തിരുവനന്തപുരം (പേയാട്): മലയാളികളെ സംബന്ധിച്ച് നീര്‍മാതളം കാല്പനികതയുടെയും കൗതുകത്തിന്റെയും പ്രതീകമാണ്. മലയാളത്തിലെ പ്രിയ എഴുത്തുകാരി മാധവിക്കുട്ടി എഴുതിയ പ്രശസ്തമായ ആത്മകഥാപരമായ ഓര്‍മ്മക്കുറിപ്പുകളുടെ പുസ്തകമാണ് ‘നീര്‍മാതളം പൂത്ത കാലം’.
ഗ്രാമീണ ബാല്യത്തിന്റെ ഗൃഹാതുരത്വമുണര്‍ത്തുന്ന അനുഭവങ്ങളും, പ്രണയവും, പ്രകൃതിഭംഗിയും നിറയുന്ന ഈ കൃതി മലയാള സാഹിത്യത്തിലെ മികച്ച ഓര്‍മ്മക്കുറിപ്പുകളില്‍ ഒന്നായി കണക്കാക്കപ്പെടുന്നു. അതുകൊണ്ടു തന്നെ കേരളത്തിലെ നീര്‍മാതളങ്ങളെല്ലാം പ്രിയപ്പെട്ട എഴുത്തുകാരിയുടെ നിത്യസ്മാരകങ്ങളായാണ് സാഹിത്യപ്രേമികള്‍ കാണുന്നത്. ഇപ്പോഴിതാ, തിരുവനന്തപുരം പേയാട് കണ്ണശ മിഷന്‍ ഹൈസ്‌കൂളിലും പ്രിയപ്പെട്ട എഴുത്തുകാരിയുടെ ഓര്‍മ്മകള്‍ പേറുന്ന നീര്‍മാതളം പൂത്തിരിക്കുകയാണ്.
കണ്ണശയുടെ ഔഷധത്തോട്ടത്തിലെ നീര്‍മാതളമാണ് പൂത്തുലഞ്ഞത്. നാലുവര്‍ഷങ്ങള്‍ക്കു മുമ്പ് സ്‌കൂളിലെ പരിസ്ഥിതി ക്ലബ് കുട്ടികള്‍ നട്ടു നനച്ചു വളര്‍ത്തിയ നിര്‍മ്മാതാളം ആദ്യമായാണ് പൂവിടുന്നത്. കുട്ടികളും പ്രദേശവാസികളായ നാട്ടുകാരും ഉള്‍പ്പെടെ നിരവധി പേരാണ് കണ്ണശയിലെ നീര്‍മാതളം പൂത്തകാലം കണ്ടാസ്വദിക്കുവാനായി ഇവിടേക്ക് എത്തുന്നത്.
കണ്ണശയില്‍ കുട്ടികള്‍ക്ക് പ്രകൃതിയോട് അടുത്ത ഇടപഴകാനും അപൂര്‍വ്വ വൃക്ഷങ്ങള്‍ കണ്ടറിയാനും തൊട്ടറിയാനുമായി അനേകം അപൂര്‍വ്വ വൃക്ഷങ്ങളാണ് നട്ടുവളര്‍ത്തുന്നത്. ശിമ്ശിപ, വയ്യങ്കത, കാഞ്ഞിരം, അത്തി, ഞാവല്‍, കരിങ്ങാലി, കരിമ്പന, നാഗദന്തം, പ്ലാശ്, ഇത്തി, അമ്പഴം, കൂവളം, നീര്‍മരുത്, വയ്യങ്കത, ഇലഞ്ഞി, വെട്ടി, പ്ലാശ്, വഞ്ചി, പ്ലാശ്, വഹ്നി, കടമ്പ് എന്നിവയോടൊപ്പം നീര്‍മാതളവും കുട്ടികളുടെ പരിചരണമേറ്റ് തഴച്ചുവളരുന്നു.
ഒരു ഔഷധസസ്യമാണ് നീര്‍മാതളം. പുഴകളുടേയും തോടുകളുടേയും അരികിലായി ഇവ കാണപ്പെടുന്നു. സംസ്‌കൃതത്തില്‍ വരുണം, പശുഗന്ധ, അശ്മരീഘ്‌ന, തിക്ത്ഃ എന്നിങ്ങനേയും ഈ ഔഷധസസ്യം വിളിക്കപ്പെടുന്നു.
ജന്മഭൂമി ഓണ്‍ലൈന്‍