ന്യൂദല്‍ഹി: കൊറോണ വൈറസ് രാജ്യത്ത് വ്യാപകമാകുന്ന പശ്ചാത്തലത്തില്‍ രോഗത്തെ പ്രതിരോധിക്കാന്‍ അക്ഷീണം പ്രയത്‌നിക്കുന്നവരാണ് ആരോഗ്യപ്രവര്‍ത്തകര്‍. ഇത്തരത്തില്‍ അശ്രാന്ത പരിശ്രമം നടത്തുന്ന ആരോഗ്യപ്രവര്‍ത്തകരെ പ്രധാനമന്ത്രി നരേന്ദ്ര മോദിയുടെ നിര്‍ദേശ പ്രകാരം ജനതാ കര്‍ഫ്യുവിനിടെ രാജ്യം ആദരിക്കുകയും ചെയ്തിരുന്നു.
കൊറോണ രോഗ ബാധിതരെ അര്‍പ്പണബോധത്തോടെ പരിചരിക്കുന്നവരെ പ്രധാനമന്ത്രി ഫോണിലൂടെ ബന്ധപ്പെട്ട് സംസാരിക്കുന്ന കൂട്ടത്തിലാണ് മഹാരാഷ്‌ട്രയിലെ പൂനെയിലെ മുനിസിപ്പല്‍ കോര്‍പറേഷന്റെ കീഴിലുള്ള ഒരു ആശുപത്രിയില്‍ പ്രവര്‍ത്തിക്കുന്ന ഛായാ ജഗ്താപ് എന്ന് പേരുള്ള നഴ്‌സിനെ തേടിയും മോദിജിയുടെ അഭിനന്ദനമെത്തിയത്.
കൊറോണ രോഗം ബാധിച്ച രോഗികളെ അര്‍പ്പണബോധത്തോടെ പരിചരിക്കുമ്പോള്‍ ഛായാ തന്റെ കുടുംബത്തിന്റെ ആശങ്കകള്‍ എങ്ങനെയാണ് അകറ്റുന്നതെന്നാണ് പ്രധാനമന്ത്രി മോദി ആദ്യം തിരക്കിയത്.
ഈ ചോദ്യത്തിന് മറുപടിയായി, തനിക്ക് തന്റെ കുടുംബത്തെ കുറിച്ച് ചിന്തയുണ്ടെങ്കിലും തൊഴിലിനാണ് താന്‍ മുന്‍ഗണന നല്‍കുന്നതെന്നും, ഈ അവസ്ഥയില്‍ രോഗികളെ സേവിക്കാനാണ് താന്‍ ആഗ്രഹിക്കുന്നതെന്നും ഛായ മറുപടി നല്‍കി. തുടര്‍ന്ന്, കൊറോണ രോഗികളായി ആശുപത്രിയില്‍ എത്തിയവര്‍ക്ക് ഭയമുണ്ടോ എന്നും പ്രധാനമന്ത്രി നഴ്‌സിനോട് തിരക്കി. ഇവരോട് താനും ആശുപത്രി അധികൃതരും ഭയപ്പെടരുതെന്നു അഭ്യര്‍ത്ഥിച്ചിട്ടുണ്ടെന്നും ഒന്നും സംഭവിക്കില്ലെന്ന് പറഞ്ഞുകൊണ്ട് ആശ്വസിപ്പിക്കുന്നുണ്ടെന്നും ഛായ ഉത്തരം നല്‍കി.
ടെസ്റ്റ് ഫലങ്ങള്‍ നെഗറ്റീവാകുമെന്നും താന്‍ രോഗികളൊട് പറഞ്ഞതായും നഴ്‌സ് പ്രധാനമന്ത്രിയോട് പറഞ്ഞു. രോഗികളുടെ മനോബലം കൂടാനുള്ള കാര്യങ്ങളാണ് തങ്ങള്‍ അവരോടു പറയുന്നതെന്നും ഛായ പറഞ്ഞു. കൊറോണ രോഗത്തില്‍ നിന്നും മുക്തി നേടിയ ഏഴ് പേര്‍ ആശുപത്രി വിട്ടിട്ടുണ്ടെന്നും ഛായ പ്രധാനമന്ത്രിയെ അറിയിച്ചു.
നിങ്ങളെ പോലെ ലക്ഷകണക്കിന് നഴ്സുമാരും പാരാമെഡിക്കല്‍ സ്റ്റാഫും, ഡോക്ടര്‍മാരും താപസ്വികളെ പോലെ രാജ്യത്തെ വിവിധ ആശുപത്രികളില്‍ ജോലി ചെയ്യുന്നുണ്ട്. ഞാന്‍ നിങ്ങളെ എന്റെ അഭിനന്ദനം അറിയിക്കുകയാണ്. താങ്കളുടെ അനുഭവങ്ങള്‍ കേള്‍ക്കാന്‍ കഴിഞ്ഞതില്‍ എനിക്ക് അങ്ങേയറ്റം സന്തോഷമുണ്ട്.’ പ്രധാനമന്ത്രി നഴ്‌സ് ഛായാ ജഗ്താപിനെ പ്രശംസിച്ചുകൊണ്ട് പറഞ്ഞു.
രാജ്യത്താകമാനം കൊറോണ രോഗത്തിനെതിരെ പോരാടുന്ന ആരോഗ്യ പ്രവര്‍ത്തകര്‍ക്ക് എന്തെങ്കിലും സന്ദേശം നല്‍കാനുണ്ടോ എന്നാണ് പ്രധാനമന്ത്രി നഴ്‌സിനോട് ചോദിച്ചത്. ‘ഭയപ്പെടേണ്ട ഒരാവശ്യവുമില്ല. ഈ രോഗത്തിനെതിരെ പോരാടി നമ്മള്‍ അതിനെ ഇല്ലാതാക്കണം. നമ്മുടെ രാജ്യം വിജയം നേടുന്നതിനുള്ള കാര്യങ്ങള്‍ നമ്മള്‍ ചെയ്യണം. ആശുപത്രികളും ആശുപത്രി ജീവനക്കാരും ഇത് മുദ്രാവാക്യമായി സ്വീകരിക്കണം. ഞാന്‍ എന്റെ ഡ്യൂട്ടി മാത്രമാണ് ചെയ്യുന്നത്. പക്ഷെ അങ്ങ് രാപ്പകലില്ലാതെ ഞങ്ങള്‍ക്കായി ജോലി ചെയ്യുന്നു. ഞാന്‍ അങ്ങയോടു കടപ്പെട്ടിരിക്കുന്നു. ഇങ്ങനെയൊരു പ്രധാനമന്ത്രിയെ കിട്ടിയത് ഞങ്ങളുടെ ഭാഗ്യമാണ്.’ ഛായാ ജഗ്താപ് പ്രധാനമന്ത്രിക്ക് ഉത്തരം നല്‍കുകയായിരുന്നു.
പ്രതികരിക്കാൻ ഇവിടെ എഴുതുക: