ഒരുക്കുയൊരുക്കി മായ റെക്കോര്‍ഡിലേക്കുള്ള ഒരുക്കത്തിലാണ്. പെരുമ്പാവൂരില്‍ ഒരു ചെറിയ ബ്യൂട്ടി പാര്‍ലറില്‍ തുടങ്ങിയതാണ് മായ ജേക്കബ്. 28 വര്‍ഷം ഈ രംഗത്ത്. മായയുടെ വിരല്‍ സ്പര്‍ശമേറ്റ് ഒരുങ്ങിയവരെല്ലാം സന്തോഷമേ പറഞ്ഞിട്ടുള്ളു. അങ്ങനെയിരിക്കെയാണ് മത്സരിക്കാന്‍ ഒരു വേദികിട്ടിയത്.
മായ അവിടെയും കസറി. കഴിഞ്ഞദിവസം കൊച്ചിയില്‍ നടന്ന സംസ്ഥാനതല മത്സരത്തില്‍ രണ്ടു മണിക്കൂറിനുള്ളില്‍ ഹിന്ദു, ക്രിസ്ത്യന്‍, മുസ്‌ലിം വധുക്കളെ അണിയിച്ചൊരുക്കി ഓവറോള്‍ ചാമ്പ്യന്‍ഷിപ്പ് നേടിയതാണ് മായ ജേക്കബിന്റെ ചമയവഴികളിലെ പൊന്‍തൂവല്‍. ‘പ്രിയങ്ക’ എന്ന പേരിലുള്ള തന്റെ ബ്യൂട്ടി പാര്‍ലര്‍ ശൃംഖല കേരളത്തിന്റെ വിവിധ ഭാഗങ്ങളിലേക്കു കൊണ്ടുപോകാനുള്ള പദ്ധതിയിലാണ് മായ ഇപ്പോള്‍.
പെരുമ്പാവൂര്‍ തെറ്റിക്കോട്ട് ലെയ്ന്‍ വടക്കുംചേരി വീട്ടില്‍ മായ ജേക്കബ് കേരളത്തിലെ ഏറ്റവും പ്രശസ്തയായ ബ്യൂട്ടീഷ്യന്മാരില്‍ ഒരാളാണ്. പ്രിയങ്ക ബ്യൂട്ടി പാര്‍ലറിന് ഇപ്പോള്‍ നാലു ബ്രാഞ്ചുകള്‍. കോഴിക്കോട്, എറണാകുളം, തൃശൂര്‍ എന്നിവിടങ്ങളിലായി ആറു ശാഖകള്‍ കൂടി തുറക്കാനാണ് ആലോചന. 4000 സ്‌ക്വര്‍ ഫീറ്റ് വിസ്തൃതിയുള്ളതാണ് പ്രിയങ്കയുടെ ഓരോ ശാഖകളും.
ബ്യൂട്ടി, ഹെയര്‍സ്റ്റൈല്‍, മെയ്‌ക്കപ്പ് രംഗത്ത് സമാനതകളില്ലാത്ത മികവും നേട്ടവും അംഗീകാരവും പുരസ്‌കാരങ്ങളുമാണ് മായ ജേക്കബിനെ ഇതിനോടകം തേടിയെത്തിയത്.
കേരള ബ്യൂട്ടി പാര്‍ലര്‍ ഓണേഴ്‌സ് അസോസിയേഷന്‍ കൊച്ചിയില്‍ സംഘടിപ്പിച്ച സംസ്ഥാനതല മെഗാ ബ്രൈഡല്‍ മെയ്‌ക്കപ്പ് മത്സരത്തില്‍ ഓവറോള്‍ കിരീടം നേടിയതാണ് ഇതില്‍ ഏറ്റവും അവസാനത്തേത്. മായയുടെ മെയ്‌ക്കപ്പ് കഴിവുകള്‍ അന്നവിടെ ഏറെ പ്രശംസ നേടി. കോയമ്പത്തൂരില്‍ ത്രീജി യൂണിവേഴ്‌സിറ്റിയുടെ അഭിമാനാര്‍ഹമായ പുരസ്‌കാരം ഏതാനും നാള്‍ മുന്‍പു മായയ്‌ക്കു ലഭിച്ചിരുന്നു.
