മാന്നാര്‍: സമയത്തെ ചൊല്ലി സ്വകാര്യ ബസ് ജീവനക്കാര്‍ തമ്മില്‍ നടുറേഡില്‍ ഏറ്റുമുട്ടി. മാന്നാര്‍ സ്റ്റോര്‍ ജങ്ഷനിലെ ബസ് സ്റ്റാന്‍ഡിന് സമീപം പരുമല-പന്തളം റൂട്ടിലോടുന്ന അരുണ്‍ ട്രാവല്‍സ്, പരുമല-ചെങ്ങന്നൂര്‍ റൂട്ടിലോടുന്ന അശ്വതി ട്രാവല്‍സിലെയും ജീവനക്കാരാണ് ഏറ്റ് മുട്ടിയത്. ഇരു ബസുകളും തമ്മില്‍ മത്സരഓട്ടം നടത്തിയാണ് സ്റ്റോര്‍ ജംഗ്ഷനില്‍ എത്തിയത്. ജീവനക്കാര്‍ തമ്മില്‍ അസഭ്യവര്‍ഷവും നടത്തുകയും തുടര്‍ന്ന് ബസ് റോഡില്‍ ഇട്ട് ഗതാഗത തടസം സൃഷ്ടിച്ച് പരസ്പരം ഏറ്റുമുട്ടുകയായിരുന്നു. സംഭവമറിഞ്ഞ് മാന്നാര്‍ എസ്‌ഐ ശ്രീകുമാറിന്റെ നേതൃത്വത്തിലുള്ള പോലീസ് സംഘമെത്തി ജീവനക്കാരെ ബലമായി കസ്റ്റഡിയില്‍ എടുത്തു.
പരുമല മലയില്‍ തോപ്പില്‍ അഭിലാഷ് (27), മുളക്കുഴ കൊഴുവല്ലൂര്‍ ചരിവുകാലായില്‍ വിനോദ് (26), ആല പെണ്ണുക്കര വടക്കുമുറിയുല്‍ വിഷ്ണുവിലാസം വിഷ്ണു (26), പുലിയൂര്‍ പാലച്ചുവട് കുന്നില്ലാപറമ്പില്‍ രാഹൂല്‍ (20), മുളക്കുഴ പ്ലാത്തിശേരില്‍ ഷീജാഭവനം സിനു(26), പുലിയൂര്‍ പേരിശ്ശേരി മൂപ്പരുതുണ്ടിയില്‍ സജീവ് (32) എന്നിവരെയാണ് അറസ്റ്റ് ചെയ്തത്. രണ്ട് ബസുകളും പോലീസ് കസ്റ്റഡിയില്‍ എടുത്തു. മാന്നാര്‍ സ്വദേശിയായ ശിവപ്രസാദ് പോലീസ് വരുന്നത് കണ്ട് ഓടി രക്ഷപെട്ടു. ഇയാളെ ഒന്നാം പ്രതിയാക്കി കേസ് എടുത്തിട്ടുണ്ടെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: