ശ്രീനഗര്: ജമ്മു-ശ്രീനഗര് ആദ്യ വന്ദേഭാരത് സര്വീസ് ആരംഭിച്ചു. ജമ്മു താവി റെയില്വേ സ്റ്റേഷനില് നിന്നുള്ള വന്ദേഭാരത് ട്രെയിന് കേന്ദ്ര റെയില്വേ മന്ത്രി അശ്വിനി വൈഷ്ണവ് ഫ്ലാഗ് ഓഫ് ചെയ്തു. മുഖ്യമന്ത്രി ഒമര് അബ്ദുള്ള, കേന്ദ്രമന്ത്രി ജിതേന്ദ്ര സിങ് തുടങ്ങിയവര് ചടങ്ങില് പങ്കെടുത്തു. നേരത്തെ ശ്രീനഗറിനും കത്രയ്ക്കും ഇടയില് ഉണ്ടായിരുന്ന സര്വീസാണ് ജമ്മുവിലേക്ക് നീട്ടിയത്. കോച്ചുകളുടെ എണ്ണം എട്ടില് നിന്ന് 20 ആയി ഉയര്ത്തി. വന്ദേഭാരത് സര്വീസ് ആരംഭിച്ചതോടെ ജമ്മുവില് നിന്ന് ശ്രീനഗറിലേക്കുള്ള യാത്രാസമയം നാല് മണിക്കൂര് 50 മിനിറ്റായി കുറഞ്ഞു.
ഏകദേശം 266 കിലോമീറ്റര് ദൂരം വരുന്ന പാതയില് രണ്ട് ട്രെയിനുകള് സര്വീസ് നടത്തും. ജമ്മു താവി റെയില്വേ സ്റ്റേഷനില് നിന്ന് രാവിലെ 6.20ന് പുറപ്പെടുന്ന ആദ്യ ട്രെയിന് (26401) രാവിലെ 11.10ന് ശ്രീനഗറില് എത്തും. കത്രയിലെ ശ്രീമാതാ വൈഷ്ണോ ദേവി, റിയാസി, ബനിഹാള് എന്നിവിടങ്ങളില് ട്രെയിനിന് സ്റ്റോപ്പ് ഉണ്ടാകും. ശ്രീനഗറില് നിന്ന് വൈകുന്നേരം രണ്ട് മണിക്ക് തിരിക്കുന്ന ട്രെയിന് (26402) വൈകുന്നേരം 6.50ന് ജമ്മു താവിയില് എത്തിച്ചേരും. ചൊവ്വാഴ്ച ഒഴികെ ആഴ്ചയില് ആറ് ദിവസവും സര്വീസ് ഉണ്ടാകും.
ശ്രീനഗറില്നിന്ന് രാവിലെ എട്ട് മണിക്ക് പുറപ്പെടുന്ന രണ്ടാമത്തെ ട്രെയിന് (26404) ഉച്ചയ്ക്ക് 12.40ഓടെ ജമ്മു താവിയില് എത്തും. ബനിഹാള്, കത്ര എന്നിവിടങ്ങളില് സ്റ്റോപ്പ് ഉണ്ടാകും. ഉച്ചയ്ക്ക് 1.20ന് ജമ്മു താവിയില് നിന്ന് തിരിക്കുന്ന ഇതേ ട്രെയിന് (26403) വൈകുന്നേരം ആറ് മണിക്ക് ശ്രീനഗറില് എത്തും. ഇന്നലെ മുതല് പുതിയ ട്രെയിനുകള് ജമ്മു – ശ്രീനഗര് റൂട്ടില് സര്വീസ് ആരംഭിച്ചു.
ജമ്മു കശ്മീരിലെ റെയില് ശൃഖംല ആധുനികവത്കരിക്കാനുള്ള ദീര്ഘനാളത്തെ ശ്രമങ്ങളുടെ ഫലമാണ് വന്ദേഭാരത് എക്സ്പ്രസ് ട്രെയിനിന്റെ വരവ്. കഴിഞ്ഞ വര്ഷം കത്രയ്ക്കും ശ്രീനഗറിനും ഇടയിലെ ആദ്യ വന്ദേഭാരത് ട്രെയിന് പ്രധാനമന്ത്രി നരേന്ദ്ര മോദിയാണ് ഉദ്ഘാടനം ചെയ്തത്.
