കൊച്ചി: വൈറ്റില-പാലാരിവട്ടം ബൈപ്പാസില്‍ ചക്കരപ്പറമ്പില്‍ കെഎസ്ആര്‍ടിസി സൂപ്പര്‍ ഡീലക്‌സ് ബസ് മീഡിയനിലെ തണല്‍ മരത്തിലേക്ക് ഇടിച്ചു കയറി ഡ്രൈവര്‍ മരിച്ചു. 28 പേര്‍ക്ക് പരിക്കേറ്റു. മൂന്നുപേരുടെ നിലഗുരുതരം. തിരുവനന്തപുരം സ്വദേശി അരുണ്‍ സുകുമാര്‍ (45) ആണ് മരിച്ചത്. കണ്ടക്ടര്‍ തിരുവനന്തപുരം സ്വദേശി സുരേഷ്, യാത്രക്കാരായ തിരുവനന്തപുരം സ്വദേശി രജിത, കോട്ടയം സ്വദേശി മിഥുന്‍ എന്നിവരുടെ നില ഗുരുതരം.
പരിക്കേറ്റ മിഥുനെ മെഡിക്കല്‍ സെന്ററില്‍ നിന്ന് കോട്ടയം മെഡിക്കല്‍ കോളേജിലേക്ക് മാറ്റി. രണ്ടുപേരെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. അഞ്ചു പേരെ എറണാകുളം ജനറല്‍ ആശുപത്രിയിലും 18 പേരെ എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു.
ഇന്നലെ പുലര്‍ച്ചെ 3.30ന് ബൈപ്പാസില്‍ ചക്കരപ്പറമ്പ് വൈശാലി ബസ് സ്റ്റോപ്പിന് സമീപമായിരുന്നു അപകടം. തിരുവനന്തപുരത്തുനിന്ന് കോഴിക്കോട്ടേക്കു പോകുകയായിരുന്ന ബസാണ് അപകടത്തില്‍പ്പെട്ടത്. ഇടിയുടെ ആഘാതത്തില്‍ മീഡിയനില്‍നിന്ന് പിഴുതുപോന്ന മരത്തില്‍ കയറിയാണ് ബസ് നിന്നത്. ബസിന്റെ മുന്‍ഭാഗം പൂര്‍ണമായും തകര്‍ന്നു. കാബിനില്‍ കുടുങ്ങിയ ഡ്രൈവറെ ഏറെ സമയമെടുത്താണ് പുറത്തെടുത്തത്. അപ്പോഴേക്കും മരിച്ചിരുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: