കോട്ടയം: ചിങ്ങവനത്തിന്റെ വികസനം ലക്ഷ്യമാക്കി കേരള വ്യാപാരി വ്യവസായി ഏകോപനസമിതി ചിങ്ങവനം യൂണിറ്റിന്റെ ആഭിമുഖ്യത്തില് ഇന്ന് 3.30 ന് വികസന സെമിനാര് നടത്തും. വികസന നിര്ദ്ദേശങ്ങള് അടങ്ങിയ വികസന രേഖയും തയ്യാറാക്കിയിട്ടുണ്ട്. ചിങ്ങവനം റെയില്വേ സ്റ്റേഷന് നവീകരിച്ച് പ്ലാറ്റ്ഫോം ചിങ്ങവനം ജംഗ്ഷന്വരെ നീട്ടുക, എല്ലാ പാസഞ്ചര് ട്രെയിനുകള്ക്കും അടിയന്തിരമായി സ്റ്റോപ്പ് അനുവദിക്കുക, ചിങ്ങവനത്തിന്റെ പടിഞ്ഞാറന് മേഖലയിലെ വെട്ടിത്തറ റോഡ് വികസിപ്പിച്ച് നീലംപേരൂര് വഴി ആലപ്പുഴ ലിങ്ക്റോഡിന് സാധ്യതയും എം.സി റോഡിനെ കെ.കെ റോഡുമായി ബന്ധിപ്പിക്കുന്ന ചിങ്ങവനം പനച്ചിക്കാട് പുതുപ്പള്ളി മണര്കാട് റോഡ് ദേശീയ നിലവാരത്തിലേക്ക് ഉയര്ത്തുന്നതിന്റെ ആവശ്യകതയും വികസനരേഖയിലെ പ്രധാന ആവശ്യങ്ങളായി ഉയര്ത്തിക്കാട്ടുന്നു. പഴയ ടെസിലിന്റെ സര്ക്കാര് അധീനതയിലുള്ള 12 ഏക്കര് സ്ഥലം യുവജനങ്ങള്ക്കു തൊഴില്സാധ്യതയുള്ള ഐ.ടി പാര്ക്ക് ഉള്പ്പെടെയുള്ള ആവശ്യങ്ങള്ക്കായി പരിഗണിക്കണം. കെഎസ്ഇബി സബ് സ്റ്റേഷന്, ഗതാഗതക്കുരുക്ക് പരിഹരിക്കുന്നതിനുള്ള കര്മ്മപദ്ധതികള്, കെഎസ്ആര്ടിസി സൂപ്പര്ഫാസ്റ്റ് ബസ്സിന്റെ ഫെയര്സ്റ്റേജ് പ്രശ്നം, എഫ്എസിടി മിക്സിംഗ് യൂണിറ്റ് നവീകരണം, ചിങ്ങവനം വില്ലേജ് ഓഫീസ് തുടങ്ങിയ വികസന രേഖ മുന്നോട്ടുവയ്ക്കുന്നു. കോട്ടയം പ്രസ്സ്ക്ലബില് നടന്ന ചടങ്ങില് മുന് എംഎല്എ വി.എന് വാസവന് വികസന രേഖ സമര്പ്പിച്ചു.
ചിങ്ങവനം യൂണിറ്റ് പ്രസിഡന്റ് വി.എന്.എസ് പിള്ളയുടെ അധ്യക്ഷതയില് ക്നാനായ സുറിയാനി സഭയുടെ ആര്ച്ച് ബിഷപ്പ് കുറിയാക്കോസ് മാര് സേവേറിയോസ് വലിയ മെത്രാപ്പോലീത്ത സെമിനാറിന്റെ ഉദ്ഘാടനം നിര്വഹിക്കും. മന്ത്രി തിരുവഞ്ചൂര് രാധാകൃഷ്ണന്, കോട്ടയം എം.പി ജോസ് കെ.മാണി, മുനിസിപ്പല് ചെയര്മാന് എം.പി സന്തോഷ്കുമാര്, മുനിസിപ്പല് കൗണ്സിലര്മാരായ ജോസ് പള്ളിക്കുന്നേല്, ടിനോ കെ. തോമസ്, ഉഷ സുരേഷ്, ജിഷ ഡെന്നി, സിന്ധു അനില് എന്നിവര് പങ്കെടുക്കും.
പത്രസമ്മേളനത്തില് വ്യാപാരി വ്യവസായി ഏകോപനസമിതി ചിങ്ങവനം യൂണിറ്റ് പ്രസിഡന്റ് വി.എന്.എസ് പിള്ള, ജനറല് സെക്രട്ടറി റെജി സി. ഏബ്രഹാം, ട്രഷറര് എന്.സി രാജു, പ്രോഗ്രാം കോര്ഡിനേറ്റര് ജിമ്മി തോമസ്, കമ്മറ്റി അംഗങ്ങളായ അനൂബ് ഏബ്രഹാം, ജി. സുനില്കുമാര് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: