ഹൈദരാബാദ്: ഐപിഎല് പോയിന്റ് പട്ടികയില് ജയത്തോടെ ഒന്നാം സ്ഥാനത്തെത്താനിറങ്ങിയ സണ്റൈസേഴ്സ് ഹൈദരാബാദിന് കനത്ത ഷോക്ക്. സീസണില് ദുര്ബലരായി തുടരുന്ന കൊല്ക്കത്ത നൈറ്റ് റൈഡേഴ്സിനോട് ഹോം ടൗണില് ഏഴ് വിക്കറ്റിന്റെ ഞെട്ടിക്കുന്ന തോല്വി വഴങ്ങി.
മത്സരത്തില് ആദ്യം ബാറ്റ് ചെയ്ത ഹൈദരാബാദ് 19 ഓവറില് 165 റണ്സെടുത്ത് എല്ലാവരും പുറത്തായി. മൂന്ന് വിക്കറ്റ് മാത്രം നഷ്ടപ്പെടുത്തിയ വിരുന്നുകാര് 18.2 ഓവറില് 169 റണ്സെടുത്ത് മത്സരം സ്വന്തമാക്കി. മത്സരം ജയിച്ചിരുന്നെങ്കില് 14 പോയിന്റോടെ ഹൈദരാബാദ് ഒന്നാമതെത്തുമായിരുന്നു. 13 പോയിന്റുമായാണ് പഞ്ചാബ് കിങ്സ് മുന്നില് തുടരുന്നത്.
തകര്പ്പന് ബാറ്റിങ് കാഴ്ച്ചവച്ച ഹൈദരാബാദ് ഓപ്പണര് ട്രാവിസ് ഹെഡിനെ പുറത്താക്കി വരുണ് ചക്രവര്ത്തിയാണ് മത്സരത്തിന്റെ ഗതി മാറ്റിയത്. ഒമ്പതാം ഓവറിന്റെ അവസാന പന്തില് ഹെഡ് പുറത്താകുമ്പോള് സണ്റൈസേഴ്സ് രണ്ടിന് 105 എന്ന ശക്തമായ നിലയിലായിരുന്നു. ടോസ് നേടി ബാറ്റിങ് തെരഞ്ഞെടുത്ത ഹൈദരാബാദ് തട്ടുപൊളിപ്പന് തുടക്കമാണ് നല്കിയത്. അഭിഷേക് ശര്മയെ കാഴ്ച്ചക്കാരനാക്കി ഹെഡ് അടിച്ചു തകര്ത്തു. 3.4-ാം ഓവറില് അഭിഷേക്(15) പുറത്താകുമ്പോള് ഹൈദരാബാദ് സ്കോര് 44ലെത്തിയിരുന്നു. ഹെഡിനെ വരുണ് ചക്രവര്ത്തി പുറത്താക്കിയ ശേഷം ഹൈദരാബാദിന്റെ റണ്നിരക്ക് കുറയാന് തുടങ്ങി. ഒമ്പത് ബൗണ്ടറികളും മൂന്ന് സിക്സറും സഹിതം 28 പന്തില് 61 റണ്സ് ആണ് ഹെഡ് നേടിയത്. പിന്നീട് ഇഷാന് കിഷന്(42) ഒരു ഘട്ടം വരെ പൊരുതി നിന്നത് മാത്രമാണ് ഹൈദരാബാദിന് ആശയും പ്രതീക്ഷയുമായത്. 16-ാം ഓവറില് ഹൈദരാബാദ് സ്കോര് 148ലെത്തിനില്ക്കെയായിരുന്നു ഇഷാന്റെ പുറത്താകല്. വൈകാതെ ടീം നിലംപതിക്കുകയും ചെയ്തു. ഹിറ്റ് ബാറ്റര് ഹെന്റിച്ച് ക്ലാസ്സന്(11) കാര്യമായൊന്നും ചെയ്യാനാകാതെ പുറത്തായി.
മൂന്ന് വിക്കറ്റുകള് നേടിക്കൊണ്ട് വരുണ് ചക്രവര്ത്തി കരുത്തറിയിച്ച ഇന്നിങ്സില് കൊല്ക്കത്തയ്ക്ക് വേണ്ടി സുനില് നരൈനും കാര്തിക് ത്യാഗിയും രണ്ട് വീതം വിക്കറ്റുകള് നേടി.
മറുപടി ബാറ്റിങ്ങില് അനായാസം മുന്നേറിയ കൊല്ക്കത്തയ്ക്കായി ക്യാപ്റ്റന് അജിങ്ക്യ രഹാനെ(43)യും ഫിന് അല്ലെനും(29) ചേര്ന്ന് മികച്ച തുടക്കം നല്കി. പിന്നീടെത്തിയ അംങ്ക്രിഷ് രഘുവംശി(59) അര്ദ്ധ സെഞ്ചുറി പ്രകടനത്തോടെയാണ് മടങ്ങിയത്. റിങ്കു സിങ്ങിനൊപ്പം(22) കാമറോണ് ഗ്രീന്(മൂന്ന്) കൊല്ക്കത്തയുടെ വിജയം വരെ ക്രീസില് നിന്നു. പാറ്റ് കമ്മിന്സ്, ശിവാഗ് കുമാര്, സാക്കിബ് ഹുസൈന് എന്നിവര് ഹൈദരാബാദിനായി ഓരോ വിക്കറ്റുകള് നേടി. വരുണ് ചക്രവര്ത്തി കളിയിലെ താരമായി.
