മരണാനന്തരം ജീവന്മാര്ക്കുണ്ടെന്ന് ദ്വൈതികള് പറയുന്ന ത്രിവിധഗതിക്ക് നിലയെന്ത്? മരണശേഷം ശിഷ്ടന്മാര് സ്വര്ഗത്തിലോ മറ്റുവല്ല ലോകത്തിലോ പോകുന്നു, ദുഷ്ടന്മാര് ഭൂതപ്രേതാദികളോ മൃഗങ്ങളോ ആകുന്നു എന്നും മറ്റും അവര് പറയുന്നതിന്റെ നിലയെന്ത്? അങ്ങനെയൊന്നുമില്ല, ആരും വരുന്നതോ പോകുന്നതോ ഇല്ലെന്നാണ് അദ്വൈതി പറയുന്നത്. വരവും പോക്കും എങ്ങനെയുണ്ടാകും? നിങ്ങള് അപരിമിതം, അനന്തം, പിന്നെ നിങ്ങള്ക്ക് പോകാനുള്ള സ്ഥാനമേത്? ഒരു സ്കൂളില് ചെറിയ കുട്ടികളെ പരീക്ഷിക്കുകയായിരുന്നു. അവരോട് പരീക്ഷകന് വിഡ്ഢിത്തമായി പല ദുര്ഘടചോദ്യങ്ങളും ചോദിച്ചു. അതിലൊന്ന്, ഭൂമി എന്തുകണ്ട് വീണുപോകുന്നില്ല’ എന്നായിരുന്നു. ആകര്ഷണമെന്നോ മറ്റോ ഉള്ള ശാസ്ത്രതത്ത്വം പ്രമാണമാണെന്ന് വരുത്തുവാനുള്ള ചോദ്യമാണത്. കുട്ടികളില് പലര്ക്കും ചോദ്യത്തിന്റെ കാര്യം മനസ്സിലായില്ല. അവര് എന്തെല്ലാമോ തെറ്റായ മറുപടി പറഞ്ഞു. മിടുക്കിയായ ഒരു കൊച്ചുപെണ്കുട്ടി അതിനുത്തരമായി മറ്റൊരു ചോദ്യം ചോദിച്ചു. ‘അതെവിടേക്ക് വീഴും’ എന്ന്. പരീക്ഷകന്റെ ചോദ്യം പ്രത്യക്ഷത്തിലെ അബദ്ധം.
ഈ ജഗത്തില് മീതെയെന്നും താഴെയെന്നും വാസ്തവത്തിലില്ല. എല്ലാം സാപേക്ഷം. ആത്മാവിന്റെ കാര്യത്തിലും അങ്ങനെയാണ്. അതിനെസംബന്ധിച്ച് ജനനമെന്നും മരണമെന്നും പറയുന്നത് വെറും ബുദ്ധിശൂന്യത. ആരു പോകുന്നു, ആരു വരുന്നു? നിങ്ങളില്ലാത്ത സ്ഥലമേത്? ആത്മാവ് സര്വവ്യാപി. ഇപ്പോഴേ നിങ്ങള് അധിവസിക്കുന്നില്ലാത്ത സ്വര്ഗമെവിടെ? സര്വവ്യാപി എവിടേക്ക് പോകും? എവിടേക്ക് പോകാതിരിക്കും? അത് എവിടെയും നിറഞ്ഞിരിക്കുന്നു. സ്വര്ഗലോകം, തദുപരിലോകങ്ങള്, അധോലോകങ്ങള്, ജനനം, മരണം എന്നീ ബാലിശസ്വപ്നങ്ങള്, മിഥ്യാ ഭാവനകള് – എല്ലാം ജ്ഞാനിക്ക് നിമിഷംകൊണ്ട് മാഞ്ഞുപോകുന്നു. ജ്ഞാനം പരിപൂര്ണമാകാത്തവര്ക്ക് ബ്രഹ്മ ലോകപര്യന്തം പല രംഗങ്ങളും കഴിഞ്ഞശേഷം അവ മാഞ്ഞുപോകുന്നു. അജ്ഞാനികള്ക്ക് അത് തുടര്ന്നുംപോകും.
– സ്വാമി വിവേകാനന്ദന്
പ്രതികരിക്കാൻ ഇവിടെ എഴുതുക: