പന്ത്രണ്ടാം പഞ്ചവത്സര പദ്ധതിയുടെ ഒന്നാംവര്‍ഷത്തെ അടങ്കല്‍ തുകയും അഞ്ചുവര്‍ഷത്തെ അടങ്കല്‍ തുകയും ആസൂത്രണ ബോര്‍ഡ്‌ അംഗീകരിച്ചിരിക്കുന്നു. അതനുസരിച്ച്‌ ആദ്യവര്‍ഷത്തെ അടങ്കല്‍ തുക 14,000 കോടി രൂപയും അഞ്ചുവര്‍ഷത്തേക്ക്‌ 1,05,000 കോടി രൂപയുമാണ്‌ നിശ്ചയിച്ചിരിക്കുന്നത്‌. പദ്ധതിയുടെ മുഖ്യലക്ഷ്യം ആവര്‍ത്തനവിരസമായിക്കഴിഞ്ഞ കൃഷിക്കുള്ള ഊന്നല്‍ എന്ന പ്രഖ്യാപനമാണ്‌. നൂറ്‌ ശതമാനം നിക്ഷേപ വര്‍ധനയാണ്‌ ലക്ഷ്യം.
പച്ചക്കറികൃഷി ലക്ഷ്യമിടുന്നത്‌ ഇരട്ടി ഉല്‍പ്പാദനത്തിനാണ്‌. ഈ വര്‍ഷത്തേതിനേക്കാള്‍ ഇരട്ടി അടുത്തവര്‍ഷം കൃഷിക്കായി നീക്കിവെക്കുമെന്ന്‌ പ്രഖ്യാപനമുണ്ട്‌. അടുത്ത ഊന്നല്‍ ഊര്‍ജ മേഖലക്കാണ്‌. ഇലക്ട്രിസിറ്റി ഉല്‍പാദനവും ഇരട്ടിയാക്കാനാണ്‌ ലക്ഷ്യം. ഈ പഞ്ചവത്സര പദ്ധതി ഊന്നല്‍ നല്‍കുന്നത്‌ കാര്‍ഷിക-ആരോഗ്യമേഖല കഴിഞ്ഞാല്‍ പിന്നീട്‌ വിദ്യാഭ്യാസത്തിനും ക്ഷീരമേഖലക്കുമാണ്‌. ഉന്നതവിദ്യാഭ്യാസ മേഖലക്ക്‌ 42 ശതമാനം. മെഡിക്കല്‍ വിദ്യാഭ്യാസ-പൊതുജനാരോഗ്യ മേഖലക്ക്‌ 77 ശതമാനം അധികം വിഹിതം നല്‍കുന്ന പദ്ധതിയാണിത്‌. കേന്ദ്ര പദ്ധതികളുടെ പൂര്‍ണമായ വിനിയോഗം ഉറപ്പാക്കുന്നതിന്‌ പ്രോജക്ട്‌ ഫൈനാന്‍സ്‌ സെല്‍ രൂപീകരിച്ച്‌ പുറമെനിന്നും ലഭിക്കുന്ന വികസനപദ്ധതികള്‍ സമയബന്ധിതമായി പൂര്‍ത്തിയാക്കുന്നതിന്‌ ശ്രദ്ധ കേന്ദ്രീകരിക്കുകയും കേന്ദ്രസഹായം പരമാവധി നേടിയെടുക്കാന്‍ ശ്രമിക്കുകയും ചെയ്യുമെന്നും പ്രഖ്യാപനമുണ്ട്‌. പക്ഷെ കഴിഞ്ഞവര്‍ഷത്തെ പദ്ധതി വിനിയോഗം വെറും 40 ശതമാനം മാത്രമായിരുന്നു. പഞ്ചായത്ത്‌ സ്ഥാപനങ്ങള്‍ ചെലവിട്ടതാകട്ടെ വെറും 24 ശതമാനം.
നാല്‍പതിനായിരം കോടി രൂപയായിരുന്നല്ലോ കഴിഞ്ഞ പദ്ധതിവിഹിതം. അതായത്‌ ഒരുവര്‍ഷം 8000 കോടി രൂപ. ചെലവാക്കിയത്‌ ഈ വര്‍ഷം 800 കോടി മാത്രം. ഇപ്പോള്‍ ഈ സാമ്പത്തികവര്‍ഷം അവസാനിക്കാറായിരിക്കേ കൂടുതല്‍ ചെലവുകള്‍ ഉണ്ടാകുമെന്ന്‌ പ്രതീക്ഷിക്കുകയും വയ്യ. കേന്ദ്രഫണ്ട്‌ വിനിയോഗത്തില്‍ കേരളം വളരെ പുറകിലാണെന്ന ആരോപണത്തിന്‌ വര്‍ഷങ്ങളുടെ പഴക്കമുണ്ട്‌. തദ്ദേശസ്വയംഭരണ സ്ഥാപനങ്ങളും പ്ലാന്‍ ഫണ്ട്‌ ഉപയോഗത്തില്‍ പരാജയപ്പെടുന്നത്‌ അത്‌ ഏത്‌ വിധത്തില്‍ എങ്ങനെ ചെലവുചെയ്യണമെന്ന അവബോധമില്ലായ്മ കൊണ്ടുകൂടിയാണ്‌. ഇവരെ കൂടുതല്‍ ബോധവല്‍ക്കരിക്കാന്‍ കൂടി സമാന്തര പരിശ്രമം ആവശ്യമാണ്‌. റോഡുകള്‍, കുടിവെള്ളം, വൈദ്യുതി, പൊതുജനാരോഗ്യം