തിരുവനന്തപുരം: ലോട്ടറി ക്ഷേമനിധി ബോര്ഡ് അഴിമതിയിലൂടെ തട്ടിയ പണത്തില് ആറ് കോടി രൂപ കത്തിച്ചെന്ന് പ്രതി സംഗീത് വിജിലന്സിന് മൊഴി നല്കി.നോട്ടുനിരോധനം കാരണമാണ് അഞ്ഞൂറിന്റെയും ആയിരത്തിന്റെയും നോട്ടുകള് കത്തിച്ചത്. സംഗീത് തട്ടിയെടുത്തത് പതിനാറ് കോടി രൂപയെന്നാണ് വിജിലന്സിന്റെ കണ്ടെത്തല്.
2017ല് പോങ്ങുമൂട്ടിലെ വീട്ടില് വച്ചാണ് ആറ് കോടി രൂപ കത്തിച്ചത്. ഫോറന്സിക് സംഘത്തോടൊപ്പം വിജിലന്സ് സ്ഥലത്തു പരിശോധന നടത്തി. 2012 മുതല് 2021 വരെയുള്ള കാലയളവിലാണ് തട്ടിപ്പ് നടന്നത്. ലോട്ടറി തൊഴിലാളികളടയ്ക്കുന്ന അംശാദായം സ്വന്തം അക്കൗണ്ടിലേക്കും സുഹൃത്തിന്റെ അക്കൗണ്ടിലേക്കും മാറ്റിയായിരുന്നു തട്ടിപ്പ്. ഈ പണം ഉപയോഗിച്ച് കഴക്കൂട്ടം സബ് രജിസ്ട്രാര് ഓഫിസില് മാത്രം 45 രജിസ്ട്രേഷന് നടത്തിയിട്ടുണ്ട്.
2012 മുതല് 2016 വരെ ഇയാള് വിവിധ അക്കൗണ്ടുകളിലേക്ക് പണം മാറിയിട്ടില്ല.എന്നാല് പല പേരുകളില് ചെക്കില് ഒപ്പിട്ടൊക്കെ ബാങ്കുകളില് നിന്ന് പണം പിന്വലിച്ചു. ഈ പണം എന്ത് ചെയ്തു എന്ന് ആദ്യം വെളിപ്പെടുത്തിയിരുന്നില്ല. വിശദ ചോദ്യം ചെയ്യലിലാണ് 6 കോടി രൂപ കത്തിച്ചെന്ന് ഇയാള് പറഞ്ഞത്.
2016ലാണ് നോട്ട് നിരോധിച്ചത്. ഈ സമയം താമസിച്ചിരുന്നത് പോങ്ങുമൂടിലെ വീട്ടിലാണ്.
