ജീവനക്കാര്‍ക്കായി കെഎസ്ആര്‍ടിസി സര്‍വീസ്, ഈടാക്കുന്നത് ഇരട്ടി ചാര്‍ജ്ജ്

കോഴിക്കോട്: ജില്ലയിലെ പ്രധാനപ്പെട്ട കേന്ദ്രങ്ങളില്‍ നിന്ന് സിവില്‍ സ്റ്റേഷനിലേക്കും തിരിച്ചും സര്‍ക്കാര്‍ ജീവനക്കാര്‍ക്കായി കെഎസ്ആര്‍ടിസി ബസ് സര്‍വ്വീസുകള്‍ ആരംഭിച്ചു. സര്‍ക്കാര്‍ ഓഫീസുകളുടെ സുഗമമായ പ്രവര്‍ത്തനം ഉറപ്പാക്കാനായാണിത്. സാധാരണ നിരക്കിന്റെ ഇരട്ടിയാണ് യാത്രാ ചാര്‍ജ്ജായി ഈടാക്കുന്നത്.  

ജീവനക്കാര്‍ക്ക് കൈകള്‍ ശുചീകരിക്കാന്‍ സാനിറ്റൈസര്‍ നല്‍കി. നിശ്ചിത അകലം പാലിച്ചാണ് യാത്രക്കാര്‍ക്ക് സീറ്റുകള്‍ നല്‍കിയത്. മൂന്ന് പേര്‍ക്ക് ഇരിക്കാവുന്ന സീറ്റില്‍ രണ്ടുപേരും രണ്ടാള്‍ക്കിരിക്കാവുന്ന സീറ്റില്‍ ഒരാളെയുമാണ് ഇരിക്കാന്‍ അനുവദിച്ചത്. പരമാവധി 30 ജീവനക്കാരെ മാത്രമാണ് ബസില്‍ പ്രവേശിപ്പിച്ചത്.    

ഇനി മുതല്‍ എല്ലാ പ്രവൃത്തി ദിവസങ്ങളിലും നിശ്ചിത സമയത്ത് സര്‍വീസ് ഉണ്ടാകും. അനുവദിച്ച റൂട്ടുകളിലെ ബസ് സ്റ്റോപ്പുകളില്‍ നിന്ന് ഔദ്യോഗിക തിരിച്ചറിയല്‍ രേഖയുടെ അടിസ്ഥാനത്തിലാണ് ജീവനക്കാര്‍ക്ക് ഈ സൗകര്യം ഒരുക്കിയത്. തൊട്ടില്‍പ്പാലം – കുറ്റ്യാടി- ഉള്ള്യേരി (രാവിലെ 8.10), ബാലുശ്ശേരി – നന്മണ്ട (8.30), മുക്കം-കുന്നമംഗലം (8.45), വടകര-കൊയിലാണ്ടി (8.20), രാമനാട്ടുകര- ഫറോക്ക് (9.00), താമരശ്ശേരി-നരിക്കുനി (വഴി) (8.30) എന്നീ റൂട്ടുകളില്‍ നിന്നാണ് ബസുകള്‍ സിവില്‍ സ്റ്റേഷനിലെത്തിയത്. സിവില്‍ സ്റ്റേഷനില്‍ നിന്നും വൈകീട്ട് 5.10 ന് തിരികെ പുറപ്പെട്ടു. സര്‍വ്വീസുമായി ബന്ധപ്പെട്ട സംശയങ്ങള്‍ക്ക് 85476 16019, 0495 2370518 നമ്പറുകളില്‍ ബന്ധപ്പെടാം.