മുതലായ മേഖലകള്‍ അവഗണിക്കപ്പെട്ടു. കാര്‍ഷിക മേഖലക്കുള്ള ഊന്നല്‍ ആവര്‍ത്തിക്കുമ്പോഴും നിലമ്പൂരില്‍ നെല്ല്‌ വില്‍ക്കാനാകാതെ കര്‍ഷകര്‍ ദുരിതത്തില്‍ എന്ന വാര്‍ത്തയുണ്ട്‌. സമാന വാര്‍ത്തകള്‍ കുട്ടനാട്ടില്‍നിന്നും വരാറുണ്ട്‌. നെല്ലിന്‌ വിപണിയില്ലാത്തതും വിലയില്ലാത്തതുമാണ്‌ കര്‍ഷക പ്രതിസന്ധിക്ക്‌ നിദാനം. കര്‍ഷക ആത്മഹത്യയുടെ നാടായി മാറുന്ന കേരളത്തില്‍ കര്‍ഷകര്‍ പല കൃഷികളും ചെയ്യുന്നത്‌ ബാങ്ക്‌ വായ്പയും ബ്ലേഡ്‌ വായ്പയും എല്ലാം എടുത്താണെന്നത്‌ പൊതു അറിവാണ്‌. എന്നിട്ടും നെല്ല്‌ വാങ്ങാന്‍ പോലും ആളില്ലാത്ത അവസ്ഥ വരുമ്പോള്‍ സ്വാഭാവികമായും കര്‍ഷകര്‍ നിരാശയിലേക്ക്‌ കൂപ്പുകുത്തും. നിലമ്പൂരില്‍ ക്വിന്റലിന്‌ 850 രൂപ കച്ചവടക്കാര്‍ വിലമതിക്കുമ്പോള്‍ കര്‍ഷകരുടെ നിലപാട്‌ ആയിരം രൂപ കിട്ടിയാലും നഷ്ടമാണെന്നാണ്‌. ഇത്‌ തുടര്‍ക്കഥയാകുമ്പോഴും നെല്ല്‌ സംഭരണം എന്ന ആശയം വാക്കുകളില്‍ ഒതുങ്ങുന്നു.
ഈ പശ്ചാത്തലത്തില്‍ ആസൂത്രണ ബോര്‍ഡ്‌ പ്ലാനില്‍ കൃഷിക്ക്‌ നല്‍കുമെന്ന്‌ പ്രഖ്യാപിക്കുന്ന ഊന്നല്‍ പരിഹാസ്യമാകുകയാണ്‌. അടുത്ത ഊന്നല്‍ പച്ചക്കറി കൃഷിക്കാണ്‌. മുല്ലപ്പെരിയാര്‍ സമരം കൊടികുത്തി വാണപ്പോള്‍ തമിഴ്‌നാട്ടില്‍നിന്നും ചരക്ക് ലോറികള്‍ വരാതായപ്പോള്‍ കേരളത്തിലെ അടുക്കളകളുടെ ദുരവസ്ഥ ജനം അനുഭവിച്ചറിഞ്ഞതാണ്‌. പച്ചക്കറി കൃഷി കേരളത്തില്‍ അന്യമായപോലെ ക്ഷീരോല്‍പാദനവും ഇവിടെ നഷ്ടത്തിലാണ്‌. ഇപ്പോള്‍ മായം ചേര്‍ന്ന പാല്‍ കഴിച്ച്‌ പോഷകാഹാരക്കുറവ്‌ അനുഭവിക്കുന്ന കുട്ടികളും രോഗാതുരരായ മനുഷ്യരും വര്‍ധിക്കുമ്പോള്‍ ക്ഷീരോല്‍പാദനത്തിന്‌ 71 ശതമാനം വര്‍ധനയാണ്‌ പ്ലാന്‍ ലക്ഷ്യമിടുന്നത്‌. ആസൂത്രണ ബോര്‍ഡില്‍ ഇ. ശ്രീധരന്‍ ഉണ്ടെന്നതും റോഡ്‌ നിര്‍മാണം അദ്ദേഹത്തിന്റെ നിരീക്ഷണത്തിലാണെന്നതും ആശാവഹംതന്നെ. ഇത്രയധികം വിഹിതം നീക്കിവെച്ചിട്ടും ഹൈക്കോടതി പോലും പരാമര്‍ശിച്ചിട്ടും മഴ മാറി മാസങ്ങള്‍ കഴിഞ്ഞിട്ടും കേരളത്തിലെ റോഡുകളുടെ ശോച്യാവസ്ഥ പരിഹരിക്കപ്പെടുകയോ പുനര്‍നിര്‍മാണം പൂര്‍ത്തീകരിക്കുകയോ ചെയ്തിട്ടില്ല. അടുത്ത അഞ്ചുവര്‍ഷം കൊണ്ട്‌ ഒരു ലക്ഷം കോടി രൂപയുടെ പദ്ധതികള്‍ എന്ന്‌ പറഞ്ഞ്‌ ജനങ്ങളെ വ്യാമോഹിപ്പിക്കലല്ലാതെ ഇത്‌ പ്രാവര്‍ത്തികമാകുമെന്ന ശുഭപ്രതീക്ഷ പുലര്‍ത്താന്‍ കയ്പേറിയ അനുഭവങ്ങള്‍ മാത്രമുള്ള കേരളജനതക്കാവുമോ?
പ്രതികരിക്കാൻ ഇവിടെ എഴുതുക: