ഇരിട്ടി: വെടിവെച്ചു പിടിച്ച രണ്ടു കൂരമാനുകളുമായി ഒരാളെ ഫോറസ്റ്റ് സംഘം പിടികൂടി അറസ്റ്റുചെയ്തു. ഇയാള്‍ക്ക് ഒപ്പമുണ്ടായിരുന്ന ഓടി രക്ഷപ്പെട്ട രണ്ടു പ്രതികള്‍ക്കായി തിരച്ചില്‍ തുടരുന്നു. കീഴ്പള്ളി ചതിരൂര്‍ സ്വദേശി ടോമി ജോസഫ്(47) ആണ് പിടിയിലായത്. ഇയാളെ കീഴ്പള്ളി ഫോറസ്റ്റര്‍ രാജന്റെ നേതൃത്വത്തിലുള്ള ഫോറസ്റ്റ് സംഘം അറസ്റ്റ് ചെയ്തു. ടോമിയെ ചോദ്യം ചെയ്തതില്‍ നിന്നുമാണ് കൂടെ ഉണ്ടായിരുന്നവരെക്കുറിച്ചു വിവരം ലഭിച്ചത്. ചതിരൂര്‍ സ്വദേശികളായ വെന്നേരി ബേബി, സന്തോഷ് എന്നിവര്‍ക്ക് വേണ്ടി തിരച്ചില്‍ നടത്തി വരുന്നു.
ശനിയാഴ്ച രാത്രി 10മണിയോടെ കീഴ്പള്ളി ചതിരൂര്‍ നീലായ്മലയില്‍ പെട്രോളിങ്ങിനിടെ വെടിയൊച്ച കേട്ട ഫോറസ്റ്റര്‍ രാജന്റെ നേതൃത്വത്തിലുള്ള സംഘം ഒളിവില്‍ മറഞ്ഞുനിന്ന് വീ ക്ഷിക്കുകയായിരുന്നു. ഇതിനിടെ മൂന്നുപേര്‍ വരുന്നത് കണ്ടു ഇവരെ പിടികൂടാന്‍ ശ്രമിക്കവേ ഇവര്‍ അടുത്തുള്ള തോട്ടില്‍ ചാടുകയായിരുന്നു. തോട്ടിലെ കല്ലില്‍ത്തട്ടി മുറിവേറ്റ ടോമിയെ ഫോറസ്റ്റ് സംഘം പിടികൂടി. എന്നാല്‍ ഒപ്പമുണ്ടായിരുന്നവര്‍ ഓടി രക്ഷപ്പെട്ടു. മുറിവേറ്റ ടോമിയെ പ്രഥമ ശുശ്രൂഷ നല്‍കിയ ശേഷം അറസ്റ്റു ചെയ്ത് കൂത്തുപറമ്പ് കോടതിയില്‍ ഹാജരാക്കി റിമാന്‍ഡ് ചെയ്തു. ഇയാളില്‍ നിന്നും ഒരു തോക്കിന്റെ ഭാഗങ്ങളും ബാഗിനകത്ത് നിന്നും ഒരു കത്തി, ഒരു ഹെഡ് ലൈറ്റ് എന്നിവയും പിടികൂടി. തോട്ടില്‍ ചാടിയപ്പോള്‍ പൊട്ടിയ തോക്കിന്റെ ഭാഗമാണ് ഇതെന്നും ഇതിന്റെ ബാക്കി ഭാഗം ഓടിപ്പോയവരുടെ കയ്യിലാണ് ഉള്ളതെന്നും സംശയിക്കുന്നു.
പ്രതികരിക്കാൻ ഇവിടെ എഴുതുക: