കൊല്ലം: ഹൈന്ദവ നവോത്ഥാനത്തിന്റ പടഹധ്വനി മുഴക്കി കാസര്‍ഗോഡ് നിന്ന് പ്രയാണം ആരംഭിച്ച് കൊല്ലത്തിന്റ മണ്ണില്‍ എത്തിയ വിശ്വഹിന്ദുപരിഷത്ത് സുവര്‍ണജയന്തി രഥയാത്രക്ക് ഓണാട്ടുകരയും ദേശിംഗനാടും തൂക്കുപാലത്തിന്റ നാടും ആവേശകരമായ വരവേല്‍പ് നല്‍കി. ഇന്നലെ രാവിലെ ഒമ്പതിന് കരുനാഗപ്പള്ളി തഴവയില്‍ എത്തിയ രഥത്തെ നൂറുകണക്കിന് ഇരുചക്രവാഹനങ്ങളുടെ അകമ്പടിയോടെ സ്വീകരിച്ച് പുതിയകാവ് ക്ഷേത്രത്തിലേക്ക് ആനയിച്ചു.
അവിടെ പൗരപ്രമുഖരും ഹൈന്ദവ സംഘടനാ നേതാക്കളും ചേര്‍ന്ന് രഥത്തെ ഹാരം അണിയിച്ചും പുഷ്പവൃഷ്ടി നടത്തിയും എതിരേറ്റു. രഥയാത്രയെ അനുഗമിക്കുന്ന സന്യാസിശ്രേഷ്ഠരായ കൃഷ്ണാനന്ദ, ഗുരുപ്രസാദ്, ഈശ്വരാനന്ദ എന്നിവരെ ആദരിച്ചു. പുതിയകാവ് ക്ഷേത്രത്തില്‍ നടന്ന സമ്മേളനം അമൃതാനന്ദമയി മഠത്തിലെ സ്വാമി വേദാമൃതചൈതന്യ ഉദ്ഘാടനം ചെയ്തു. വിഎച്ച്പി ജില്ലാപ്രസിഡന്റ് കെ.ആര്‍.ഉണ്ണിത്താന്‍ അധ്യക്ഷത വഹിച്ചു. സ്വാഗതസംഘം ചെയര്‍മാന്‍ എ.വിജയന്‍, നേതാക്കളായ ശൈലേന്ദ്രബാബു, മാലൂര്‍ രാജേന്ദ്രന്‍, പി.പങ്കജന്‍ എന്നിവര്‍ സംസാരിച്ചു. ബജ്‌റംഗദള്‍ സംസ്ഥാന സംയോജക് പി.ജി.കണ്ണന്‍ മുഖ്യപ്രഭാഷണം നടത്തി.
തുടര്‍ന്ന് രഥയാത്ര ശാസ്താംകോട്ട വഴി ഭരണിക്കാവ് ക്ഷേത്രത്തില്‍ എത്തിച്ചേര്‍ന്നു. ഇവിടെ സ്വീകരണസമ്മേളനത്തില്‍ വിഎച്ച്പി ജില്ലാപ്രചാര്‍പ്രമുഖ് വരവിള വാസുദേവന്‍നായര്‍ അധ്യക്ഷത വഹിച്ചു. ആര്‍എസ്എസ് ഗ്രാമജില്ലാസഹകാര്യവാഹ് ആര്‍.സുജിത്, ഹിന്ദുഐക്യവേദി സെക്രട്ടറി പി.എസ്.ഗോപകുമാര്‍, കെ.ജയദേവന്‍, ഡി.സുരേഷ് ആറ്റുപുറത്ത് തുടങ്ങിയ നേതാക്കള്‍ സംസാരിച്ചു. വിഎച്ച്പി ചെങ്ങന്നൂര്‍ ജില്ലാസെക്രട്ടറി ഗോപാലകൃഷ്ണന്‍ മുഖ്യപ്രഭാഷണം നടത്തി.
വൈകിട്ട് മൂന്നിനോടെ ദേശിംഗനാടിന്റെ മണ്ണിലേക്ക് എത്തിയ രഥയാത്രയെ വെണ്ടാര്‍ ഹനുമാന്‍ ക്ഷേത്രത്തില്‍ വച്ച് ആചാരപരമായ വരവേല്‍പ് നല്‍കി ആനയിച്ചു. അവിടെ നിന്നും നൂറുകണക്കിന് ഇരുചക്രവാഹനങ്ങളുടെ അകമ്പടിയോടെ വിനായകസവിധത്തിലെ മണികണ്ഠനാല്‍ത്തറയിലേക്ക് രഥയാത്രയെ എത്തിച്ചു.
മണികണ്ഠനാല്‍ത്തറയില്‍ നടന്ന സ്വീകരണ സമ്മേളനത്തിന് സദാനന്ദപുരം അവധൂതാശ്രമം മഠാധിപതി സ്വാമി ചിദാനന്ദഭാരതി, ഉപമഠാധിപതി രാമാനന്ദഭാരതി, വെട്ടിക്കവല കോക്കുളത്ത് മഠത്തില്‍ ശംഭുപോറ്റി എന്നിവര്‍ ചേര്‍ന്ന് ഭദ്രദീപം തെളിയിച്ച് തുടക്കം കുറിച്ചു. ആര്‍എസ്എസ് പ്രാന്തീയ സമ്പര്‍ക്കപ്രമുഖ് കെ.ബി.ശ്രീകുമാര്‍ മുഖ്യപ്രഭാഷണം നടത്തി. സ്വാഗതസംഘം അദ്ധ്യക്ഷന്‍ ശിവനപ്പന്‍ നായര്‍ അദ്ധ്യക്ഷത വഹിച്ചു.
