പത്തനംതിട്ട: ഇരവിപേരൂരില്‍ ടിപ്പര്‍ ലോറികള്‍ നിരത്തിലൂടെ ചീറിപ്പായുന്നത് കുട്ടികള്‍ക്കും കാല്‍നടയാത്രക്കാര്‍ക്കും ഭീഷണിയാകുന്നു. ടികെ റോഡിലെ പ്രധാന ജംഗ്ഷനുകളിലൊന്നായ ഇരവിപേരൂരില്‍ റോഡ് മുറിച്ചുകടക്കാന്‍ തന്നെ ബുദ്ധിമുട്ടുമ്പോഴാണ് ടിപ്പര്‍ ലോറികള്‍ സ്‌കൂള്‍ സമയങ്ങളിലും ഓടുന്നത്.
റാന്നി റോഡ് ടികെ റോഡുമായി സംഗമിക്കുന്ന ജംഗ്ഷനിലാണ് സെന്റ് ജോണ്‍സ് സ്‌കൂളിലെ കുട്ടികളുമെത്തുന്നത്. സ്‌കൂള്‍ സമയങ്ങളില്‍ കുട്ടികള്‍ ഏറെ ബുദ്ധിമുട്ടിയാണ് റോഡ് മുറിച്ചുകടക്കുന്നത്.
അധ്യയന വര്‍ഷം ആരംഭിച്ചപ്പോള്‍ ട്രാഫിക് പോലീസിന്റെ സാന്നിധ്യം സ്‌കൂള്‍ സമയങ്ങളില്‍ ജംഗ്ഷനില്‍ ഉണ്ടായിരുന്നെങ്കിലും പിന്നീട് ഇതും നിലയ്‌ക്കുകയായിരുന്നു. റാന്നി റോഡില്‍ നിന്നും ടികെ റോഡിലേക്ക് പ്രവേശിക്കുമ്പോള്‍ പലപ്പോഴും ഹമ്പ് ചാടി അമിതമായി ലോഡ് കയറ്റിവരുന്ന ടിപ്പര്‍ ലോറിയില്‍ നിന്നും മെറ്റലും മണ്ണുമൊക്കെ റോഡിലേക്ക് തെറിച്ചുവീഴുന്നതും പതിവാണ്. ഇത് പലപ്പോഴും കാല്‍നടയാത്രക്കാര്‍ക്കും ഭീഷണിയാകുന്നു.
ജംഗ്ഷനിലെ തിരക്ക് ഒഴിവാക്കാന്‍ ബസ് സ്റ്റോപ്പുകള്‍ പുനഃക്രമീകരിച്ചെങ്കിലും കോഴഞ്ചേരി, തിരുവല്ല റൂട്ടുകളിലേക്കുള്ള ബസുകള്‍ പഴയ സ്റ്റോപ്പുകളില്‍ തന്നെ നിര്‍ത്തിയാണ് ആളുകളെ കയറ്റുകയും ഇറക്കുകയും ചെയ്യുന്നത്. ഇത് പലപ്പോഴും ഗതാഗതക്കുരുക്കിനും ഇടയാക്കുന്നു. സ്‌കൂള്‍ സമയങ്ങളിലെങ്കിലും റോഡിലെ തിരക്ക് ഒഴിവാക്കാനും ടിപ്പര്‍ ലോറികളുടെയും മറ്റ് വാഹനങ്ങളുടെയും അമിതവേഗം നിയന്ത്രിക്കാനും നടപടികളുണ്ടാകണം. പലപ്പോഴും റോഡ് മുറിച്ചുകടക്കാന്‍ ശ്രമിക്കുന്ന വിദ്യാര്‍ഥികളെ ഓട്ടോറിക്ഷ ഡ്രൈവര്‍മാരും നാട്ടുകാരും സഹായിച്ചാണ് റോഡിന്റെ മറുവശത്ത് എത്തിക്കാറുള്ളത്.
സ്‌കൂള്‍ സമയങ്ങളില്‍ ടിപ്പര്‍ ലോറികളുടെ സഞ്ചാരം നിര്‍ത്തലാക്കാനും ജംഗ്ഷനില്‍ ട്രാഫിക് പോലീസിന്റെ സഹായം ഉണ്ടാകാനും അധികൃതര്‍ നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.
പ്രതികരിക്കാൻ ഇവിടെ എഴുതുക: