ചേര്‍ത്തല: നെയ്യാറ്റിന്‍കര ഉപതെരഞ്ഞെടുപ്പില്‍ ഭൂരിപക്ഷ സമുദായങ്ങളുടെ വികാരം ബിജെപി സ്ഥാനാര്‍ഥി ഒ.രാജഗോപാലിന്റെ വോട്ട്‌ നിലയില്‍ പ്രതിഫലിക്കുമെന്ന്‌ എസ്‌എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. എസ്‌എന്‍ഡിപി യോഗം കൗണ്‍സിലിന്‌ ശേഷം മാധ്യമ പ്രവര്‍ത്തകരോട്‌ സംസാരിക്കുകയായിരുന്നു അദ്ദേഹം.
ന്യൂനപക്ഷ പ്രീണനങ്ങള്‍ക്കെതിരായ വികാരവും തെരഞ്ഞെടുപ്പിലുണ്ടാകും. മുന്നണികള്‍ ആര് വിജയിച്ചാലും ഭരണം പോകില്ല. ബിജെപി വിജയിച്ചാല്‍ താമര വിരിഞ്ഞുവെന്ന്‌ പറയാം. കഴിഞ്ഞതവണ വിജയിച്ചയാള്‍ ഈപ്രാവശ്യം ചിഹ്നം മാറി മത്സരിക്കുന്നു. മണ്ഡലത്തിലെ പ്രബുദ്ധരായ സമുദായ അംഗങ്ങള്‍ രാഷ്‌ട്രീയത്തിനതീതമായി ഏറെ പ്രയോജനകരമായി പ്രവര്‍ത്തിക്കുന്ന ഇച്ഛാശക്തിയുള്ളവരെ വിജയിപ്പിക്കാന്‍ കൗണ്‍സില്‍ ആഹ്വാനം നല്‍കിക്കഴിഞ്ഞു. രാജ്യത്തിന്‌ ഗുണം ചെയ്യുന്നവരെ വേണം വിജയിപ്പിക്കാനെന്നും അദ്ദേഹം പറഞ്ഞു.
രാഷ്‌ട്രീയ കൊലപാതകങ്ങള്‍ നടന്നിട്ടുണ്ടെന്ന്‌ മണി പറഞ്ഞത്‌ സത്യമാണെങ്കിലും പറഞ്ഞത്‌ അനവസരത്തിലായിപ്പോയി. കൊലപാതകവും മണിയുടെ പ്രസ്താവനയും നെയ്യാറ്റിന്‍കര ഉപതെരഞ്ഞെടുപ്പിനെ ബാധിക്കും. സിപിഎമ്മിന്റെ പ്രാദേശിക നേതൃത്വത്തിന്റെ അപക്വമായ നിലപാടാണ്‌ ടി.പി.ചന്ദ്രശേഖരന്റെ കൊലപാതകമെന്നും വെള്ളാപ്പള്ളി പറഞ്ഞു.
പ്രതികരിക്കാൻ ഇവിടെ എഴുതുക: