കൊച്ചി: ഇടപ്പള്ളിക്കാര്‍ ഇന്നലെ ഉറക്കമുണര്‍ന്നത് ദുരന്തവാര്‍ത്തയിലേക്ക്. പുലര്‍ച്ചെ നാലരയോടെ പ്രശാന്തി നഗറിലെ റെല്‍കോണ്‍ റിട്രീറ്റ് അപ്പാര്‍ട്ട്‌മെന്റില്‍ ഗ്യാസ് സിലിണ്ടര്‍ പൊട്ടിത്തെറിച്ച് അമ്മയും മകളും മരിച്ചത് നാടിന് വേദനയായി. സംഭവത്തില്‍ ദുരുഹതയുണ്ടെന്ന് ആദ്യം ആരോപണമുയര്‍ന്നിരുന്നെങ്കിലും ആത്മഹത്യയാണെന്ന് പോലീസ് സ്ഥിരീകരിച്ചു.
അഞ്ച് വര്‍ഷത്തിലധികമായി കുടുംബം ഇവിടെ താമസിച്ച് വരികയായിരുന്നു. എന്നാല്‍ മറ്റ് താമസക്കാരോട് ഇവര്‍ വലിയ അടുപ്പം പുലര്‍ത്തിയിരുന്നില്ല. സ്‌ഫോടനത്തിന്റെ ശബ്ദം കേട്ടാണ് അപ്പാര്‍ട്ട്‌മെന്റിലെ മറ്റ് താമസക്കാര്‍ ഉണര്‍ന്നത്. ഉടന്‍ ശബ്ദം കേട്ട അഞ്ചാം നിലയിലെത്തിയെങ്കിലും വാതില്‍ അകത്ത് നിന്നും പൂട്ടിയിട്ടിരിക്കുകയായിരുന്നെന്ന് താമസക്കാരനായ വര്‍ഗ്ഗീസ് പറഞ്ഞു.
തുറക്കാന്‍ ശ്രമിക്കുന്നതിനിടെ വീണ്ടും സ്‌ഫോടനമുണ്ടാവുകയും ഒരാള്‍ക്ക് പരിക്കേല്‍ക്കുകയും ചെയ്തു. മൂന്ന് കിലോമീറ്ററോളം ചുറ്റളവില്‍ ശബ്ദം കേട്ടതായി നാട്ടുകാര്‍ പറയുന്നു. ഏതാനും മാസങ്ങള്‍ക്ക് മുന്‍പ് ഇവര്‍ തമ്മില്‍ വഴക്ക് നടന്നപ്പോള്‍ മറ്റ് താമസക്കാര്‍ പരാതിപ്പെട്ടിരുന്നു. ഇവര്‍ നിയമപ്രകാരം വിവാഹിതരായിരുന്നില്ലെന്നും അപ്പോഴാണ് അറിയുന്നതും. പരാതിയെ തുടര്‍ന്ന് വീട് ഒഴിയണമെന്ന് ആവശ്യപ്പെട്ടിരുന്നെങ്കിലും പിന്നീട് ഉടമ നിര്‍ബന്ധം പിടിച്ചില്ല.
ഉച്ചയോടെ പാലക്കാട് നിന്നും വേണിയുടെ ബന്ധുക്കള്‍ കൊച്ചിയില്‍ എത്തിചേര്‍ന്നു. മൃതദേഹങ്ങള്‍ പോസ്റ്റ് മോര്‍ട്ടത്തിനായി ആലപ്പുഴ മെഡിക്കല്‍ കോളേജിലേക്ക് കൊണ്ടുപോയി.
പ്രതികരിക്കാൻ ഇവിടെ എഴുതുക: