ന്യൂദല്‍ഹി: കൊറോണ വൈറസ് വ്യാപനം തടയുന്നതിന്റെ ഭാഗമായി ജനതാ കര്‍ഫ്യൂ ആചരിച്ച് ജനത. പ്രധാനമന്ത്രി നരേന്ദ്രമോദിയുടെ ആഹ്വാനത്തിന് സംസ്ഥാനങ്ങളെല്ലാം പിന്തുണ നല്‍കിയിട്ടുണ്ട്. ജനങ്ങള്‍ സ്വമേധയാ വീട്ടിലിരിക്കാന്‍ സന്നദ്ധ പ്രകടിപ്പിച്ചിട്ടുണ്ട്.
14 മണിക്കൂര്‍ നീണ്ടു നില്‍ക്കുന്ന ജനത കര്‍ഫ്യൂവിനെ പിന്തുണച്ച് കടകമ്പോളങ്ങള്‍ അടച്ചിടും. ഹോട്ടലുകളും റസ്റ്റോറന്റുകളും ബേക്കറികളും തുറക്കില്ല. കെഎസആര്‍ടിസി ബസുകളും സ്വകാര്യ ബസുകളും സര്‍വീസ് നടത്തില്ല. കൊച്ചി മെട്രോ അടക്കം ട്രെയിനുകള്‍ ഓടില്ല. ഓട്ടോയും ടാക്‌സികളും നിരത്തിലിറങ്ങില്ല. ബാറുകള്‍ ഉള്‍പ്പടെ മദ്യശാലകള്‍ പ്രവര്‍ത്തിക്കില്ല.
പെട്രോള്‍ പമ്പുകള്‍ പ്രവര്‍ത്തിക്കില്ല. എന്നാല്‍, ആംബുലന്‍സ് ഉള്‍പ്പടെ അവശ്യസര്‍വ്വീസിനുള്ള വാഹനങ്ങള്‍ക്ക് ഇന്ധനം നല്‍കും. അതിനായി പ്രത്യേക ക്രമീകരണമേര്‍പ്പെടുത്തും. മെഡിക്കല്‍ സ്റ്റോറുകള്‍ തുറക്കും. എന്നാല്‍, അറുപത്തിയഞ്ച് വയസിന് മുകളില്‍ പ്രായമുള്ളവര്‍ നടത്തുന്ന മെഡിക്കല്‍ സ്റ്റോറുകള്‍ അടച്ചിടും. മില്‍മ പാലിന്റെ വിതരണം രാവിലെ ഏഴ് മണിക്ക് മുമ്പ് അവസാനിപ്പിക്കും. അവശ്യ സര്‍വ്വീസുകളായ ആരോഗ്യവകുപ്പിനും പോലീസിനും മാധ്യമപ്രവര്‍ത്തകര്‍ക്കും കര്‍ഫ്യൂവില്‍ നിന്ന് ഇളവുണ്ട്.
രാഷ്‌ട്രീയം മറ്റിവെച്ച് രാജ്യത്തെ എല്ലാ പ്രതിപക്ഷ പാര്‍ട്ടികളും ജനത കര്‍ഫ്യൂവിന് പിന്തുണ പ്രഖ്യാപിച്ചിട്ടുണ്ട്. കൂടാതെ വിവിധ മേഖലകളിലെ പ്രമുഖരും പ്രധാനമന്ത്രിക്ക് പിന്തുണയുമായി രംഗത്തെത്തി. പ്രധാനമന്ത്രിയുടെ നിര്‍ദ്ദേശത്തെ പിന്തുണച്ച് ഇന്ന് രാവിലെ ഏഴ്് മണിമുതല്‍ ഒമ്പതുവരെ എല്ലാ സംസ്ഥാനങ്ങളും കര്‍ഫ്യൂ ആചരിക്കും. ഇതിനു പുറമേ ജനങ്ങള്‍ സാമൂഹിക അകലം പാലിക്കണമെന്നും, ഇതാണ് കൊറോണ വൈറസ് ബാധയുടെ ചങ്ങലയെ തകര്‍ത്തെറിയാനുള്ള ഉത്തമ മാര്‍ഗ്ഗമെന്നും മുഖ്യമന്ത്രിമാര്‍ ജനങ്ങളോട് നിര്‍ദ്ദേശിച്ചിട്ടുണ്ട്.
ജനതാ കര്‍ഫ്യൂവിനെ അനുകൂലിച്ച് ഇന്ന് ഏഴിനും ഒന്‍പതിനും ഇടയില്‍ പാസഞ്ചര്‍ തീവണ്ടികള്‍ സര്‍വ്വീസ് നടത്തില്ലെന്ന് ഇന്ത്യന്‍ റെയില്‍ വേ അറിയിച്ചിട്ടുണ്ട്. സബര്‍ബന്‍ തീവണ്ടികളും വെട്ടിക്കുറച്ചിട്ടുണ്ട്. രാജ്യത്തെ മെട്രോ സര്‍വ്വീസുകളും ഇന്ന് സര്‍വ്വീസ് നടത്തില്ല. വിമാനങ്ങള്‍ ഒന്നും തന്നെ സര്‍വ്വീസ് നടത്തില്ലെന്നും വിമാനക്കമ്പനികളും വ്യക്തമാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: