പാലക്കാട്: അടിസ്ഥാന കുടിവെള്ള, ശൗചാലയ, പാര്‍പ്പിട സൗകര്യങ്ങളില്ലാതെ പതിനെട്ടു വീടുകളിലായി 24 വനവാസി കുടുംബങ്ങള്‍ മുതലമട പഞ്ചായത്തിലെ കള്ളിയമ്പാറ ആദിവാസികോളനിയില്‍ ഉണ്ടെന്ന് ചിറ്റൂര്‍ ഗവ.കോളജ് എന്‍. എസ്. എസ്. യൂണിറ്റുകളും കൊല്ലങ്കോട് ആശ്രയം റൂറല്‍ ഡെവലപ്‌മെന്റ് സൊസൈറ്റിയും സംയുക്തമായി നടത്തിയ പഠനത്തില്‍ കണ്ടെത്തി.
നീറ്റ ജെലാറ്റിന്‍ കമ്പനി മാലിന്യപ്രശ്‌നവുമായി ബന്ധപ്പെട്ട മുതലമട പഞ്ചായത്തിലെ പതിനേഴാം വാര്‍ഡിലെ കള്ളിയാമ്പാറ കോളനിയിലെ കുടുംബങ്ങളാണ് അടിസ്ഥാന സൗകര്യങ്ങളില്ലാതെ വിഷമിക്കുന്നത് . സമീപത്തുള്ള സ്വകാര്യ വ്യക്തിയുടെ മാന്തോപ്പില്‍ വര്‍ഷങ്ങളായി രാസജൈവ മാലിന്യങ്ങള്‍ നിക്ഷേപിച്ചതിന്റെ ഫലമായി കോളനിനിവാസികളുടെ ഏക കുടിവെള്ള സ്രോതസ്സായ കിണര്‍ ഇപ്പോഴും മലിനമായിത്തന്നെ തുടരുകയാണ്. ജില്ലാ കളക്ടര്‍ ഉള്‍പ്പെടെയുള്ളവര്‍ സഥലത്തെത്തി ജില്ലാ ഭരണകൂടത്തിന്റെ സഹായവും പ്രഖ്യാപിച്ചെങ്കിലും ഒരു മെഡിക്കല്‍ ക്യാമ്പ് നടന്നതല്ലാതെ മറ്റൊന്നും ഇവര്‍ക്ക് കിട്ടിയില്ലെന്ന് കോളനി മൂപ്പന്‍ വേലായുധന്‍ പറഞ്ഞു.
കിഡ്‌നിക്ക് രോഗം ബാധിച്ച് ഒരു വ്യക്തി മരണപ്പെട്ടിരുന്നു. മാധ്യമപ്രവര്‍ത്തകരുടെ ഇടപെടലിനെ തുടര്‍ന്ന് പഞ്ചായത്തിന്റെ നേതൃത്വത്തില്‍ നടപ്പാക്കപ്പെട്ട ശുദ്ധജലവിതരണം മഴ വന്നതോടെ നിര്‍ത്തിയതായും പഠനത്തില്‍ കണ്ടെത്തി. മറ്റുമാര്‍ഗങ്ങളില്ലാത്തതിനാല്‍ മലിനമായ കിണര്‍ വെള്ളം തന്നെയാണ് ഇവര്‍ ഇപ്പോഴും ഉപയോഗിച്ച് വരുന്നത് . അതിനാല്‍ത്തന്നെ കുട്ടികളിലും മുതിര്‍ന്നവരിലും ചൊറിഞ്ഞു പൊട്ടുന്ന ത്വക്ക് രോഗങ്ങളും വൃക്ക രോഗങ്ങളുംകൂടി വരുന്നതായും കോളനിവാസികള്‍ പറഞ്ഞു.
