വാസ്‌കോ: ഇഗോര്‍ അംഗുളോയുടെ ഇരട്ട ഗോളില്‍ എഫ്‌സി ഗോവയ്ക്ക് വിജയം. ഐഎസ്എല്‍ ഏഴാം സീസണില്‍ ഒന്നിനെതിരെ രണ്ട് ഗോളുകള്‍ക്ക് ജംഷഡ്പൂര്‍ എഫ്‌സിയെ തോല്‍പ്പിച്ചു. മുപ്പത്തിമൂന്നാം മിനിറ്റില്‍ ഗോള്‍ വഴങ്ങിയ ഗോവ ശക്തമായ തിരിച്ചുവരവിലൂടെയാണ് വിജയം നേടിയത്.
അറുപത്തിമൂന്നാം മിനിറ്റിലും ഇഞ്ചുറി ടൈമിന്റെ അഞ്ചാം മിനിറ്റിലുമാണ് ഇഗോര്‍ ഗോള്‍ നേടിയത്. സ്റ്റീഫന്‍ എസ്സെയാണ് ജംഷഡ്പൂരിനായി ഗോള്‍ കുറിച്ചത്. ഈ വിജയത്തോടെ ഗോവ പോയിന്റ് നിലയില്‍ അഞ്ചാം സ്ഥാനത്തേക്ക് ഉയര്‍ന്നു. എട്ട് മത്സരങ്ങളില്‍ പതിനൊന്ന് പോയിന്റായി. അതേസമയം എട്ട് മത്സരങ്ങളില്‍ പത്ത് പോയിന്റുള്ള ജംഷഡ്പൂര്‍ ആറാം സ്ഥാനത്താണ്. .
മുപ്പത്തിമൂന്നാം മിനിറ്റില്‍ ജംഷഡ്പൂര്‍ ഗോളും നേടി. എയ്റ്റര്‍ മോണ്‍റോയിയുടെ ഫ്രീകിക്കില്‍ നിന്ന് സ്റ്റീഫന്‍ എസ്സെയാണ് ഗോള്‍ നേടിയത്. ബോക്‌സിന് ആറു വാര അകലെ നിന്ന് എസെ തൊടുത്തുവിട്ട ഷോട്ട് വലയില്‍ കയറി. രണ്ടാം പകുതിയുടെ തുടക്കത്തില്‍ ഗോവ ഗോള്‍ മടക്കി. പെനാല്‍റ്റിയിലൂടെ ഇഗോള്‍ അംഗുളോയാണ് ഗോള്‍ നേടിയത്.
ഗോള്‍ മുഖത്ത് വച്ച് ഗോവ താരം ജെയിംസ് ഡൊണാച്ചിയെ ജംഷഡ്പൂര്‍ അലക്‌സ് ഫൗള്‍ ചെയ്തതിനാണ് റഫറി പെനാല്‍റ്റി വിധിച്ചത്. അധികസമയത്തിന്റെ അഞ്ചാം മിനിറ്റില്‍ അംഗുളോ നിര്‍ണായക ഗോളിലുടെ ഗോവയ്ക്ക് വിജയം നേടിക്കൊടുത്തു.
പ്രതികരിക്കാൻ ഇവിടെ എഴുതുക: