കോഴിക്കോട്: പാര്ലമെന്റിലും സംസ്ഥാന നിയമസഭകളിലും സ്ത്രീകള്ക്ക് 33 ശതമാനം സീറ്റുകള് സംവരണം ചെയ്യുന്നതിനുള്ള വനിതാ സംവരണ നിയമത്തെ സ്വാഗതം ചെയ്ത് മഹിളാമോര്ച്ച സംസ്ഥാന വ്യാപകമായി നാരീശക്തി സമ്മേളനങ്ങള് നടത്തുമെന്ന് സംസ്ഥാന അധ്യക്ഷ നവ്യ ഹരിദാസ് വാര്ത്താസമ്മേളനത്തില് അറിയിച്ചു. സ്ത്രീ ശാക്തീകരണം ലക്ഷ്യമാക്കി നരേന്ദ്ര മോദി സര്ക്കാര് മുന്നോട്ടുവച്ച ചരിത്രപരമായ നിയമമാണ് നാരീശക്തിവന്ദന് അധിനിയം. ഇതിനെ രാഷ്ട്രീയഭേദമന്യേ സ്ത്രീ സമൂഹം സ്വാഗതം ചെയ്യും. സ്ത്രീ സമൂഹത്തിന്റെ പിന്തുണ ഉറപ്പാക്കി നാരീശക്തി പദയാത്രകള്, ബൈക്ക് റാലികള് എന്നിവ സംഘടിപ്പിക്കും. ഏപ്രില് 11 മുതല് 16 വരെ നാരീശക്തി സമ്മേളനങ്ങളും 15,16 തിയതികളില് പദയാത്രകളും സംഘടിപ്പിക്കും. പുതിയ നിയമം പ്രാബല്യത്തില് വരുന്നതോടെ ലോക്സഭയില് 271 വനിതാ പ്രതിനിധികള് ഉണ്ടാവും. ഇക്കഴിഞ്ഞ നിയമസഭാ തെരഞ്ഞെടുപ്പില് സ്ത്രീകള്ക്ക് എന്ഡിഎ നല്ല പ്രാമുഖ്യം നല്കി. 19 സീറ്റുകളിലാണ് വനിതാ സ്ഥാനാര്ത്ഥികള് മത്സരിച്ചത്, നവ്യ ഹരിദാസ് പറഞ്ഞു.
കേരളത്തില് ബിജെപി മൂന്നാംശക്തിയായി മാറിക്കഴിഞ്ഞെന്നും പാര്ട്ടിക്ക് മികച്ച സ്വീകാര്യത ലഭിച്ചെന്നും അവര് പറഞ്ഞു. അടുത്ത നിയമസഭയില് നിര്ണായക ശക്തിയായി ബിജെപി ഉണ്ടാവും. കേരളത്തില് ശക്തമായ ത്രികോണ മത്സരമാണ് നടന്നത്. നിരവധി മണ്ഡലങ്ങളില് ബിജെപി വിജയിക്കും. ബിജെപി ജയിക്കുന്ന പാര്ട്ടിയാണെന്ന വിശ്വാസം വോട്ടര്മാര്ക്കിടയില് ഉണ്ടായിട്ടുണ്ട്. ജാതിയും മതവും പറഞ്ഞല്ല, മോദി സര്ക്കാരിന്റെ വികസന സമീപനം കേരളത്തിലും നടപ്പാക്കുമെന്ന ഉറപ്പാണ് ബിജെപി നല്കിയത്.
കോഴിക്കോട് നോര്ത്ത് മണ്ഡലത്തില് ഇടതുമുന്നണി പ്രചരിപ്പിച്ച നോട്ടീസിനെതിരെ നിയമ നടപടി സ്വീകരിക്കും. മതം, മതചിഹ്നങ്ങള് എന്നിവ ഉപയോഗിച്ച് തെരഞ്ഞെടുപ്പ് പ്രചരണം നടത്തി ഇടതുമുന്നണി ചട്ടങ്ങള് ലംഘിച്ചിരിക്കുകയാണ്. ക്ഷേത്ര സംരക്ഷണ സമിതിയുടെ പേരില് വ്യാജ പ്രചരണം നടത്തി. സമിതി നിയമ നടപടി സ്വീകരിച്ചിട്ടുണ്ട്, അവര് പറഞ്ഞു.
മഹിളാമോര്ച്ച സംസ്ഥാന ജനറല് സെക്രട്ടറി ശ്രീജ സി. നായര്, ജില്ലാ പ്രസിഡന്റ് വിന്ധ്യ സുനില്, ബിജെപി സംസ്ഥാന സമിതി അംഗം സരിത പറയേരി, ജില്ലാ വൈസ് പ്രസിഡന്റ് അനുരാധ തായാട്ട് എന്നിവര് വാര്ത്താസമ്മേളനത്തില് പങ്കെടുത്തു.