ആര്‍എസ്എസ് പുനലൂര്‍ ജില്ലാസംഘചാലക് ആര്‍.ദിവാകരന്‍, വിഎച്ച്പി വിഭാഗ് സെക്രട്ടറി പി.എം.രവികുമാര്‍, സിദ്ധനര്‍ സര്‍വീസ് സൊസൈറ്റി മഹിളാവിഭാഗം സംസ്ഥാന സെക്രട്ടറി സുലോചന, വിളക്കിത്തല നായര്‍ സമാജം സംസ്ഥാനപ്രസിഡന്റ് അഡ്വ.കെ.ആര്‍. സുരേന്ദ്രന്‍, കെപിഎംഎസ് സംസ്ഥാന സമിതിയംഗം കോട്ടാത്തല സുരേഷ് വിഎച്ച്പി ജില്ലാസെക്രട്ടറി കെ.ബി. അജയകുമാര്‍, ജില്ലാജോയിന്റ് സെക്രട്ടറി കെ.വി.ജയകുമാര്‍, പ്രോഗ്രാം സംയോജക് പി.കെ.രാജന്‍മാഷ് എന്നിവര്‍ സംസാരിച്ചു.
വാസ്തുശില്‍പി നെടുവത്തൂര്‍ അനില്‍, ഓട്ടന്‍തുള്ളല്‍ രംഗത്തെ കാരണവര്‍ താമരക്കുടി കരുണാകരന്‍ മാസ്റ്റര്‍, മദ്ദള വാദകന്‍ കലാമണ്ഡലം കൊച്ചുകുട്ടന്‍, പരിസ്ഥിതി പ്രവര്‍ത്തകന്‍ ഓടനാവട്ടം വിജയപ്രകാശ്, വിദ്യാഭ്യാസ വിദഗ്ധന്‍ പി.കെ.രാമചന്ദ്രന്‍, പാരമ്പര്യവിഷചികിത്സാരംഗത്ത് പ്രശസ്തയായ ആര്യങ്കോട്ട് കുമാരി ശകുന്തള എന്നിവരെ ചടങ്ങില്‍ ആദരിച്ചു.
അവിടെനിന്നും പുനലൂര്‍ ടിബി ജംഗ്ഷനില്‍ എത്തിയ രഥയാത്രക്ക് ആവേശോജ്ജ്വല സ്വീകരണമാണ് ഒരുക്കിയിരുന്നത്. അഭിഭാഷകപരിഷത്ത് സെക്രട്ടറി അഡ്വ.വിളക്കുടി രാജേന്ദ്രന്റെ അധ്യക്ഷതയില്‍ കൂടുന്ന യോഗത്തില്‍ തപസ്യ സംസ്ഥാനസെക്രട്ടറി എം.സതീശന്‍ മുഖ്യപ്രഭാഷണം നടത്തി. യോഗത്തില്‍ ആര്‍എസ്എസ് ജില്ലാസഹകാര്യവാഹ് ടി. അനില്‍കുമാര്‍, കേരളവിശ്വകര്‍മ്മ മഹാസഭ സംസ്ഥാനസെക്രട്ടറി ടി.കെ.സോമശേഖരന്‍, കെപിഎംഎസ് സംസ്ഥാനസമിതിഅംഗം ടി.എന്‍.ഗോപി, വിഎച്ച്പി ജില്ലാപ്രസിഡന്റ് അഡ്വ. കാവടിയില്‍ വിനോദ്, ഷൈന്‍, വിഎച്ച്പി വിഭാഗ് സെക്രട്ടറി പി.എം. രവികുമാര്‍, എം.തുളസീധരന്‍, വി.ബാലചന്ദ്രക്കുറുപ്പ്, മഞ്ഞപ്പാറ സുരേഷ്, സുഭാഷ്ബാബു എന്നിവര്‍ സംസാരിച്ചു. ഡോ.ജെ.സീതാരാമന്‍, മാത്രസുന്ദരേശന്‍, പുനലൂര്‍ രാജന്‍, നാരായണന്‍പോറ്റി, എന്‍. കുട്ടപ്പന്‍, കൈപ്പള്ളില്‍ ഗോപകുമാര്‍, ഡോ.ജി. സുരേഷ്ബാബു, ബി. ദിലീപ്കുമാര്‍, ഡോ. ഷേര്‍ളിശങ്കര്‍ എന്നിവരെ ആദരിച്ചു.
എസ്. ധനപാലന്‍ സ്വാഗതവും എസ്. സജീഷ് നന്ദിയും പറഞ്ഞു. ഇന്ന് തിരുവനന്തപുരം ജില്ലയിലെ വിവിധ കേന്ദ്രങ്ങളില്‍ രഥം പര്യടനം തുടരും.
പ്രതികരിക്കാൻ ഇവിടെ എഴുതുക: