കാസര്‍കോട്: കാസര്‍കോടെത്തുന്ന കര്‍ണ്ണാടകയിലെ ശൃംഗേരി മഠാധിപതി ജഗദ്ഗുരു ശ്രീ ഭാരതീതീര്‍ത്ഥ സ്വാമികള്‍ക്ക് വീരോചിതമായ വരവേല്‍പ്പ് നല്‍കാന്‍ ഒരുക്കങ്ങള്‍ പൂര്‍ത്തിയായതായി സംഘാടകസമിതി ഭാരവാഹികള്‍ പത്രസമ്മേളനത്തില്‍ പറഞ്ഞു. ഇന്ന് വൈകിട്ട് അഞ്ച് മണിയോടെ കാസര്‍കോട് മല്ലികാര്‍ജുന ക്ഷേത്ര പരിസരത്തെത്തുന്ന ഭാരതീതീര്‍ത്ഥ സ്വാമികളെയും അദ്ദേഹത്തിന്റെ പ്രധാന ശിഷ്യന്‍ ശ്രീ വിദുശേഖര ഭാരതിയെയും നിരവധി വാഹനങ്ങളുടെ അകമ്പടിയോടെ നുള്ളിപ്പാടി അയ്യപ്പ ഭജന മഠം പരിസരത്തേക്ക് സ്വീകരിച്ച് ആനയിക്കും. നുള്ളിപ്പാടി അയ്യപ്പ ഭജന മഠം പരിസരത്ത് നിന്നും പൂര്‍ണ്ണകുംഭം നല്‍കി വാദ്യഘോഷങ്ങളുടെ അകമ്പടിയോടെ സ്വാമിയെ അണങ്കൂര്‍ ശ്രീ ശാരദാംബാ ഭജന മന്ദിരത്തിലേക്ക് വരവേല്‍ക്കും.
വൈകുന്നേരം ആറ് മണിയോടെ ഭജനമന്ദിരത്തിന് വേണ്ടി നിര്‍മ്മാണം പൂര്‍ത്തിയാക്കിയ മേല്‍ മാട് ഭാരതീതീര്‍ത്ഥ സ്വാമികള്‍ ഭക്തജനങ്ങള്‍ക്ക് സമര്‍പ്പിക്കും. തുടര്‍ന്ന് ധൂളീപൂജ നടക്കും. വേദമൂര്‍ത്തി ഹിരണ്യ വെങ്കടേഷ് ഭട്ട് അഭിവന്ദനാ സമര്‍പ്പണം നടത്തും. പാദപൂജകള്‍ക്ക് ശേഷം സ്വാമി അനുഗ്രഹ പ്രഭാഷണം നടത്തും. തുടര്‍ന്ന് രാത്രി ഏഴു മണിയോടെ പ്രശസ്ത സിനിമ സംഗീത രചയിതാവും സംവിധായകനുമായ കൈതപ്രം ദാമോദരന്‍ നമ്പൂതിരിയും മകനും പിന്നണി ഗായകനുമായ ദീപാങ്കുരനും സംഘവും അവതരിപ്പിക്കുന്ന സംഗീതാര്‍ച്ചന നടക്കും. രാത്രി അന്നദാനവും മഹാപൂജയും ഉണ്ടാകും.
നാളെ രാവിലെ ഒമ്പത് മണിക്ക് ഭാരതീതീര്‍ത്ഥ സ്വാമിയുടെയും വിദുശേഖര ഭാരതിയുടെയും പാദപൂജയും ഭിക്ഷാവന്ദനവും ഉണ്ടാകും. ഭക്തരെ ആശിര്‍വചിച്ചതിന് ശേഷം അദ്ദേഹം മൂഡിബദ്രിയിലേക്ക് മടങ്ങും. തലപ്പാടി വരെ സംഘാടകര്‍ അനുഗമിക്കും. വഴിമദ്ധ്യേ ആരിക്കാടി ഹനുമാന്‍ ക്ഷേത്രത്തിലും ചെറുകാണി സദാശിവക്ഷേത്രത്തിലും ഭാരതീതീര്‍ത്ഥ സ്വാമികള്‍ സന്ദര്‍ശിക്കും. കേരളത്തിന്റെ അതിഥിയായിയെത്തിയ സ്വാമിയുടെ കാസര്‍കോട്ടെ സ്വീകരണ പരിപാടിയിലും രണ്ടു ദിവസത്തെ പൂജാദികര്‍മ്മങ്ങളിലും ദര്‍ശനം നല്‍കുന്നതിനും ജാതിമത ഭേദമെന്യേ മുഴുവന്‍ ആളുകളും സംബന്ധിക്കുമെന്ന് ഭാരവാഹികള്‍ അറിയിച്ചു. നളിന്‍ കുമാര്‍ കട്ടീല്‍ എം.പി, പി.കരുണാകരന്‍ എംപി, ടി ശ്യാംഭട്ട് ഐ എ എസ്, ബിജെപി. ജനറല്‍ സെക്രട്ടറി കെ.സുരേന്ദ്രന്‍ തുടങ്ങിയവര്‍ പരിപാടികളില്‍ സംബന്ധിക്കും. പത്രസമ്മേളനത്തില്‍ സംഘാടക സമിതി ചെയര്‍മാന്‍ സി.വി.പൊതുവാള്‍, രവീശ തന്ത്രി കുണ്ടാര്‍, എ.സതീഷ്, കെ.സൂരജ് ഷെട്ടി, കെ.ശങ്കര നായക്ക്, വൈ.ധര്‍മ്മേന്ദ്ര ആചാര്യ, ബി.ജഗദീഷ് എന്നിവര്‍ പത്രസമ്മേളനത്തില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: