളും ഓരോ ഗോള്‍ നേടി.
പ്രതികരിക്കാൻ ഇവിടെ എഴുതുക: