മുംബൈ:സാധാരണ ഇന്ത്യയിലെ കാണാക്കാഴ്ചകളാണ് സമൂഹമാധ്യമപേജുകളില് വ്യവസായിയായ ആനന്ദ് മഹീന്ദ്ര പങ്കുവെയ്ക്കാറുള്ളതെങ്കില് ഇക്കുറി കൂട്ടത്തോടെ പാഞ്ഞടുത്ത് വരുന്ന ഡ്രോണുകളെ ഒറ്റയടിക്ക് കൊന്നുകളയാന് സഹായിക്കുന്ന പുത്തന് സാങ്കേതികവിദ്യയെക്കുറിച്ചാണ് പറയുന്നത്.മൈക്രോവേവ് ടെക്നോളജി എന്നാണ് ഇതിനെ ആനന്ദ് മഹീന്ദ്ര വിളിക്കുന്നത്.
വെട്ടുകളികളെപ്പോലെ ഒന്നിച്ച് കൂട്ടംകൂട്ടമായി പറന്നുവരുന്ന സ്വാം ഡ്രോണുകള് ആണ് ഇന്ന് ഏറ്റവും വലിയ ഭീഷണി. ചിലപ്പോള് ഒരു ഗ്രൂപ്പില് 100ഓ 200ഓ ഡ്രോണുകളുണ്ടാകും. ഇവയെ ഒറ്റയടിക്ക് മിസൈല് വിട്ട് തകര്ക്കുക എളുപ്പമല്ല. ഇതിന് വേണ്ടിയാണ് അമേരിക്കയും ഇസ്രയേലും യൂറോപ്യന് രാജ്യങ്ങല് ലേസര് ആയുധങ്ങള് കണ്ടുപിടിച്ചത്.
ശക്തമായ ലേസറുകള് അയച്ചാല് ഡ്രോണുകള് ചാരമായി താഴെ വീഴും എന്നതാണ് സങ്കല്പം. പക്ഷെ അഞ്ചോ പത്തോ ഡ്രോണുകളെ ഇങ്ങിനെ ചെയ്യാന് കഴിഞ്ഞേക്കാം. പക്ഷെ കൂട്ടത്തോടെ നൂറുകണക്കിന് ഡ്രോണുകള് വന്നാല് എന്ത് ചെയ്യും? പലപ്പോഴും വലിയൊരു സംഘത്തിലെ ഏതാനും ഡ്രോണുകള് ലേസര് ആക്രമണങ്ങളുടെ കണ്ണുവെട്ടിച്ച് ശത്രുലക്ഷ്യം തകര്ക്കുക പതിവാണ്.
ഇവിടെയാണ് മൈക്രോവേവ് ടെക്നോളജി സഹായകരമാകുന്നതെന്ന് ആനന്ദ് മഹീന്ദ്ര വിശദീകരിക്കുന്നു. ഒറ്റ പള്സുകൊണ്ട് ഹൈ പവര് മൈക്രോവേവ് ആയുധങ്ങള്ക്ക് നൂറുകണക്കിന് ഡ്രോണുകളെ നശിപ്പിക്കാന് കഴിയുമെന്നും ഇവയുടെ ചെലവ് തീരെ കുറവാണെന്നും ആനന്ദ് മഹീന്ദ്ര പറയുന്നു.
ആനന്ദ് മഹീന്ദ്രയ്ക്ക് ഒരു ആയുധ നിര്മ്മാണക്കമ്പനിയുണ്ട്. മഹീന്ദ്ര ഡിഫന്സ് സിസ്റ്റംസ് എന്നാണ് ഈ കമ്പനിയുടെ പേര്. മൈക്രോവേവ് ആയുധങ്ങളെക്കുറിച്ച് പറയുക വഴി ഡ്രോണുകളെ നശിപ്പിക്കാനുള്ള ചെലവ് കുറഞ്ഞ സാങ്കേതിക വിദ്യയെക്കൂടിയാണ് ആനന്ദ് മഹീന്ദ്ര പരിചയപ്പെടുത്തുന്നത്. ഇപ്പോള് ഡ്രോണുകള് എന്നത് തീരെ ചെലവ് കുറഞ്ഞ ആയുധമാണ്. ഇതിനെ പ്രതിരോധിക്കാനുള്ള മിസൈല് ഉള്പ്പെടെയുള്ള ആയുധങ്ങള് ചെലവേറിയതുമാണ്. ഇവിടെയാണ് വ്യോമപ്രതിരോധത്തിന് ചെലവ് കുറഞ്ഞ മാര്ഗ്ഗമായി ഹൈപവര് മൈക്രോവേവ് ആയുധങ്ങളെ ആശ്രയിക്കാമെന്ന് ആനന്ദ് മഹീന്ദ്ര പറയുന്നത്.
