മാനന്തവാടി: തിരുനെല്ലി പഞ്ചായത്തില്‍ വന്യമൃഗശല്യം രൂക്ഷമാവുന്നു. ദിവസങ്ങളിലായി വിവിധ പ്രദേശങ്ങളി ല്‍ ഏക്കറുകണക്കിന് നെല്‍കൃഷിയാണ് വന്യമൃഗങ്ങള്‍ നശിപ്പിച്ചത്. തിരുനെല്ലി അപ്പപ്പാറ രണ്ടാം വാര്‍ഡിലെ താരാ കുടുംബശ്രീയുടെ ജെഎ ല്‍ജി ഗ്രൂപ്പായ ശ്രുതിലയം എടയൂരില്‍ കൃഷി ചെയ്ത മൂന്ന് ഏക്കര്‍ നെല്‍കൃഷിയും കാട്ടാന നശിപ്പിച്ചു. ഒരുലക്ഷംരൂപ കുടുംബശ്രീലോണും മുപ്പതിനായിരംരൂപ ബാങ്ക് വായ്പയും എടുത്താണ് മൂന്നേക്കറില്‍ കൃഷി ചെയ്തത്. എന്നാല്‍ വന്യമൃഗശല്യം കാരണം ഇപ്പോള്‍ മൂന്നേക്കര്‍ പാടത്ത് വിളവെടുക്കാന്‍ ഒന്നുമില്ലാത്ത അവസ്ഥയാണ്.
തിരുനെല്ലി പഞ്ചായത്തില്‍ നെല്‍കൃഷിക്ക് കതിരുകൊഴിയല്‍ രോഗവും പട്ടാളപ്പുഴുവിന്റെ ശല്യവും ഇപ്പോള്‍ രൂക്ഷമാണ്. വന്യമൃഗശല്യവും രൂക്ഷമായതോട കര്‍ഷകര്‍ ദുരിതത്തിലായി. പാരമ്പര്യ കൃഷി എന്ന നിലയ്‌ക്കാണ് പലരും നെല്‍കൃഷി ഒഴിവാക്കാതെ മുന്നോട്ട് കൊണ്ടുപോകുന്നത്. ഇതില്‍ ഭൂരിഭാഗം പേരും ലോണെടുത്തും മറ്റുമാണ് കൃഷിയിറക്കുന്നത്. എന്നാല്‍ ഇത്തരത്തിലുള്ള അപ്രതീക്ഷിത തിരിച്ചടികള്‍ കര്‍ഷകരെ ആകെ തളര്‍ത്തുകയാണ്. ഇത്തരത്തില്‍ കൃഷി നശിക്കുന്നത് കാരണം എന്ത് ചെയ്യണമെന്നറിയാതെ പ്രതിസന്ധിയിലായിരിക്കുകയാണ് ഇവിടങ്ങളിലെ കര്‍ഷകര്‍.
വന്യമൃഗ ശല്യം പ്രതിരോധിക്കാനായി സമീപത്ത് ഫെന്‍സിംഗ് സംവിധാനം ഉണ്ടെങ്കിലും അതൊന്നും വേണ്ടത്ര ഫലപ്രദമല്ലെന്നും കര്‍ഷകര്‍ പറയുന്നു. ഫെന്‍സിംഗ് തൂണുകള്‍ ചവിട്ടി തകര്‍ത്തും ഫെന്‍സിംഗിന് മുകളിലേക്ക് മരങ്ങള്‍ പറിച്ചിട്ടുമാണ് ആനകള്‍ കൃഷിയിടത്തിലേക്കും ജനവാസ കേന്ദ്രങ്ങളിലേക്കും എത്തുന്നത്. ഇവയെ കൂടാതെ പന്നി, കുരങ്ങ്, മയില്‍ തുടങ്ങിയവ കൂട്ടത്തോടെ കൃഷിയിടത്തില്‍ എത്തി വ്യാപകമായി കൃഷി നശിപ്പിക്കുന്നത് പതിവാണ്. പതിവായുള്ള വന്യമൃഗ ശല്യവും രോഗബാധയും കാരണം കൃഷിയെ ആശ്രയിച്ചു ഉപജീവനമാര്‍ഗം തേടുന്നവര്‍ക്ക് വന്‍ സാമ്പത്തിക ബാധ്യതയാണ് വരുത്തുന്നത്.
പ്രതികരിക്കാൻ ഇവിടെ എഴുതുക: