വനിതയെ വഞ്ചിച്ച് കോടികള്‍ തട്ടിയെടുത്ത ഹോട്ടല്‍ വ്യവസായി പിടിയില്‍

മരട്: ഹോട്ടല്‍ വ്യവസായത്തില്‍ പങ്കാളിയാക്കാമെന്നു പറഞ്ഞു വനിതയില്‍ നിന്ന് കോടികളുടെ പണം തട്ടിയെടുത്ത ഹോട്ടല്‍ വ്യവസായിയെ മരട് പോലീസ് അറസ്റ്റു ചെയ്തു. കടവന്ത്ര വിജയ ഫ്‌ളാറ്റ് 6 എ യില്‍ താമസിക്കുന്ന സി.കെ. വിജയനെ (58) ആണ് അറസ്റ്റു ചെയ്തത്.

തൃപ്പൂണിത്തുറ കല്‍ഹാരകണ്ടോത്ത് പാട്ടുപുരക്കല്‍ പ്രീതാ രാധാകൃഷണനാണ് പരാതിക്കാരി. മരട് കണ്ണാടിക്കാടില്‍ പുതുതായി ആരംഭിക്കുന്ന ഫൈവ് സ്റ്റാര്‍ ഹോട്ടലില്‍ ബിസിനസ് പങ്കാളിയാക്കാമെന്ന് പറഞ്ഞു 08/10/2018 മുതല്‍ കഴിഞ്ഞ മാസം വരെ തന്റെയും ഭര്‍ത്താവിന്റെയും ബാങ്ക് അക്കൗണ്ടില്‍ നിന്നും പല ഘട്ടങ്ങളിലായി 11 കോടി 53 ലക്ഷത്തി 14000 രൂപ ഇയാള്‍ തട്ടിയെടുത്തതായാണ് പരാതി.

ഹോട്ടല്‍ വ്യവസായത്തില്‍ പങ്കാളിയാക്കിയില്ല എന്നു മാത്രമല്ല, പണം തിരികെ നല്‍കാതെ ഭീഷണിപ്പെടുത്തുന്നതായും പരാതിയില്‍ പറയുന്നു. മരട് പോലീസ് സിഐ വിനോദ്, എസ്‌ഐ അജികുമാര്‍ എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റു ചെയ്തത്. ഇയാളെ കോടതിയില്‍ ഹാജരാക്കി.