ന്യൂദല്ഹി: കോണ്ഗ്രസ് അധ്യക്ഷ സോണിയയുടെ മരുമകന് റോബര്ട്ട് വധേര അടക്കമുള്ള ഒട്ടേറെ പ്രമുഖ സ്വകാര്യ വിമാന കമ്പനിയുടെ സൗജന്യം പറ്റിയെന്ന് വെബ് പോര്ട്ടലായ തെഹല്ക. കോടികളുടെ സൗജന്യം കൈപ്പറ്റിയ ഇവര് പകരമായി വിമാന കമ്പനികള്ക്ക് വിദേശ പൈലറ്റുമാരെ റിക്രൂട്ട് ചെയ്യാനുള്ള അനുമതി ദീര്ഘിപ്പിച്ച് നല്കിയെന്ന് തെഹല്ക റിപ്പോര്ട്ട് ചെയ്യുന്നു.
എക്കണോമി ക്ലാസിലേക്ക് ബുക്ക് ചെയ്യുന്ന ടിക്കറ്റുകള് യാത്രാവേളയില് ഉയര്ന്ന ക്ലാസുകളിലേക്ക് മാറ്റി വാങ്ങുന്നു. ബിസിനസ്, ഫസ്റ്റ്, പ്രീമിയര് ക്ലാസുകളിലേക്കാണ് ഇപ്രകാരം ടിക്കറ്റ് അപ്ഗ്രേഡ് ചെയ്ത് വാങ്ങുന്നത്. ഇതിന് നല്കേണ്ട അധിക തുക ഇവര് നല്കില്ല. പകരം കമ്പനികള്ക്ക് വിദേശ പൈലറ്റുമാരെ റിക്രൂട്ട് ചെയ്യാനുള്ള അനുമതിയുടെ കാലാവധി നീട്ടി നല്കുകയാണ് ചെയ്തത്. വധേരയും അദ്ദേഹത്തിന്റെ അമ്മയും ലണ്ടണിലേക്കും മിലനിലേക്കും ഇത്തരത്തില് നിരവധി യാത്രകള് നടത്തിയിട്ടുണ്ട്. ഓരോ യാത്രയിലും ഇവര്ക്ക് വേണ്ടി വളരെ വലിയ സൗകര്യങ്ങളാണ് വിമാന കമ്പനികള് ചെയ്തു കൊടുത്തത്.
ബംഗാള് കേഡറിലെ ഐഎഎസുകാരന് മനോജ് മാളവ്യ സിവില് ഏവിയേഷന് സെക്യൂരിറ്റി ബ്യൂറോയില് ജോലി ചെയ്യുമ്പോള് ജെറ്റ് എയര്വേയ്സില് നിന്ന് ആറുകോടി രൂപയുടെ യാത്രാ സൗജന്യം പറ്റിയതായി രേഖകള് ഉദ്ധരിച്ച് തെഹര്ക് സ്ഥാപിക്കുന്നു. കുടുംബസമേതം അദ്ദേഹം 28 വിദേശയാത്രകള് നടത്തിയതിന്റെ തെളിവുകളും പുറത്തുവന്നിട്ടുണ്ട്. മൊത്തം നല്കിയത് വെറും ഒരു ലക്ഷം രൂപയാണ്. ഇതേക്കുറിച്ച് അന്വേഷണം നടത്തി മാളവ്യയെ സ്ഥലം മാറ്റി. മാത്രമല്ല സംഭവത്തെക്കുറിച്ച് സിബിഐ അന്വേഷണം പുരോഗമിക്കുന്നുണ്ട്.
മുന് സിവില് ഏവിയേഷന് സെക്രട്ടറിയായ കെ.എന്. ശ്രീവാസ്തവ ആഭ്യന്തര വിദേശ യാത്രകള്ക്കായി 50 സൗജന്യ ടിക്കറ്റുകളാണ് കരസ്ഥമാക്കിയത്. അദ്ദേഹത്തിന്റെ കുടുംബാംഗങ്ങളും ബന്ധുക്കളും വരെ ഇങ്ങനെ യാത്ര ചെയ്തതായി തെഹല്ക പറയുന്നു.
വിമാനകമ്പനികളിലെ മുതിര്ന്ന ഉദ്യോഗസ്ഥരുടെ ഇ-മെയില് സന്ദേശങ്ങള് ചോര്ത്തിയെടുത്താണ് തെഹല്ക അന്വേഷണാത്മക റിപ്പോര്ട്ട് പ്രസിദ്ധീകരിച്ചിരിക്കുന്നത്. ഇപ്പോള് കേരളത്തിന്റെ ചീഫ് സെക്രട്ടറിയും ഡിജിസിഎ മുന് ചെയര്മാനുമായിരുന്ന ഭരത് ഭൂഷണ്, എഎഐ മുന് ചെയര്മാന്മാരായ വി.പി. അഗര്വാള്, അലോക് സിന്ഹ, ഡിജിസിഎ ജോയിന്റ് ഡയറക്ടര് ലളിത് ഗുപ്ത, മുന് കേന്ദ്രമന്ത്രി കമല് നാഥിന്റെ മകനും മരുമകളും, അജിത് സിംഗിന്റെ സ്പെഷ്യല് ഡ്യൂട്ടി ഓഫീസര് സമര്പാല് സിംഗ് തുടങ്ങിയവരും ഇത്തരത്തില് യാത്ര ചെയ്തതായി രേഖകള് ഉദ്ധരിച്ച് തെഹല്ക വെളിപ്പെടുത്തുന്നു.
പ്രതികരിക്കാൻ ഇവിടെ എഴുതുക: