അഡ്‌ലെയ്ഡ്: ഓസീസിനെതിരായ പിങ്ക് ബോള്‍ ക്രിക്കറ്റ് ടെസ്റ്റില്‍ നാണം കെട്ട് ഇന്ത്യന്‍ ടീം. ചരിത്രത്തിത്തിലെ ഇന്ത്യന്‍ ടീമിന്റെ ഏറ്റവും കുറഞ്ഞ ഇന്നിങ്‌സ് സ്‌കോറിന് എല്ലാവരും പുറത്തായി. 36 റണ്‍സിന് ഇന്ത്യയുടെ രണ്ടാം ഇന്നിങ്‌സ് അവസാനിച്ചു. 42 റണ്‍സായിരുന്നു ഇതുവരെയുള്ള കുറഞ്ഞ സ്‌കോര്‍.
ജയിക്കാന്‍ 90 റണ്‍സ് മതിയായിരുന്ന ആസ്‌ട്രേലിയ 21 ഓവറില്‍ രണ്ട് വിക്കറ്റ് നഷ്ടത്തില്‍ ലക്ഷ്യം കണ്ടു. ജോ ബേണ്‍സ് 51 റണ്‍സുമായി പുറത്താകാതെ നിന്നു. മാത്യു വേഡ് 35 റണ്‍സ് എടുത്തു. ഇരുവരും ഓപ്പണിംഗ് വിക്കറ്റില്‍ 70 റണ്‍സ് എടുത്തു.
ആദ്യ ഇന്നിങ്‌സ് ലീഡ് നേടിയ ശേഷമായിരുന്നു ഇന്ത്യയുടെ തകര്‍ച്ച.
കമ്മിന്‍സും ഹെയ്‌സല്‍വുഡുമാണ് ഇന്ത്യയെ തകര്‍ത്തത്. ഒരു വിക്കറ്റ് നഷ്ടത്തില്‍ ഒമ്പത് റണ്‍സെന്ന നിലയില്‍ ബാറ്റിങ് ആരംഭിച്ച ഇന്ത്യയ്‌ക്ക് തുടക്കത്തില്‍ തന്നെ പാറ്റ് കമ്മിന്‍സ് തിരിച്ചടി നല്‍കി. ആദ്യം നൈറ്റ് വാച്ച്മാന്‍ ജസ്പ്രീത് ബുംറയെ (2) പുറത്താക്കിയ കമ്മിന്‍സ് പിന്നാലെ ചേതേശ്വര്‍ പൂജാര (0), വിരാട് കോലി (4) എന്നിവരെ മടക്കി. തന്റെ ആദ്യ ഓവറില്‍ തന്നെ മായങ്ക് അഗര്‍വാളിനെയും (9) അജിങ്ക്യ രഹാനെയേയും (0) മടക്കിയ ജോഷ് ഹെയ്സല്‍വുഡും ഇന്ത്യയെ ഞെട്ടിച്ചു.ഹെയ്ല്‍വുഡ് അഞ്ചും കമ്മിന്‍സ് നാലും വിക്കറ്റുകള്‍ നേടി. അവസാന ബാറ്റ്മാനായി ഇറങ്ങിയ മുഹമ്മദ് ഷമി പരുക്കേറ്റ് പുറത്തുപോവുകയായിരുന്നു.
പ്രതികരിക്കാൻ ഇവിടെ എഴുതുക: