നിലമ്പൂര്‍: വരള്‍ച്ച രൂക്ഷമായതിനെ തുടര്‍ന്ന് കാഞ്ഞിരപ്പുഴയെ ആശ്രയിച്ച് പ്രവര്‍ത്തിക്കുന്ന ജില്ലയിലെ ആദ്യത്തെ ചെറുകിട വൈദ്യുതി പദ്ധതിയായ ആഢ്യന്‍പാറ ജല വൈദ്യുത പദ്ധതി നിര്‍ത്തി. ഇതോടെ മലയോര മേഖലയില്‍ വൈദ്യുതി നിയന്ത്രണം അനിവാര്യമായിരിക്കുകയാണ്. ഇനി തുടര്‍ച്ചയായുള്ള മഴ ലഭിച്ചാല്‍ മാത്രമേ വൈദ്യുതി ഉത്പാദിക്കാന്‍ സാധിക്കൂ. വൈദ്യുതി ഉത്പാദിപ്പിക്കാനുള്ള ജലം ലഭിക്കുന്നില്ലെന്ന് കെഎസ്ഇബി അധികൃതര്‍ പറഞ്ഞു. ആഢ്യന്‍പാറ ചെറുകിട ജലവൈദ്യുത പദ്ധതി 2015 ജൂണിലാണ് പ്രവര്‍ത്തനം ആരംഭിച്ചത്. ഡിസംബറില്‍ ജലലഭ്യത കുറഞ്ഞതോടെ പ്രവര്‍ത്തനം നിര്‍ത്തുകയും 2016 ജൂണില്‍ വീണ്ടും പുനരാരംഭിക്കുകയും ചെയ്തിരുന്നു.
ഒന്നര മെഗാവാട്ട് ശേഷിയുള്ള രണ്ടും അര മെഗാവാട്ട് ശേഷിയുള്ള ഒരു ജനറേറ്ററുമാണ് പദ്ധതിയിലുള്ളത്. ഇതില്‍ അര മെഗാവാട്ടിന്റെ ജനറേറ്റര്‍ മാത്രമാണ് മാസങ്ങളായി പ്രവര്‍ത്തിച്ചിരുന്നത്. ഇതില്‍ നിന്നും 0.35 മെഗാവാട്ട് വൈദ്യുതി മാത്രമേ ഉത്പാദിപ്പിക്കാനായൊള്ളൂ. രാത്രി രണ്ടും മൂന്നും മണിക്കൂറുകള്‍ നിര്‍ത്തിയിട്ടാണ് പകല്‍ സമയങ്ങളില്‍ ജനറേറ്റര്‍ പ്രവര്‍ത്തിച്ചിരുന്നത്.
കഴിഞ്ഞ വര്‍ഷം ഡിസംബര്‍ വരെ വൈദ്യുതി ഉദ്പാദനം ചെറിയ തോതിലെങ്കിലും നടന്നിരുന്നു. ജലത്തെ മാത്രം ആശ്രയിക്കുന്ന ഇത്തരം പദ്ധതികള്‍ക്ക് മഴക്കുറവ് കനത്ത തിരിച്ചടിയായിരിക്കുകയാണ് നിലമ്പൂര്‍ മേഖലയിലെ വൈദ്യുതി പ്രതിസന്ധിക്ക് ഒരു പരിധിവരെ പരിഹാരം കാണാനാകുമെന്ന പ്രതീക്ഷയിലായിരുന്നു പദ്ധതി തുടക്കം കുറിച്ചത്.
പ്രതികരിക്കാൻ ഇവിടെ എഴുതുക: