തിരുവനന്തപുരം: വാശിയേറിയ പ്രചരണത്തിന് ശേഷം സംസ്ഥാനത്ത് വ്യാഴാഴ്ച നടന്ന വോട്ടെടുപ്പില് കനത്ത പോളിംഗ്.വേനല് ചൂടിലും വോട്ടര്മാര് ബൂത്തിലേക്കൊഴുകിയപ്പോള് പോളിംഗ് ശതമാനം 78.20 ആണ്.
അന്തിമ കണക്കുകള് വരുമ്പോള് പോളിംഗ് ശതമാനം ഇനിയും കൂടാന് സാധ്യത. 2021-ലേതിനേക്കള് കൂടുതലാണിത്. ചില ബൂത്തുകളില് വൈകിട്ട് ആറ് മണി കഴിഞ്ഞും വോട്ടര്മാരുടെ നീണ്ട നിരയുണ്ടായിരുന്നു.
നിലവില് ലഭ്യമായ കണക്കനുസരിച്ച് എറണാകുളത്താണ് കൂടുതല് പോളിംഗ്. എറണാകുളത്തും കോഴിക്കോടും പോളിംഗ് ശതമാനം 80 കടന്നു.പത്തനംതിട്ടയിലാണ് കുറവ് പോളിംഗ് (70.38).
ഇനി 25 നാള് മുന്നണികള്ക്ക് കൂട്ടലും കിഴിക്കലിന്റെയും ദിനങ്ങളാണ്. മേയ് നാലിനാണ് വോട്ടെണ്ണല്.
പലയിടത്തും കള്ളവോട്ട് ആരോപണങ്ങളുയര്ന്നു. ഇതിനെ തുടര്ന്ന് ചിലയിടങ്ങളില് സംഘര്ഷമുണ്ടായി. നാദാപുരം മണ്ഡലത്തിലെ വാണിമേല് എം.യു.പി. സ്കൂളില് മറ്റൊരാളുടെ വോട്ടര് ഐഡിയുമായി എത്തിയ പ്രായപൂര്ത്തിയാകാത്ത ആണ്കുട്ടിയെ കള്ളവോട്ട് ആരോപിച്ച് പിടികൂടി.
കാസര്കോട് തൃക്കരിപ്പൂര് മണ്ഡലത്തില് വോട്ടെടുപ്പിനിടെ യുഡിഎഫ് വനിതാ ബൂത്ത് ഏജന്റിന് നേരെ നായ്ക്കുരണപ്പൊടി പ്രയോഗം ഉണ്ടായതായി പരാതി ഉയര്ന്നു. ഉതിരനൂര് ഗവണ്മെന്റ് ഹയര് സെക്കണ്ടറി സ്കൂളിലെ ബൂത്തിലാണ് മുന് ബ്ലോക്ക് പഞ്ചായത്ത് അംഗം കൂടിയായ രതിലയ്ക്ക് നേരെ ആക്രമണമുണ്ടായത്. ശാരീരിക അസ്വസ്ഥതകള് ഉണ്ടായ ഇവരെ തൃക്കരിപ്പൂരിലെ സ്വകാര്യ ആശുപത്രിയില് പ്രവേശിപ്പിച്ചു.
