ബാല്യം

പൂത്തുലഞ്ഞാടുന്ന മൂവാണ്ടന്‍കൊമ്പത്ത്

ഓടിക്കളിക്കുന്നൊരണ്ണാന്‍കുഞ്ഞും

ചില്‍ചിലെ ശബ്ദിച്ചുകൊണ്ടോടുമവനെന്റെ

ഓര്‍മയിലെന്നും പറന്നുവന്നു

മധുരിക്കും മാങ്ങതന്‍ കാമ്പുകള്‍ ആര്‍ത്തിയാല്‍

തൂങ്ങിക്കിടന്നവന്‍ തിന്നുതീര്‍ക്കും

മാങ്ങയെകൊതിയോടെ നോക്കിച്ചിരിക്കുന്ന

കുട്ടികള്‍ക്കെപ്പോഴോ വീണുകിട്ടും

കാറ്റുവീശുമ്പോഴായി ആര്‍ത്തുവന്നീടുന്ന

സംഘങ്ങള്‍ക്കൊട്ടേറെ മാങ്ങകിട്ടും

മാമ്പഴക്കാലംപോയ് മഴയങ്ങുവന്നീടെ

സങ്കടമായിടുമെല്ലാവര്‍ക്കും

പിന്നെയും കാത്തിരുന്നീടുമക്കാലത്തെ

കാത്തിരിപ്പിന്നൊരു സുഖമുണ്ടതും.

ഓണം കഴിഞ്ഞു തിരുവാതിര പോയി

മീനം പിറക്കുമ്പോള്‍ മാമ്പഴമായ്

ഓര്‍മയിലക്കാലം ഇനിയും വന്നീടില്ല

പോയൊളിച്ചീടുന്ന ബാല്യകാലം