പൊന്നാനി: ഒന്നിന് പിന്നാലെ മറ്റൊന്നായി പൊന്നാനി പോലീസ് സ്റ്റേഷനില്‍ കൊറോണ കേസുകള്‍. സിഐ ഉള്‍പ്പെടെയുള്ള പോലീസുകാര്‍ വീണ്ടും ക്വാറന്റീനില്‍. ഏറ്റവുമൊടുവില്‍ നാലു പേര്‍ക്കുകൂടി രോഗം സ്ഥിരീകരിച്ചതോടെയാണ് സിഐ അടക്കമുള്ളവര്‍ രണ്ടാം തവണയും ക്വാറന്റീനില്‍ പ്രവേശിക്കേണ്ടി വന്നത്.
പൊന്നാനി സ്റ്റേഷനില്‍ ഇതോടെ 14 പോലീസുകാര്‍ക്ക് വൈറസ്ബാധ സ്ഥിരീകരിച്ചു. സ്റ്റേഷന്‍ പ്രവര്‍ത്തനം പൂര്‍ണമായി താളം തെറ്റിയിരിക്കുകയാണ്. ആന്റിജന്‍ ടെസ്റ്റ് നടത്തി നെഗറ്റീവായ പൊലീസുകാര്‍ക്കാണ് പിന്നീട് നടന്ന സ്രവ പരിശോധനയില്‍ പോസിറ്റീവായിരിക്കുന്നത്.
ഏറ്റവുമൊടുവില്‍ സ്ഥിരീകരിക്കപ്പെട്ട പോലീസുകാരുടെ സമ്പര്‍ക്കപ്പട്ടികയും വലുതാണ്. തുടക്കത്തില്‍ അഞ്ച് പേര്‍ക്ക് പോസിറ്റീവായതോടെ സ്റ്റേഷനിലെ എസ്‌ഐയും സിഐയും ഉള്‍പ്പെടെ 47 പേര്‍ ക്വാറന്റീനിലായിരുന്നു. ക്വാറന്റീന്‍ അവസാനിപ്പിച്ച് ഡ്യൂട്ടിയില്‍ തിരിച്ചെത്തിയപ്പോഴാണ് വീണ്ടും പോസിറ്റീവ് കേസുകളുണ്ടായത്. സ്റ്റേഷനിലെ പല പ്രവര്‍ത്തനങ്ങളും പ്രതിസന്ധിയിലാണ്. ഏറെ നിയന്ത്രണങ്ങളോടെയാണ് നിലവില്‍ സ്റ്റേഷന്‍ പ്രവര്‍ത്തിക്കുന്നത്. പല കേസുകളുടെയും അന്വേഷണം വഴിമുട്ടി നില്‍ക്കുകയാണ്.
പ്രതികരിക്കാൻ ഇവിടെ എഴുതുക: