ചേര്ത്തല: കാര്യകര്ത്താവ് മരിച്ചാല് ദേഹം മാത്രമേ വിട്ടു പോകുന്നുള്ളൂവെന്നും അദ്ദേഹത്തിന്റെ ഗുണങ്ങള് സമൂഹമാകെ വ്യാപിക്കുമെന്നും ആര്എസ്എസ് ക്ഷേത്രീയ കാര്യകാര്യ സദസ്യന് പി.ആര്. ശശിധരന്. ബിജെപി ആലപ്പുഴ മേഖലാ സംഘടനാ സെക്രട്ടറിയും ആര്എസ്എസ് ശബരിഗിരി വിഭാഗ് മുന് കാര്യവാഹുമായിരുന്ന എല്. പദ്മകുമാറിന്റെ ശ്രദ്ധാഞ്ജലി ചടങ്ങില് അനുസ്മരണ പ്രഭാഷണം നടത്തുകയായിരുന്നു അദ്ദേഹം. പദ്മകുമാറില് കണ്ട ഗുണം വീരവ്രതമാണ്. ചെയ്യുന്ന പ്രവര്ത്തനം വിജയിപ്പിക്കുവാന് അദ്ദേഹത്തിന് കഴിയുമായിരുന്നു. കമ്മ്യൂണിസ്റ്റ് പ്രസ്ഥാനത്തിന്റെ ഈറ്റില്ലമായിരുന്ന ആലപ്പുഴയില് വീരവ്രതത്തോടെ അദ്ദേഹം പ്രവര്ത്തിച്ചു. സംഘം ഉദ്ദേശിക്കുന്ന ആദര്ശ ഗ്രാമമായി സ്വന്തം സ്ഥലമായ വളമംഗലത്തെ വളര്ത്തുവാന് പദ്മകുമാറിന് കഴിഞ്ഞു, പി.ആര്. ശശിധരന് പറഞ്ഞു.
ധൈര്യശാലിയായ കാര്യകര്ത്താവായിരുന്നു പദ്മകുമാറെന്ന് ആര്എസ്എസ് പ്രാന്ത ബൗദ്ധിക് പ്രമുഖ് പി. ഉണ്ണികൃഷ്ണന് അനുസ്മരിച്ചു. സാധാരണ ബിജെപി പ്രവര്ത്തകരെ കേള്ക്കാന് മനസുവെച്ച നേതാവായിരുന്നു പദ്മകുമാറെന്ന് ബിജെപി സംസ്ഥാന ഉപാദ്ധ്യക്ഷന് കെ. സോമന് പറഞ്ഞു.
ആര്എസ്എസ് ആലപ്പുഴ ജില്ലാ സംഘചാലക് റിട്ട. കേണല് എന്.എസ്. റാംമോഹന് അദ്ധ്യക്ഷനായി. തുറവൂര് താലൂക്ക് ഖണ്ഡ് സംഘചാലക് വാസുദേവന്, ആര്എസ്എസ് പ്രാന്ത സേവാ പ്രമുഖ് എം.സി. വത്സന്, ബിജെപി ജില്ലാ അധ്യക്ഷന് പണ്ടി.കെ. ബിനോയ്, സംസ്ഥാന സെക്രട്ടറി എം.വി. ഗോപകുമാര്, ആര്എസ്എസ് വിഭാഗ് വിദ്യാര്ത്ഥി പ്രമുഖ് സിനിഷ് മാധവന് തുടങ്ങിയവര് പങ്കെടുത്തു.