സമീപ തോട്ടത്തിലെ ആയിരക്കണക്കിന് ടണ്‍ വരുന്ന രാസ മാലിന്യം ഇപ്പോഴും നീക്കംചെയ്യാത്തതിനാല്‍ ഭാവിയില്‍ ഗുരുതരമായ ആരോഗ്യസാമൂഹ്യ പ്രശ്‌നങ്ങള്‍ ഈ സമൂഹം നേരിടേണ്ടി വരുമെന്നതിനാല്‍ പഞ്ചായത്തും സര്‍ക്കാരും അടിയന്തിരമായി ഇടപെടണമെന്ന് എന്‍. എസ. എസ് വളണ്ടിയര്‍ സമൂഹം ആവശ്യപ്പെട്ടു.
മുതലമട പഞ്ചായത്ത് ഒ. ഡി. എഫ്. പ്രഖ്യാപനം നടത്തിയിരുന്നെങ്കിലും കേവലം മൂന്നോ നാലോ വീടുകളില്‍ മാത്രമാണ് ശൗചാലയങ്ങള്‍ കാണുവാന്‍ സാധിച്ചത്. അതും ഓല കൊണ്ട് മറച്ചവ. മറ്റു വീട്ടുകാരും മറ്റും ഇപ്പോഴും പഴയ തുറസ്സായ സ്ഥലങ്ങളില്‍ തത്തന്നെയാണ് മല മൂത്ര വിസര്‍ജനം നടത്തുന്നതെന്ന ജെഞെട്ടിപ്പിക്കുന്ന വിവരവും പഠനത്തില്‍ കണ്ടെത്തി.
അതായത് ഇവിടെയുള്ള 18 വീടുകളിലും സുരക്ഷിതമായ കക്കൂസ് ഇല്ലാതെ തന്നെ പഞ്ചായത്ത് സംപൂര്‍ണ ഓ.ഡി എഫ് പ്രഖ്യാപനം നടത്തി സര്‍ക്കാരിനെ കബളിപ്പിച്ചിരിക്കുകയാണ് എന്ന് കോളനി നിവാസികള്‍ പറഞ്ഞു. കൂടാതെ പൊട്ടിപ്പൊളിഞ്ഞ വീടുകളിലാണ് മിക്ക കുടുംബങ്ങളും താമസിക്കുന്നത് എന്നും പഠനത്തില്‍ കണ്ടെത്തിയിട്ടുണ്ട്. എങ്കിലും തങ്ങളുടെ നിലവിലുള്ള വീടും പരിസരവും കോളനി നിവാസികള്‍ വളരെ വൃത്തിയാക്കി സൂക്ഷിച്ചു വച്ചിരിക്കുന്നത് പൊതു സമൂഹത്തിനു മാതൃകയാണെന്ന് പഠനത്തിനായി നേതൃത്വം നല്‍കിയ ചിറ്റൂര്‍ കോളേജ് എന്‍. എസ്. എസ്. യൂണിറ്റുകള്‍ക്കു വേണ്ടി പ്രോഗ്രാം ഓഫീസര്‍മാരായ കെ. പ്രദീഷ്, സി. ജയന്തി എന്നിവര്‍ പറഞ്ഞു.
പഠനത്തിനുള്ള സഹായ സഹകരണങ്ങള്‍ ആശ്രയം റൂറല്‍ ഡെവലപ്‌മെന്റ് സൊസൈറ്റിയുടെ എസ്. ഗുരുവായൂരപ്പന്‍, ആര്‍. സന്തോഷ്, ആര്‍. അര്‍ച്ചന എന്നിവരുടെ നേതൃത്വത്തില്‍ നല്‍കി. പഠന റിപ്പോര്‍ട്ട് ബന്ധപ്പെട്ട അധികാരികള്‍ക്ക് നല്‍കുമെന്ന് എന്‍. എസ് പ്രോഗ്രാം ഓഫീസര്‍ അറിയിച്ചു.
പ്രതികരിക്കാൻ ഇവിടെ എഴുതുക: