കൊച്ചി: എറണാകുളം ജില്ലയിലെ വരള്‍ച്ച ദുരിതാശ്വാസ പ്രവര്‍ത്തനങ്ങക്കായി പാറമടകളിലെ വെള്ളം ശുദ്ധീകരിച്ച്‌ വിതരണം ചെയ്യുന്നതടക്കം ജില്ലാ ഭരണകൂടം സമര്‍പ്പിച്ചിട്ടുള്ള വിവിധ പദ്ധതികള്‍ക്ക്‌ സര്‍ക്കാര്‍ അനുമതി നല്‍കും. ടാങ്കറുകളില്‍ കുടിവെള്ള വിതരണം നടത്തുന്നതിന്‌ നിശ്ചയിച്ചിട്ടുള്ള നിരക്കുകളുടെ ഏകോപനത്തിന്‌ എറണാകുളം ജില്ലയെ മാതൃകയാക്കാമെന്ന്‌ റവന്യൂമന്ത്രി അടൂര്‍ പ്രകാശ്‌ പറഞ്ഞു.
വിവിധ ജില്ലകളിലെ വരള്‍ച്ച ദുരിതാശ്വാസ പ്രവര്‍ത്തനങ്ങള്‍ വിലയിരുത്തുന്നതിന്‌ ജില്ല കളക്ടര്‍മാരും ഉന്നതോദ്യോഗസ്ഥരുമായുള്ള വീഡിയോ കോണ്‍ഫറന്‍സില്‍ സംസാരിക്കുകയായിരുന്നു മന്ത്രി.
കുടിവെള്ള വിതരണത്തിനും വിവിധ കുടിവെള്ള പദ്ധതികള്‍ക്കുമായി സര്‍ക്കാര്‍ കഴിഞ്ഞ വര്‍ഷം അനുവദിച്ച 6.51 കോടി രൂപയില്‍ 4.95 കോടി രൂപയും ചെലവഴിച്ചതായി കളക്ടര്‍ പി.ഐ. ഷെയ്‌ക്ക്‌ പരീത്‌ പറഞ്ഞു. 3.20 കോടി രൂപ കുടിവെള്ള വിതരണത്തിനും 1.80 കോടി രൂപ വിവിധ നിര്‍മാണ ജോലികള്‍ക്കുമാണ്‌ പ്രയോജനപ്പെടുത്തിയത്‌. ഈ സാമ്പത്തിക വര്‍ഷം 1.85 കോടി രൂപ കൂടി സര്‍ക്കാര്‍ അനുവദിച്ചു. 1.56 കോടി രൂപ കൂടി ഉടനെ ലഭ്യമാകും. 367 നിര്‍മാണജോലികള്‍ ആവിഷ്കരിച്ചതില്‍ 330 എണ്ണവും കൃത്യസമയത്ത്‌ പൂര്‍ത്തിയാക്കിയതായി കളക്ടര്‍ അറിയിച്ചു.
പ്രതിദിനം ആറു ലക്ഷം രൂപയുടെ കുടിവെള്ളമാണ്‌ ടാങ്കറുകളില്‍ വിതരണം ചെയ്യുന്നത്. 169 പഞ്ചായത്തുകള്‍ ഇതിന്റെ ഗുണഭോക്താക്കളാണ്‌. നഗരസഭകളും കുടിവെള്ളം ആവശ്യപ്പെടുന്നുണ്ടെങ്കിലും തനത്‌ ഫണ്ട്‌ ഇതിനായി പ്രയോജനപ്പെടുത്താനാണ്‌ സര്‍ക്കാരിന്റെ നിര്‍ദേശം. കുടിവെള്ള വിതരണവുമായി ബന്ധപ്പെട്ട കാര്യങ്ങളില്‍ ടെന്‍ഡര്‍ നടപടിക്രമങ്ങള്‍ ലഘൂകരിച്ചിട്ടുണ്ട്‌.
വൈപ്പിന്‍കരയിലെ കുടിവെള്ള പ്രശ്നത്തിന്‌ മൂന്നു മാസത്തിനകം പരിഹാരമാകും. പൈപ്പിടല്‍ ജോലികള്‍ അതിവേഗം നടന്നുവരികയാണ്‌.
വരള്‍ച്ച ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കുന്നതിന്‌ കളക്ടറേറ്റില്‍ പ്രത്യേക കണ്‍ട്രോള്‍ റൂം പ്രവര്‍ത്തിക്കുന്നുണ്ട്‌. കുടിവെള്ളം ദുരുപയോഗം ചെയ്യുന്നത് തടയുന്നതിനായി രൂപീകരിച്ച ആന്റി തെഫ്റ്റ്‌ സ്ക്വാഡ്‌ കേസുകള്‍ രജിസ്റ്റര്‍ ചെയ്തു വരികയാണ്‌. തിരുവനന്തപുരത്ത്‌ റവന്യൂ മന്ത്രിക്കൊപ്പം റവന്യൂ പ്രിന്‍സിപ്പല്‍ സെക്രട്ടറി ജി. കമലവര്‍ധന റാവു, ലാന്‍ഡ്‌ റവന്യൂ കമ്മീഷണര്‍ ടി.ഒ. സൂരജ്‌, ജില്ല കളക്ടറേറ്റില്‍ മൂവാറ്റുപുഴ ആര്‍.ഡി.ഒ എസ്. ഷാനവാസ്‌, ഡപ്യൂട്ടി കളക്ടര്‍മാരായ സി.സി. ജോസഫ്‌, വി.ഡി. മുഹമ്മദ്‌ ബഷീര്‍, തഹസില്‍ദാര്‍മാര്‍, ജല വിഭവ വകുപ്പ്‌ ഉദ്യോഗസ്ഥര്‍ തുടങ്ങിയവരും വീഡിയോ കോണ്‍ഫറന്‍സില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: