വളയം: എസ്എസ്എല്‍സി പരീക്ഷ പുനരാരംഭിച്ചപ്പോള്‍ കോവിഡ് രോഗഭീതി മൂലം മറ്റ് വിദ്യാര്‍ത്ഥികളോടൊപ്പം പരീക്ഷ എഴുതാന്‍ സാധിക്കുകയില്ലെന്ന് അറിയിച്ച് വിദ്യാര്‍ത്ഥിനി പരീക്ഷ എഴുതാതെ മടങ്ങി. വാണിമേല്‍ ക്രസന്റ് ഹയര്‍സെക്കന്ററി സ്‌കൂളിലെ വെളളിയോട് സ്വദേശിനിയായ വിദ്യാര്‍ത്ഥിനിയാണ് പരീക്ഷ എഴുതാതിരുന്നത്.
ഉച്ചക്ക് ഒന്നേ മുക്കാലിന് പരീക്ഷക്ക് ഹാജരാകാത്ത വിദ്യാര്‍ത്ഥികളുടെ ലിസ്റ്റ് സ്‌കൂള്‍ അധിക്യതര്‍ പരിശോധിച്ചിരുന്നു. അപ്പോഴാണ് ഈ പെണ്‍കുട്ടി പരീക്ഷക്ക് എത്തിയിട്ടില്ലെന്ന വിവരം അറിയുന്നത്. ഉടന്‍ തന്നെ സ്‌കൂള്‍ ജീവനക്കാര്‍ വിദ്യാര്‍ത്ഥിയുടെ വീടുമായി ബന്ധപ്പെട്ടു. അസുഖമുണ്ടെന്നായിരുന്നു ആദ്യം വീട്ടുകാര്‍ വിശദീകരിച്ചത്. അസുഖമുണ്ടെങ്കില്‍ പ്രത്യേക മുറിയില്‍ ഇരുത്താമെന്ന് സ്‌കൂള്‍ അധിക്യതര്‍ പറഞ്ഞു. രണ്ട് മണിയോടെ രക്ഷിതാവിനോടൊപ്പം വിദ്യാര്‍ത്ഥിനി സ്‌കൂളിലെത്തി.
തെര്‍മല്‍ സ്‌കാനര്‍ വഴി വിദ്യാര്‍ത്ഥിനിയെ പരിശോധിച്ചപ്പോള്‍ അസുഖത്തിന്റെ ലക്ഷണമൊന്നും കാണാതായതോടെ ക്ലാസ് മുറിയിലേക്ക് പോകാന്‍ ആവശ്യപ്പെട്ടു. എന്നാല്‍ കോവിഡ് ഭീതി മൂലം മറ്റ് കുട്ടികളോടൊപ്പം ക്ലാസില്‍ ഇരുന്ന് പരീക്ഷ എഴുതാന്‍ ഒരുക്കമല്ലെന്ന് രക്ഷിതാവ് സ്‌കൂള്‍ അധിക്യതരെ അറിയിച്ചു. ഉടന്‍ തന്നെ സ്‌കൂളിലെ പരീക്ഷ ചീഫും സ്ഥലത്തുണ്ടായിരുന്ന എഇഒയും വിഷയം ഉന്നത വിദ്യാഭ്യാസ അധികൃതരുടെ ശ്രദ്ധയില്‍പ്പെടുത്തി. അസുഖത്തിന്റെ ലക്ഷണങ്ങള്‍ ഉണ്ടെങ്കില്‍ പ്രത്യേക മുറി അനുവദിക്കാമെന്നും അല്ലാത്തപക്ഷം മുറി അനുവദിക്കേണ്ടതില്ലെന്നും മറ്റ് കുട്ടികളോടൊപ്പം ക്ലാസ് മുറിയില്‍ ഇരുന്ന് പരീക്ഷ എഴുതണമെന്നും നിര്‍ദ്ദേശം വന്നു. ഇക്കാര്യം രക്ഷിതാക്കളെ അറിയിച്ചതോടെ പരീക്ഷ എഴുതുന്നില്ലെന്ന് അറിയിച്ച് രക്ഷിതാവ് കുട്ടിയെയും കൂട്ടി പോവുകയായിരുന്നുവെന്ന് സ്‌കൂള്‍ അധികൃതര്‍ പറഞ്ഞു.
പ്രതികരിക്കാൻ ഇവിടെ എഴുതുക: