ആലപ്പുഴ: മദ്യലഹരിയില്‍ യുവാക്കള്‍ വിദേശ വിനോദ സഞ്ചാരികളെ ശല്യം ചെയ്തു. ചോദ്യം ചെയ്ത പോലീസുകാരനെ യുവാക്കള്‍ കൈയേറ്റം ചെയ്തു. സംഭവുമായി ബന്ധപ്പെട്ട് മൂന്നുപേരെ പോലീസ് അറസ്റ്റ് ചെയ്തു. പൂന്തോപ്പ് പുത്തന്‍വീട്ടില്‍ റിനുപോള്‍ (23), പൂന്തോപ്പ് വെളിയില്‍ വീട്ടില്‍ അനീഷ് (മൊട്ട അനീഷ് -24), ആശ്രമം വാര്‍ഡ് വടക്കേവീട്ടില്‍ അഖില്‍ (22) എന്നിവരാണ് അറസ്റ്റിലായത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.
രക്ഷപ്പെട്ട ജിഷ്ണു എന്ന പ്രതിക്കു വേണ്ടി പോലീസ് അന്വേഷണം ആരംഭിച്ചു. ശനിയാഴ്ച രാത്രി പന്ത്രണ്ടോടെ കെഎസ്ആര്‍ടിസി ബസ് സ്‌റ്റേഷനിലാണ് സംഭവം. പരിസരത്തെ ചായക്കടയിലിരുന്ന് ഭക്ഷണം കഴിച്ചിരുന്ന വിദേശ ദമ്പതികളെയാണ് യുവാക്കള്‍ ശല്യം ചെയ്തത്. ഔട്ട്‌പോസ്റ്റില്‍ ഡ്യൂട്ടിയിലുണ്ടായിരുന്ന പോലീസുകാരന്‍ ധനേഷ് എത്തി ഇവരെ പിന്തിരിപ്പിക്കാന്‍ ശ്രമിച്ചു. വഴങ്ങാതെ വന്നപ്പോള്‍ ഒരാളെ പിടികൂടി ഔട്ട്‌പോസ്റ്റിലെത്തിച്ചു. പിന്തുടര്‍ന്നെത്തിയ മറ്റ് പ്രതികള്‍ പോലീസുകാരനെ കൈയേറ്റം ചെയ്യാനും പിടികൂടിയ യുവാവിനെ രക്ഷപെടുത്താനും ശ്രമിച്ചു.
യുവാക്കളുടെ ആക്രമണത്തെ ചെറുത്ത പോലീസുകാരന്‍ വിവരമറിയിച്ചതനുസരിച്ച് സൗത്ത് സ്‌റ്റേഷനില്‍ നിന്നും പോലീസ് സംഘം സ്ഥലത്തെ മറ്റു രണ്ടുപേരെകൂടി പിടികൂടുകയായിരുന്നു. ഇതിനിടെ ഒരാള്‍ രക്ഷപ്പെട്ടു. രണ്ടു ബൈക്കുകളിലായാണ് യുവാക്കള്‍ എത്തിയത്. ഇതില്‍ ഒരുബൈക്ക് പോലീസ് കസ്റ്റഡിയിലെടുത്തു.
പ്രതികരിക്കാൻ ഇവിടെ എഴുതുക: