മട്ടാഞ്ചേരി: പ്രായപൂര്‍ത്തിയാകാത്ത വിദ്യാര്‍ത്ഥിനിയെ പീഡിപ്പിച്ച കേസില്‍ മധ്യവയസ്ക്കന്‍ പോലീസ്‌ പിടിയില്‍. പെണ്‍കുട്ടിയുടെ അമ്മയുടെ ചേച്ചിയുടെ ഭര്‍ത്താവ്‌ കൂടിയായ പാണ്ടിക്കുടി ഇളമന റോഡില്‍ കൈതവളപ്പില്‍ വീട്ടില്‍ ജോസഫ്‌ (59) ആണ്‌ അറസ്റ്റിലായത്‌. ഒമ്പതാംക്ലാസ്‌ വിദ്യാര്‍ത്ഥിനിയായ പെണ്‍കുട്ടിയെ അഞ്ചാംക്ലാസ്‌ മുതല്‍ ഇയാള്‍ പീഡിപ്പിച്ച്‌ വരികയാണെന്ന്‌ പോലീസ്‌ പറഞ്ഞു.
പെണ്‍കുട്ടിയുടെ വല്യച്ഛനായ ഇയാള്‍ വീട്ടില്‍ ആളില്ലാത്ത സമയം നോക്കിയാണ്‌ പീഡിപ്പിച്ചിരുന്നത്‌. പെണ്‍കുട്ടിയുടെ അമ്മ ജോലിക്ക്‌ പോകുന്ന സമയത്ത്‌ കുട്ടി വീട്ടില്‍ തനിച്ചായിരിക്കും. വിദ്യാര്‍ത്ഥിനിയുടെ വീടിന്‌ സമീപത്ത്‌ തന്നെയാണ്‌ ഇയാള്‍ താമസിക്കുന്നത്‌. ചമ്പക്കരയിലെ വനിതാ പ്രവര്‍ത്തകര്‍ സ്കൂളില്‍ കൗണ്‍സലിംഗ്‌ നടത്തിയ വേളയിലാണ്‌ പെണ്‍കുട്ടി തനിക്കുണ്ടായ അനുഭവം ഇവരോട്‌ വെളിപ്പെടുത്തിയത്‌. പെണ്‍കുട്ടിക്ക്‌ പത്ത്‌ വയസുള്ളപ്പോള്‍ വിദ്യാര്‍ത്ഥിനിയുടെ കുളിക്കുന്ന ദൃശ്യങ്ങള്‍ മൊബെയിലില്‍ പകര്‍ത്തിയ ഇയാള്‍ ഇത്‌ കാണിച്ച്‌ നിരന്തരം പെണ്‍കുട്ടിയെ പീഡിപ്പിച്ചുവരികയായിരുന്നുവത്രെ.
ചമ്പക്കരയിലുള്ള ചെയില്‍ഢോമില്‍ വനിതാ പ്രവര്‍ത്തകര്‍ വിദ്യാര്‍ത്ഥിനിയെ എത്തിച്ച്‌ വനിതാ എസ്‌ഐയെക്കൊണ്ട്‌ മൊഴിയെടുപ്പിച്ചശേഷം ഫോര്‍ട്ടുകൊച്ചി പോലീസില്‍ വിവരമറിയിക്കുകയായിരുന്നു. സംഭവം നടന്നത്‌ മട്ടാഞ്ചേരി പോലീസ്സ്റ്റേഷന്റെ പരിധിയിലായതിനാല്‍ മട്ടാഞ്ചേരി എസ്‌ഐ എം.സുധിലാലിന്റെ നേതൃത്വത്തില്‍ പ്രതിയെ അറസ്റ്റ്‌ ചെയ്യുകയായിരുന്നു. പീഡനത്തിന്‌ പുറമേ പ്രകൃതിവിരുദ്ധ പീഡനത്തിനും ബാലികാ പീഡനത്തിനെതിരെ പുതുതായി രൂപം കൊടുത്ത വകുപ്പും പ്രതിക്കെതിരെ എടുത്തിട്ടുണ്ട്‌. ജോസഫ്‌ കൂലിപ്പണിക്കാരനാണ്‌. ഇയാളെ ഇന്ന്‌ കോടതിയില്‍ ഹാജരാക്കും.
കുട്ടിയുടെ അച്ഛന്‍ നേരത്തെ മരിച്ചതാണ്‌. അമ്മയോടൊപ്പം താമസിക്കുന്ന കുട്ടിയുടെ അടുത്തുതന്നെയാണ്‌ പ്രതിയുടെ വീട്‌. അമ്മയില്ലാത്ത സമയത്താണ്‌ കുട്ടി പീഡനത്തിന്‌ ഇരയായത്‌.
പ്രതികരിക്കാൻ ഇവിടെ എഴുതുക: