കല്‍പ്പറ്റ: നിര്‍ദിഷ്ട നഞ്ചന്‍ഗോഡ്-ബത്തേരി-നിലമ്പൂര്‍ റെയില്‍വേയുമായി ബന്ധപ്പെടുത്തി യുഡിഎഫ്, എന്‍ഡിഎ ജില്ലാ ഘടകങ്ങള്‍ നാളെ(18)വെവേറെ നടത്താന്‍ തീരുമാനിച്ച വയനാട് ഹര്‍ത്താല്‍ ജനങ്ങളെ തെറ്റിദ്ധരിപ്പിച്ച് രാഷ്ട്രീയ മുതലെടുപ്പു നടത്താനുള്ള തന്ത്രത്തിന്റെ ഭാഗമാണെന്ന് എല്‍ഡിഎഫ് ജില്ലാ കണ്‍വീനര്‍ കെ.വി. മോഹനന്‍, ഘടകകക്ഷി നേതാക്കളായ വിജയന്‍ ചെറുകര, എന്‍.കെ. മുഹമ്മദുകുട്ടി, സി.എന്‍. ശിവരാമന്‍, കെ.പി. ശശികുമാര്‍ എന്നിവര്‍ ആരോപിച്ചു. യുഡിഎഫിന്റെയും എന്‍ഡിഎയുടെയും കുതന്ത്രം തിരിച്ചറിഞ്ഞ് ഹര്‍ത്താല്‍ പരാജയപ്പെടുത്താന്‍ മുഴുവന്‍ ജനാധിപത്യവിശ്വാസികളും ഒറ്റക്കെട്ടായി രംഗത്തിറങ്ങണമെന്ന് അവര്‍ ആവശ്യപ്പെട്ടു.
അന്തിമ സര്‍വേയ്‌ക്ക് പണം അനുവദിക്കാതെയും കര്‍ണാടക സര്‍ക്കാരില്‍ സമ്മര്‍ദം ചെലുത്താതെയും നഞ്ചന്‍ഗോഡ്-നിലമ്പൂര്‍ റെയില്‍വേ പദ്ധതി അട്ടിമറിക്കാന്‍ എല്‍ഡിഎഫ് സര്‍ക്കാര്‍ നീക്കം നടത്തുന്നുവെന്ന കല്ലുവച്ച നുണയാണ് യുഡിഎഫ്, എന്‍ഡിഎ നേതാക്കള്‍ പ്രചരിപ്പിക്കുന്നത്. സര്‍വേ ജോലികള്‍ക്കായി ഡിഎംആര്‍സിക്ക് കൈമാറുന്നതിനുള്ള പണം സര്‍ക്കാര്‍ നേരത്തേ അനുവദിച്ചതാണ്. വയനാട് റെയില്‍വേയുമായി ബന്ധപ്പെട്ട് ജില്ലയിലെ എല്‍ഡിഎഫ് നേതാക്കളും എംഎല്‍എമാരായ സി.കെ. ശശീന്ദ്രന്‍, ഒ.ആര്‍. കേളു എന്നിവരും ഇക്കഴിഞ്ഞ 11ന് തിരുവനന്തപുരത്ത് മുഖ്യമന്ത്രി പിണറായി വിജയനുമായി ചര്‍ച്ച നടത്തുകയുണ്ടായിരുന്നു. ജനങ്ങളുടെ ആശങ്ക അറിയിച്ച എല്‍ഡിഎഫ് നേതാക്കള്‍ക്കും എംഎല്‍എമാര്‍ക്കും പാത യാഥാര്‍ഥ്യമാക്കുന്നതിനുള്ള തടസങ്ങള്‍ നീക്കുന്നതിന് കര്‍ണാടക സര്‍ക്കാരുമായി ചര്‍ച്ച നടത്താന്‍ മന്ത്രിസഭാ ഉപസമിതിയെ അയയ്‌ക്കുമെന്ന് മുഖ്യമന്ത്രി ഉറപ്പുനല്‍കിയതാണ്. ഗതാഗതമന്ത്രി തോമസ് ചാണ്ടി, റെയില്‍വേ ചുമതലയുള്ള സംസ്ഥാന മന്ത്രി ജി. സുധാകരന്‍ എന്നിവരും ചര്‍ച്ചയില്‍ പങ്കെടുത്തിരുന്നു.
നഞ്ചന്‍ഗോഡ്-നിലമ്പൂര്‍ പാത നിര്‍മാണത്തില്‍ കേരളത്തിനല്ല, കര്‍ണാടകയ്‌ക്കാണ് ഇപ്പോള്‍ താത്പര്യരാഹിത്യം. കേരളത്തില്‍ എല്‍ഡിഎഫ് സര്‍ക്കാര്‍ അധികാരത്തില്‍ വന്നതിനുശേഷമാണ് കോണ്‍ഗ്രസ് ഭരണത്തിലുള്ള കര്‍ണാടകയ്‌ക്ക് റെയില്‍വേ വിഷയത്തില്‍ താത്പര്യം കുറഞ്ഞത്. ഉമ്മന്‍ചാണ്ടി മുഖ്യമന്ത്രിയായിരുന്നപ്പോള്‍ കാട്ടിയിരുന്ന താത്പര്യം കര്‍ണാടകയ്‌ക്ക് ഇപ്പോഴില്ല. കര്‍ണാടകയിലെയും കേരളത്തിലെയും കോണ്‍ഗ്രസ് നേതാക്കളുടെ ഗൂഢാലോചനയാണ് ഇതിനു പിന്നില്‍. റെയില്‍വേ പദ്ധതി അട്ടിമറിക്കുന്നതിനു യഥാര്‍ഥത്തില്‍ ചരടുവലിക്കുന്നത് എം.ഐ. ഷാനവാസ് എം.പി ഉള്‍പ്പെടെ കോണ്‍ഗ്രസ്-യുഡിഎഫ് നേതാക്കളാണ്. ഇതിനു രാഷ്‌ട്രീയം ജനങ്ങള്‍ തിരിച്ചറിയുന്നുണ്ട്
പ്രതികരിക്കാൻ ഇവിടെ എഴുതുക: