തിരുവനന്തപുരം: വൈറല് താരത്തിന് ‘റിയല് കേരള സ്റ്റോറി’ വിവാഹം നടത്തി നല്കിയ സിപിഎം നേതാക്കള് നെട്ടോട്ടത്തില്. വിവാഹ സമയത്ത് പെണ്കുട്ടിക്ക് പ്രായ പൂര്ത്തിയായിരുന്നില്ലെന്ന ദേശീയ പട്ടികവര്ഗ കമ്മിഷന്റെ കണ്ടെത്തലിനെത്തുടര്ന്ന് ഭര്ത്താവ് ഫര്മാന് ഖാനെതിരേ മധ്യപ്രദേശ് പോലീസ് പോക്സോ കേസെടുത്തതോടെയാണ് റിയല് കേരള സ്റ്റോറി എന്ന് പറഞ്ഞ് വിവാഹത്തിന് നേതൃത്വം നല്കിയ സിപിഎം സംസ്ഥാന സെക്രട്ടറി എം.വി. ഗോവിന്ദനും മന്ത്രി വി. ശിവന്കുട്ടിയും സിപിഎം തിരുവനന്തപുരം ജില്ലാസെക്രട്ടറി എ.എ. റഹീം എംപിയും ഉള്പ്പെടെ കുടുക്കിലായത്.
കഴിഞ്ഞ മാര്ച്ച് 11നാണ് തിരുവനന്തപുരം അരുമാനൂര് ശ്രീനൈനാര് ദേവ ക്ഷേത്രത്തില് സിപിഎം നേതാക്കളുടെ മുഖ്യകാര്മികത്വത്തില് വൈറല് താരത്തിന്റെ കല്യാണം നടത്തിയത്. തിരുവനന്തപുരത്തെ സിനിമാ ലൊക്കേഷനില് നിന്ന് കുട്ടിയെ നാട്ടിലേക്ക് കൂട്ടിക്കൊണ്ടുപോകാന് അച്ഛന് ശ്രമിച്ചതോടെയാണ് വൈറല് വിവാഹത്തിലേക്ക് നീങ്ങിയത്. വിഷയം തമ്പാനൂര് പോലീസിന്റെ പരിഗണനയിലേക്ക് വന്നെങ്കിലും പെണ്കുട്ടിക്ക് 18 തികഞ്ഞെന്ന് വ്യക്തമാക്കുന്ന ജനന സര്ട്ടിഫിക്കറ്റും ആധാറും ഭര്ത്താവ് സ്റ്റേഷനില് നല്കി. തുടര്ന്നാണ് പെണ്കുട്ടിയെ ഇയാള്ക്കൊപ്പം വിട്ടത്. എന്നാല് ഈ സര്ട്ടിഫിക്കറ്റ് വ്യാജമെന്നാണ് ദേശീയ പട്ടികവര്ഗ കമ്മിഷന് കണ്ടെത്തിയത്. തുടര്ന്നാണ് നിയമ നടപടിയിലേക്ക് പട്ടികവര്ഗ കമ്മിഷന് നീങ്ങിയത്.
എം.വി. ഗോവിന്ദന്, മന്ത്രി വി. ശിവന്കുട്ടി, എ.എ. റഹീം എന്നിവരുടെ നേതൃത്വത്തിലായിരുന്നു വിവാഹം. ഇതാണ് യഥാര്ത്ഥ കേരള സ്റ്റോറി. മതനിരപേക്ഷതയുടെ അങ്ങേയറ്റം എന്നാണ് ഗോവിന്ദന് പറഞ്ഞത്. കേരളത്തിലെ ജനങ്ങള്ക്ക് അഭിമാനിക്കാമെന്നും മറ്റ് സംസ്ഥാനങ്ങളില് ആയിരക്കണക്കിന് പേര് സമ്മര്ദത്തിന് വിധേയമായി കഴിയുകയാണെന്നുമായിരുന്നു ശിവന്കുട്ടി പറഞ്ഞത്. ഏത് മതത്തില്പ്പെട്ടവരെയും വിവാഹം കഴിക്കാന് നിര്ഭയം സാധ്യമാകുന്ന ഏക സംസ്ഥാനമാണ് കേരളമെന്നാണ് റഹീം പറഞ്ഞത്. ലൗജിഹാദിന്റെ കഥ പറഞ്ഞ കേരള സ്റ്റോറി-2 സിനിമക്കെതിരേയുള്ള ആയുധമായി സിപിഎം വിവാഹത്തെ ഉപയോഗിക്കുകയും ചെയ്തു.
എന്നാല് പോക്സോ കേസ് എടുത്തതോടെ മൂന്ന് നേതാക്കളും പ്രതികരിച്ചിട്ടില്ല. മിശ്രവിവാഹത്തെയാണ് അനുകൂലിച്ചതെന്ന് മാത്രം പറഞ്ഞ് സിപിഎം ജനറല് സെക്രട്ടറി എം.എ. ബേബി തലയൂരി. ആധാര്കാര്ഡ് പരിശോധിച്ചതാണെന്നും എന്നാല് വയസ് തനിക്ക് അറിയില്ലെന്നുമാണ് സിപിഐ സംസ്ഥാന സെക്രട്ടറി ബിനോയ് വിശ്വം പ്രതികരിച്ചത്.
തദ്ദേശ സ്വയംഭരണ വകുപ്പും കുടുങ്ങും
തമ്പാനൂര് പോലീസും സിപിഎം നേതാക്കളും മാത്രമല്ല, വൈറല് വിവാഹത്തിന് ഉടനടി വിവാഹ സര്ട്ടിഫിക്കറ്റ് നല്കിയ സംസ്ഥാന തദ്ദേശ സ്വയംഭരണ വകുപ്പും പ്രതിക്കൂട്ടിലാണ്. ഉടനടി സര്ട്ടിഫിക്കറ്റ് നല്കിയത് സിപിഎമ്മും പിണറായി സര്ക്കാരും വലിയ നേട്ടമായാണ് ചൂണ്ടിക്കാണിച്ചത്. പോക്സോ കേസ് എടുത്തതോടെ സിപിഎം നേതാക്കളും മന്ത്രിയും നിയമനടപടികള് നേരിടേണ്ടിവരുമെന്ന് നിയമവിദഗദ്ധര് ചൂണ്ടിക്കാട്ടുന്നു. വനവാസി പെണ്കുട്ടിയുടെ ബാല വിവാഹം, പോക്സോ കേസ്, ഇവ മറച്ചുവയ്ക്കല്, കുട്ടിക്ക് നേരേയുള്ള ലൈംഗികാതിക്രമം, കുറ്റകൃത്യത്തിന് സഹായിക്കല്, ആധാറും ജനന സര്ട്ടിഫിക്കറ്റും നിര്മിക്കല്, അറിഞ്ഞുകൊണ്ട് വ്യാജ സര്ട്ടിഫിക്കറ്റ് നല്കല്, ജുവനൈല് ജസ്റ്റിസ് ആക്ട്, എസ്സി-എസ്ടി അതിക്രമം തടയല് ഉള്പ്പെടെ ഗുരുതര വകുപ്പുകള് വിവാഹത്തിന് കൂട്ടുനിന്നവര്ക്കെതിരേയും എടുക്കാന് കഴിയുമെന്ന് നിയമവിദഗ്ദ്ധര് പറയുന്നു.
