തിരുവനന്തപുരം: തെറ്റായ മേല്‍വിലാസം നല്‍കി തമിഴ്‌നാട്ടില്‍ നിന്നും ആളുകള്‍ അതിര്‍ത്തി കടന്നെത്തുന്നു. ഇഞ്ചിവിള അതിര്‍ത്തി കടന്നെത്തിയവരാണ് വ്യാജ മേല്‍ വിലാസം നല്‍കി തെറ്റിദ്ധരിപ്പിച്ചതായി കണ്ടെത്തിയിരിക്കുന്നത്. ക്രമക്കേട് ആവര്‍ത്തിക്കാതിരിക്കാന്‍ വിശദമായ പരിശോധന നടത്തുമെന്ന് ജില്ലാ കളക്ടര്‍ അറിയിച്ചു.
ഇഞ്ചിവിള അതിര്‍ത്തി കടന്ന് കഴിഞ്ഞ ദിവസം എത്തിയ ചിലര്‍ നല്‍കിയത് നെയ്യാറ്റിന്‍കരയിലെ മേല്‍വിലാസമാണ്. തദ്ദേശ സ്ഥാപനങ്ങള്‍ നടത്തിയ അന്വേഷണത്തില്‍ ഇത് വ്യാജമാണെന്ന് കണ്ടെത്തിയതോടെയാണ് ഇത്തരത്തില്‍ വ്യാപകമായി ക്രമക്കേട് നടക്കുന്നത് പുറത്തുവന്നത്.
ചെക്ക്‌പോസ്റ്റുകളില്‍ പരിശോധന കര്‍ശനമാണെങ്കിലും അനധികൃതമായി അതിര്‍ത്തി കടക്കല്‍ നേരത്തെ തന്നെ സജീവമായിരുന്നു. ഊടുവഴികള്‍ താണ്ടി നിരവധി പേരാണ് സംസ്ഥാനത്തേക്ക് എത്തിയിട്ടുള്ളത്.
വാഹനങ്ങളില്‍ വന്ന ശേഷം അതിര്‍ത്തി മേഖലയിലൂടെ നടന്നുകയറി കുറച്ചുദൂരം കഴിഞ്ഞ് മറ്റൊരു വാഹനത്തില്‍ കയറി പോകുന്ന സംഭവങ്ങളും റിപ്പോര്‍ട്ട് ചെയ്തിട്ടുണ്ട്. രേഖകള്‍ കൃത്യമായി പരിശോധിച്ചിട്ടാണ് വിടുന്നതെന്ന് അധികൃതര്‍ ആവര്‍ത്തിക്കുമ്പോഴാണ് ക്രമക്കേട് വെളിയില്‍ വരുന്നത്. ഇത്തരം സംഭവങ്ങള്‍ തുടരാതിരിക്കാന്‍ പരിശോധന കൂടുതല്‍ കര്‍ശനമാക്കാണ് തീരുമാനം.
പ്രതികരിക്കാൻ ഇവിടെ എഴുതുക: