ലണ്ടന്‍: ആസ്റ്റണ്‍ വില്ലയെ ഒന്നിനെതിരെ രണ്ട് ഗോളുകള്‍ക്ക് തോല്‍പ്പിച്ച് മാഞ്ചസ്റ്റര്‍ യുണൈറ്റഡ് പ്രീമിയര്‍ ലീഗില്‍ പോയിന്റ് നിലയില്‍ ഒന്നാം സ്ഥാനത്തുള്ള ലിവര്‍പൂളിന് അരികിലെത്തി. ഈ വിജയത്തോടെ മാഞ്ചസ്റ്റര്‍ യുണൈറ്റഡിന് പതിനാറ് മത്സരങ്ങളില്‍ മുപ്പത്തിമൂന്ന് പോയിന്റായി. നിലവിലെ ചാമ്പ്യന്മാരായ ലിവര്‍പൂളിനും പതിനാറ് മത്സരങ്ങളില്‍ മുപ്പത്തിമൂന്ന് പോയിന്റാണുള്ളത്്. എന്നാല്‍ ഗോള്‍ശരാശരിയില്‍ യുണൈറ്റഡിനെ പിന്തള്ളി ലിവര്‍പൂള്‍ ഒന്നാം സ്ഥാനത്ത്് തടരുകയാണ്.
ആദ്യ പകുതിയുടെ അവസാന നിമിഷങ്ങളില്‍ മാര്‍ഷ്യലിന്റെ ഗോളില്‍ യുണൈറ്റഡ് മുന്നിലെത്തി. എന്നാല്‍ രണ്ടാം പകുതിയുടെ തുടക്കത്തില്‍ ആസ്റ്റണ്‍ വില്ലയുടെ ട്രോറെ ഗോള്‍ മടക്കി. അറുപത്തിയൊന്നാം മിനിറ്റില്‍ ലഭിച്ച പെനാല്‍റ്റി മുതലാക്കി ബ്രൂണോ യുണൈറ്റഡിന് വിജയം ഒരുക്കി.
മറ്റൊരു മത്സരത്തില്‍ വെസ്റ്റ് ഹാം യുണൈറ്റഡ് ഏകപക്ഷീയമായ ഒരു ഗോളിന് എവര്‍ട്ടണെ പരാജയപ്പെടുത്തി. കളിയവസാനിക്കാന്‍ നാലു മിനിറ്റുള്ളപ്പോള്‍ സൗസെക്കാണ് നിര്‍ണായക ഗോള്‍ അടിച്ചത്. ഈ തോല്‍വിയോടെ എവര്‍ട്ടണ്‍ നാലാം സ്ഥാനത്തേക്ക് പിന്തള്ളപ്പെട്ടു. പതിനാറ് മത്സരങ്ങളില്‍ അവര്‍ക്ക് ഇരുപത്തിയൊമ്പത് പോയിന്റാണുള്ളത്.
പ്രതികരിക്കാൻ ഇവിടെ എഴുതുക: