കൊച്ചി: സിനിമാ പിന്നണി ഗായകന്‍ വിധുപ്രതാപിന്റെ പുതിയ മ്യൂസിക് വീഡിയോ ആല്‍ബം നങ്ങേലി റിലീസ് ചെയ്തു. പ്രസ്സ് ക്ലബ്ബ് ഹാളില്‍ നടന്ന ചടങ്ങില്‍ സംവിധായകന്‍ ലാല്‍ ജോസ് ഫെയ്‌സ്ബുക്ക് പേജിലൂടെ ആദ്യ ഷെയര്‍ നല്‍കിയാണ് ആല്‍ബം റിലീസ് ചെയ്തത്. ബുള്‍സൈ പ്രൊഡക്ഷന്‍സിന്റെ ബാനറില്‍ നിര്‍മ്മിച്ചിരിക്കുന്ന ആല്‍ബത്തിന്റെ ഗാനരചന നിര്‍വഹിച്ചിരിക്കുന്നത് എസ്.രമേശന്‍ നായരാണ്.
അദ്ദേഹത്തിന്റെ മകന്‍ മനു രമേശന്‍ സംഗീതവും നിര്‍വഹിച്ചിരിക്കുന്നു എന്ന പ്രത്യേകത കൂടി ആല്‍ബത്തിനുണ്ട്. വാദ്യോപകരണങ്ങളുടെ അകമ്പടിയില്ലാതെ തീര്‍ത്തും വോക്കലായ സംഗീത താള സമന്വയമായ ആക്കപ്പെല്ല എന്ന വ്യത്യസ്ത സംഗീത ശ്രേണിയാണ് ഗാനത്തില്‍ ആവിഷ്‌കരിച്ചിരിക്കുന്നത്. അടുത്തതലമുറയെ വിശ്വസിക്കാനും അവര്‍ക്ക് പ്രചോദനവും ഊര്‍ജ്ജവും നല്‍കാനും കഴിയുന്ന സംരംഭമാണ് നങ്ങേലി മ്യൂസിക്കല്‍ വീഡിയോ ആല്‍ബമെന്ന് ചടങ്ങില്‍ സംബന്ധിച്ച എസ്. രമേശന്‍ നായര്‍ പറഞ്ഞു.
വരുംവര്‍ഷം സിനിമാലോകം നിയന്ത്രിക്കാനിരിക്കുന്ന ഒരു സംഘം ചെറുപ്പക്കാരുടെ ടീം വര്‍ക്കിന്റെ റിലീസിംഗ് ആണ് നടന്നതെന്ന് ലാല്‍ ജോസ് അഭിപ്രായപ്പെട്ടു.
ടെക്‌നോളജിയുടെ അതിപ്രസരമില്ലാതെ തയ്യാറാക്കിയിരിക്കുന്ന മ്യൂസിക്കല്‍ ആല്‍ബത്തിന്റെ സംവിധാനവും ഛായാഗ്രഹണവും കുഞ്ഞുണ്ണി എസ.് കുമാര്‍ ആണ്. കോറിയോഗ്രാഫി ശ്രീജിത്ത് ടി.ആര്‍. ചടങ്ങില്‍ ആല്‍ബത്തിന്റെ കലാസംവിധായകന്‍ ദീപു നിര്‍മ്മിച്ച പുരസ്‌കാരം ലാല്‍ ജോസിന് സമ്മാനിച്ചു. ആല്‍ബത്തിന്റെ അണിയറപ്രവര്‍ത്തകരും അഭിനേതാക്കളും വാര്‍ത്താസമ്മേളനത്തില്‍ സംബന്ധിച്ചു.
പ്രതികരിക്കാൻ ഇവിടെ എഴുതുക: