കാസർകോട്: നിയമസഭാ വോട്ടെടുപ്പിനിടെ ഉദുമയിൽ ഒളികാമറയുള്ള കണ്ണട ധരിച്ച് പോളിങ് ബൂത്തിലെത്തിയ യുഡിഎഫ് ചീഫ് ഏജന്റ് പിടിയിലായി. യുഡിഎഫ് സ്ഥാനാർഥി കെ നീലകണ്ഠന്റെ ചീഫ് ഏജന്റും അഭിഭാഷകനുമായ അഡ്വ. ബി എം ജമാലിനെയാണ് പോലീസ് കസ്റ്റഡിയിലെടുത്തത്. ബേക്കൽ ഇസ്ലാമിക് എഎൽപി സ്കൂളിലെ പോളിങ് ബൂത്തിൽ വെച്ച് വ്യാഴാഴ്ച രാവിലെയാണ് നാടകീയമായ സംഭവം നടന്നത്.
പോളിങ് പുരോഗമിക്കുന്നതിനിടെ ബി എം ജമാലിന്റെ കണ്ണടയിൽ സംശയം തോന്നിയ സിഐയുടെ നേതൃത്വത്തിലുള്ള പോലീസ് സംഘം ഇയാളെ പരിശോധിക്കുകയായിരുന്നു. വിശദമായ പരിശോധനയിൽ കണ്ണടയിൽ ഒളികാമറ ഘടിപ്പിച്ചതായി കണ്ടെത്തി. ഇത് തെരഞ്ഞെടുപ്പ് ചട്ടങ്ങളുടെ ഗുരുതരമായ ലംഘനമാണെന്ന് ചൂണ്ടിക്കാട്ടിയ പോലീസ് ഉടൻ തന്നെ കണ്ണട പിടിച്ചെടുത്തു. ഇയാളുടെ കസ്റ്റടിയിലെടുത്തതായി പോലീസ് അറിയിച്ചു. സംഭവത്തെ തുടർന്ന് ബൂത്തിൽ നേരിയ തോതിൽ സംഘർഷാവസ്ഥ നിലനിന്നെങ്കിലും പോലീസ് ഇടപെട്ട് സ്ഥിതിഗതികൾ ശാന്തമാക്കി.
