ന്യൂദല്‍ഹി : ബിജെപി മുതിര്‍ന്ന നേതാവ് എല്‍.കെ. അദ്വാനിയുടെ 94ാം ജന്മദിനത്തില്‍ നേരിട്ടെത്തി ആശംസകള്‍ നേര്‍ന്ന് പ്രധാനമന്ത്രി നരേന്ദ്രമോദി. അദ്വാനിയുടെ വസതിയിലെത്തി ആശംസകള്‍ക്കൊപ്പം പൂച്ചെണ്ടും സമ്മാനിച്ച് പ്രധാനമന്ത്രി കാല്‍ തൊട്ടുവന്ദിച്ചു.
രാജ്യം ഒറ്റയ്ക്ക് ഭരിക്കാന്‍ ബിജെപിയെ പാകപ്പെടുത്തുന്നതില്‍ അദ്വാനി മുഖ്യപങ്കാണ് വഹിച്ചത്. കേന്ദ്ര ആഭ്യന്തരമന്ത്രി അമിത് ഷായും ബിജെപി ദേശീയ അദ്ധ്യക്ഷന്‍ ജെ.പി നദ്ദയും പ്രധാനമന്ത്രിക്ക് ഒപ്പമുണ്ടായിരുന്നു.
ലളിതമായ ആഘോഷത്തില്‍ പ്രധാനമന്ത്രിയടക്കമുള്ളവര്‍ പങ്കുകൊള്ളുന്നതിന്റേയും അദ്വാനിയുടെ കൈ പിടിച്ച് മോദി കേക്ക് മുറിക്കുന്നതിന്റെയും പരസ്പരം മധുരം നല്‍കുന്നതിന്റെയും വീഡിയോയും പുറത്തുവന്നിട്ടുണ്ട്.
അദ്വാനിക്ക് ട്വിറ്ററിലൂടേയും മോദി ജന്മദിനാശംസകള്‍ നേര്‍ന്നിരുന്നു. ജനങ്ങളിലേയ്‌ക്ക് ഇറങ്ങിച്ചെന്ന് അവരിലൂടെ രാജ്യത്തിന്റെ വികസനം സാധ്യമാക്കിയതില്‍ അദ്വാനി പ്രധാന പങ്കുവഹിച്ചു. അദ്വാനിയുടെ ദീര്‍ഘായുസിനായി പ്രാര്‍ത്ഥിക്കുന്നു എന്നും മോദി ട്വിറ്ററിലൂടെ അറിയിച്ചു.
പ്രതികരിക്കാൻ ഇവിടെ എഴുതുക: