അനുഭവമാകുന്നു നമുക്ക് സര്വജ്ഞാനത്തിനും അടിസ്ഥാനം; അനുമിതിക്കും അടിസ്ഥാനം അതുതന്നെ. അനുമാനത്തില് നാം വ്യാപ്യത്തില്നിന്ന് വ്യാപകത്തിലേക്കോ സാമാന്യത്തില്നിന്ന് വിശേഷത്തിലേക്കോ കടക്കുന്നതേയുള്ളൂ. അതിന്റെ ആസ്പദവും അനുഭവം തന്നെ. ചില ശാസ്ത്രങ്ങളെ സൂക്ഷ്മശാസ്ത്രങ്ങള് എന്ന് പറഞ്ഞുവരുന്നു.
സൂക്ഷ്മശാസ്ത്രങ്ങളില് വാസ്തവമെന്തെന്ന് ജനങ്ങള്ക്ക് എളുപ്പത്തില് കാണാം. എന്തുകൊണ്ടെന്നാല് അത് ഓരോ മനുഷ്യന്റെയും പ്രത്യേകാനുഭവങ്ങളോട് യോജിച്ചിരിക്കും. ശാസ്ത്രജ്ഞന് നിങ്ങളോട് എന്തെങ്കിലും വിശ്വസിക്കണം എന്ന് പറയുന്നില്ല. അയാള് സ്വന്തം അനുഭവങ്ങളില്നിന്ന് ചില ഫലങ്ങള് ഗ്രഹിച്ചിട്ടുണ്ട്. അവയെ ആസ്പദമാക്കി യുക്തികൊണ്ടനുമാനിച്ച സംഗതികളെ വിശ്വസിക്കാന് അയാള് നമ്മോടാവശ്യപ്പെടുമ്പോള് അത് സര്വമനുഷ്യസാധാരണമായ ഒരനുഭവത്തോട് യോജിച്ചുവരുന്നു.
സര്വലോകസമ്മതമായ ഒരു മൗലികാധിഷ്ഠാനം ഏത് സൂക്ഷ്മശാസ്ത്രത്തിനുമുണ്ട്. അതുകൊണ്ട് അതില്നിന്നുള്ള അനുമാനങ്ങള് നേരോ പിഴയോ എന്ന് നമുക്ക് പെട്ടെന്ന് കാണാന് കഴിയും. മതത്തിന് അങ്ങനെയൊരു അടിസ്ഥാനം ഉണ്ടോ ഇല്ലയോ എന്നതാണ് പ്രശ്നം. ഉണ്ട്, ഇല്ല എന്ന് രണ്ടുവിധവും എനിക്ക് ഉത്തരം പറയേണ്ടിവരും.
– സ്വാമി വിവേകാനന്ദന്
പ്രതികരിക്കാൻ ഇവിടെ എഴുതുക: