സമഗ്ര പൊതുജനാരോഗ്യത്തിനും സമൂഹക്ഷേമത്തിനുമായി ഹോമിയോപ്പതി മുന്നോട്ടുവെക്കുന്ന കാഴ്ചപ്പാടുകള് എന്തെല്ലാമാണ്? ഈ വര്ഷത്തെ ലോക ഹോമിയോപ്പതി ദിനത്തോടനുബന്ധിച്ച് ഐ.എച്ച്.കെ (ഠവല കിേെശൗേശേീി ീള ഒീാീലീുമവേ െഗലൃമഹമ) മുന്നോട്ടുവെക്കുന്ന പ്രമേയം വളരെ വലിയൊരു സന്ദേശമാണ് സമൂഹത്തിന് നല്കുന്നത്.
എല്ലാ വര്ഷവും ഏപ്രില് 10-ന് ലോക ഹോമിയോപ്പതി ദിനമായി ആചരിക്കുന്നു. ഹോമിയോപ്പതിയുടെ ഉപജ്ഞാതാവായ ഡോ. സാമുവല് ഹാനിമാന്റെ ജന്മദിനത്തോടനുബന്ധിച്ചാണ് ഈ ദിനം ആചരിക്കുന്നത്.
1. സമഗ്ര ആരോഗ്യ സമീപനം
ഹോമിയോപ്പതി വ്യക്തിയെയും സമൂഹത്തെയും ഒരുമിച്ച് കാണുന്ന ഒരു സമഗ്ര ആരോഗ്യസമീപനമാണ് പുലര്ത്തുന്നത്. സമഗ്ര പൊതുജനാരോഗ്യം എന്ന ആശയം ഓര്മ്മിപ്പിക്കുന്നത് ആരോഗ്യം എന്നത് കേവലം രോഗനാമങ്ങളില് ഒതുങ്ങുന്ന ഒന്നല്ല എന്നാണ്. ശരീരത്തിലെ ചെറിയ മാറ്റങ്ങള്, ആവര്ത്തിച്ചു വരുന്ന അസ്വസ്ഥതകള്, ഉറക്കത്തിലെ വ്യത്യാസങ്ങള്, ഭക്ഷണരീതിയിലെ മാറ്റങ്ങള്, ഊര്ജ്ജക്കുറവ്, പൊതുവായ അസന്തുലിതാവസ്ഥകള് എന്നിവയെല്ലാം ആരോഗ്യത്തിന്റെ ഭാഗമാണ്.
ഒരാള്ക്ക് ഒരു ബുദ്ധിമുട്ട് എങ്ങനെ അനുഭവപ്പെടുന്നു, അത് എപ്പോഴാണ് കൂടുന്നത്, എന്താണ് കുറയ്ക്കുന്നത്, ശരീരവും മനസ്സും അതിനോട് എങ്ങനെ പ്രതികരിക്കുന്നു ഇത്തരം സമഗ്രമായ കാര്യങ്ങളാണ് ഹോമിയോപ്പതി ശ്രദ്ധിക്കുന്നത്.
2. വ്യക്തിഗത ചികിത്സ
രോഗം ഒരു വ്യക്തിയില് എങ്ങനെ പ്രകടമാകുന്നു എന്നതിനാണ് ഹോമിയോപ്പതി മുന്ഗണന നല്കുന്നത്. അതുകൊണ്ടാണ് ഒരേ രോഗമുള്ളവര്ക്ക് ഒരേ മരുന്ന് നിര്ബന്ധമില്ലാത്തത്. രോഗിയോട് ഉറക്കം, ദാഹം, വിയര്പ്പ്, താപനിലയോടുള്ള പ്രതികരണം, ഭക്ഷണത്തോടുള്ള താല്പര്യം, മനസ്സിന്റെ അവസ്ഥ തുടങ്ങിയവ ചോദിച്ചറിയുന്നത് വെറുതെയല്ല; ഇവയെല്ലാം ആ വ്യക്തിയുടെ രോഗ ലക്ഷണങ്ങള് തിരിച്ചറിയാനുള്ള വഴികാട്ടികളാണ്.
3. സമൂഹക്ഷേമം
ആരോഗ്യം എന്നത് ഒരാളുടെ മാത്രം കാര്യമല്ല; അത് കുടുംബത്തിന്റെയും സമൂഹത്തിന്റെയും വിഷയമാണ്. വീടുകളിലെ ജീവിതശൈലി, കുട്ടികളുടെ ആരോഗ്യശീലങ്ങള്, ഉറക്കക്രമം, ഭക്ഷണരീതി എന്നിവയെല്ലാം സമൂഹത്തിന്റെ മൊത്തത്തിലുള്ള ആരോഗ്യത്തെ സ്വാധീനിക്കുന്നു. ഓരോ വീട്ടിലും തുടങ്ങുന്ന ആരോഗ്യബോധമാണ് യഥാര്ത്ഥ സമൂഹക്ഷേമം.
ശരീരത്തിന്റെ ചെറിയ മാറ്റങ്ങളെ അവഗണിക്കാതെ ശ്രദ്ധിക്കാന് ഹോമിയോപ്പതി പഠിപ്പിക്കുന്നു. ‘പിന്നീടൊരിക്കലാകാം’ എന്ന അശ്രദ്ധയ്ക്ക് പകരം, ശരീരത്തിന്റെ സൂചനകളെ ഗൗരവത്തോടെ കാണുന്ന ഒരു സമീപനം വളര്ത്താന് ഇത് സഹായിക്കുന്നു.
4. ലളിതമായ ചികിത്സ, ആഴത്തിലുള്ള ഫലം
ഹോമിയോപ്പതി എന്നാല് ചെറിയ ഗുളികകള് മാത്രമാണെന്ന ധാരണ തെറ്റാണ്. വ്യക്തിയെ മനസ്സിലാക്കി, കൃത്യമായ മരുന്ന് തിരഞ്ഞെടുത്ത്, ശ്രദ്ധയോടെയുള്ള തുടര്നിരീക്ഷണം നടത്തുന്ന ശാസ്ത്രീയ രീതിയാണിത്. ഈ വര്ഷത്തെ ഐ.എച്ച്.കെ പ്രമേയം അര്ത്ഥവത്താകുന്നത് അത് ഹോമിയോപ്പതിയെ മരുന്നുകളില് മാത്രം ഒതുക്കാതെ, വ്യക്തിനിഷ്ഠമായ പരിഗണനയുമായും സമൂഹക്ഷേമവുമായും ബന്ധിപ്പിക്കുന്നു എന്നതിനാലാണ്. രോഗം വന്ന ശേഷം തുടങ്ങുന്ന ഒന്നല്ല ചികിത്സ; മറിച്ച് ആരോഗ്യത്തെ മുന്കൂട്ടി ശ്രദ്ധിക്കുന്ന സംസ്കാരമാണ്. ഒരാളെ മുഴുവനായി കാണാനുള്ള ഈ ശ്രദ്ധയിലാണ് ഹോമിയോപ്പതിയുടെ യഥാര്ത്ഥ കരുത്ത് കുടികൊള്ളുന്നത്.
( ഇന്സ്റ്റിറ്റിയൂഷന് ഓഫ് ഹോമിയോപ്പത്സ് കേരളയുടെ ലൈഫ് മെമ്പറാണ് ലേഖിക)
ജന്മഭൂമി ഓണ്ലൈന്