മൂന്നുവര്‍ഷത്തിനിടെ രണ്ടായിരത്തിലേറെ ബ്രൈഡല്‍ മെയ്‌ക്കപ്പുകളാണ് മായ ചെയ്തത്. ഇതൊരുപക്ഷേ സംസ്ഥാനത്തെ റെക്കോര്‍ഡായിരിക്കും. പഴയകാല മെയ്‌ക്കപ്പ് രീതികളില്‍ നിന്നു ക്രമേണ മാറി അത്യാധുനിക സാങ്കേതികവിദ്യകളും രീതികളും വിദേശമാതൃകകളും ഉപയോഗപ്പെടുത്തിയാണ് മായ ഇപ്പോള്‍ അലങ്കാരമേഖലയില്‍ ശ്രദ്ധ പതിപ്പിക്കുന്നത്. ഗുണനിലവാരത്തിന്റെ കാര്യത്തില്‍ ഒട്ടും വിട്ടുവീഴ്ചയില്ല; പ്രവൃത്തിയിലെ വേഗത മറ്റൊരു റെക്കോര്‍ഡും. 
ചലച്ചിത്ര- വ്യവസായ- സാമൂഹ്യ രംഗത്തു നിന്നടക്കം ഒട്ടേറെ പ്രമുഖരും പ്രശസ്തരും മായയുടെ സേവനം ഉപയോഗപ്പെടുത്തുന്നു. മായയുടെ സേവനം തേടുന്ന സെലിബ്രിറ്റികളുടെ നീണ്ട പട്ടിക തന്നെയുണ്ട്. കേരളത്തില്‍ ബ്യൂട്ടി പാര്‍ലര്‍ വ്യവസായ മേഖലയില്‍ ഏറെ ബഹുമാനിക്കപ്പെടുന്ന വ്യക്തിത്വമാണിവര്‍. മായയുടെ ശിഷ്യത്വത്തില്‍ ബ്യൂട്ടി- മെയ്‌ക്കപ്പ്- ഹെയര്‍ സ്റ്റൈല്‍ പരിശീലനം നേടിയ നൂറുകണക്കിനു പേര്‍ ലോകത്തിന്റെ വിവിധ ഭാഗങ്ങളില്‍ ഈ രംഗത്തു പ്രവര്‍ത്തിക്കുന്നു. മെയ്‌ക്കപ്പ് രംഗത്ത് ലോകോത്തര നിലവാരമുള്ള മികച്ച പരിശീലനമാണു മായ ചെറുപ്പക്കാര്‍ക്കു നല്‍കുന്നത്. ഒട്ടേറെ സ്ഥലങ്ങളില്‍ ബ്യൂട്ടി, മെയ്‌ക്കപ്പ് വിഷയത്തില്‍ ക്ലാസുകള്‍ നയിക്കാനും മാര്‍ഗനിര്‍ദേശങ്ങള്‍ നല്‍കാനും മായ സമയം കണ്ടെത്തുന്നുണ്ട്.
വ്യത്യസ്തമായ ഈ ബിസിനസ് രംഗത്ത് ഭര്‍ത്താവ് ജേക്കബിന്റെ പൂര്‍ണപിന്തുണയോടെ ഉയരങ്ങളിലേക്കു കയറുന്ന മായയുടെ മക്കളായ റെമന്‍ ജേക്കബ്, അമ്മു ജേക്കബ് എന്നിവരും ഇതേ പാതയില്‍ത്തന്നെയാണ് യാത്ര. കേരള ബ്യൂട്ടി പാര്‍ലര്‍ ഓണേഴ്‌സ് അസോസിയേഷനില്‍ സജീവാംഗമായ മായ സംഘടനാരംഗത്തും ശ്രദ്ധ പതിപ്പിക്കുന്നു. ഒപ്പം ഒട്ടേറെ സാമൂഹ്യപ്രവര്‍ത്തനങ്ങളിലും ജീവകാരുണ്യ സംരംഭങ്ങളിലും ഏര്‍പ്പെടുന്നു.
പ്രതികരിക്കാൻ ഇവിടെ എഴുതുക: