പുനലൂര്‍: പരീക്ഷ കഴിഞ്ഞ് സ്കുളിൽ നിന്നും മടങ്ങിയ രണ്ട് പത്താം ക്ലാസ് വിദ്യാര്‍ഥികള്‍ കല്ലടയാറ്റില്‍ മുങ്ങി മരിച്ചു. ശബരിഗിരി റെസിഡന്‍ഷ്യല്‍ സ്കൂളിലെ വിദ്യാര്‍ത്ഥികളാണ് മരിച്ചത്. ആരംപുന്ന കമല്‍ ഭവനില്‍ രാജീവിന്റെ മകന്‍ അനന്തകൃഷ്ണന്‍ (15), പുന്നല ഗോകുലത്തില്‍ പി.സോമരാജന്റെ മകന്‍ അതുല്‍.എസ്.രാജ് (15) എന്നിവരാണ് മരിച്ചത്.
കല്ലടയാറ്റിലെ തൊളിക്കോട് കൊച്ചുതുണ്ടില്‍ കടവില്‍ കുളിയ്‌ക്കാനിറങ്ങിയപ്പോഴാണ് സംഭവം. സ്കൂളില്‍ മോഡല്‍ പരീക്ഷ കഴിഞ്ഞ ശേഷം ഇവര്‍ സ്കൂളിന് അടുത്തുള്ള കടവിലേക്ക് പോകുകയായിരുന്നു. പരീക്ഷാസമയം കഴിഞ്ഞും കുട്ടികള്‍ വീട്ടിലെത്താതിരുന്നതിനെത്തുടര്‍ന്ന് രക്ഷിതാക്കള്‍ സ്കൂളില്‍ വിളിച്ച് അന്വേഷിച്ചു. ഇതേ സമയം രണ്ടു കുട്ടികളുടെ യൂണിഫോം നദിയുടെ കരയില്‍ കിടന്നത് ശ്രദ്ധയില്‍പ്പെട്ട പരിസരവാസികള്‍ പോലീസില്‍ വിവരമറിയിക്കുകയും തുടര്‍ന്ന് പോലീസ് ഫയര്‍ഫോഴ്സിനെയും വിവരമറിയിച്ചു. ഫയര്‍ഫോഴ്സ് നടത്തിയ തിരച്ചിലിലാണ് മൃതദേഹങ്ങള്‍ കണ്ടെത്തിയത്.
അനന്ത കൃഷ്ണന്റെ മൃതദേഹം ഇന്ന് കുന്നിക്കോട് കണ്ണങ്കരയിലെ വീട്ടിൽ പൊതുദർശനത്തിന് വച്ച ശേഷം വൈകിട്ട് ഏഴിന് അമ്മയുടെ കുടുംബവീടായ കൊല്ലം പ്രാക്കുളത്ത് സംസ്കരിക്കും. അജിതകുമാരിയാണ് അന്തന്റെ അമ്മ. ജയകൃഷ്ണൻ സഹോദരനാണ്. ഉഷയാണ് അതുലിന്റെ അമ്മ. ഗോകുൽ സഹോദരനും.
പ്രതികരിക്കാൻ ഇവിടെ എഴുതുക: