ധനുഷിന്റേയും സായ് പല്ലവിയുടേയും തകര്‍പ്പന്‍ നൃത്തച്ചുവടുകളുള്ള മാരിയിലെ ഹിറ്റ് ഗാനം റൗഡി ബേബി യൂട്യൂബിലും ഹിറ്റ്. 100 കോടിയിലേറെ പേരാണ് ഗാനം ഇതുവരെ യൂട്യൂബില്‍ കണ്ടത്. ഈ നേട്ടം കൈവരിക്കുന്ന ആദ്യ തെന്നിന്ത്യന്‍ ഗാനമാണ് ഇത്.
ധനുഷും സായ് പല്ലവിയും ഈ സന്തോഷം സമൂഹമാധ്യമങ്ങളിലൂടെ പങ്കുവച്ചിട്ടുണ്ട്. ലോകമെമ്പാടും ആരാധകരെ സൃഷ്ടിച്ച ധനുഷിന്റെ കൊലവെറി പാട്ട് ഇറങ്ങി ഒമ്പത് വര്‍ഷം പൂര്‍ത്തിയാക്കിയ അന്ന് തന്നെയാണ് റൗഡി ബേബിയും യൂട്യൂബ് റെക്കോര്‍ഡും ഇട്ടിരിക്കുന്നതെന്നും ധനുഷ് അറിയിച്ചിട്ടുണ്ട്.
2019ല്‍ ഇന്ത്യയില്‍ ഏറ്റവും കൂടുതല്‍ ആളുകള്‍ കണ്ട മ്യൂസിക്കല്‍ വീഡിയോ എന്ന നേട്ടം റൗഡി ബേബി നേരത്തെ സ്വന്തമാക്കിയതാണ്. ധനുഷും ദിയയും ചേര്‍ന്നാണ് ഗാനം ആലപിച്ചിരിക്കുന്നത്. പ്രഭുദേവയാണ് നൃത്ത സംവിധാനം നിര്‍വഹിച്ചിരിക്കുന്നത്. ഇതില്‍ ധനുഷിനേക്കാള്‍ സായി പല്ലവിയുടെ നൃത്തച്ചുവടുകളാണ് ഏറെ ശ്രദ്ധേയമായത്.
പ്രതികരിക്കാൻ ഇവിടെ എഴുതുക: