തിരുവനന്തപുരം: രാജ്യത്തിന്റെ യഥാര്ത്ഥ വികസനം സാധ്യമാകണമെങ്കില് സമൂഹത്തിലെ ഏറ്റവും പിന്നാക്ക വിഭാഗങ്ങളുടെ ഉന്നമനം ഉറപ്പാക്കേണ്ടതുണ്ടെന്ന് ഗവര്ണര് രാജേന്ദ്ര വിശ്വനാഥ ആര്ലേക്കര് .. അവസാന വ്യക്തിയുടെ ഉയര്ച്ചയിലൂടെയാണ് രാജ്യത്തിന്റെ പുരോഗതി സാധ്യമാകുന്നതെന്നും ദീന്ദയാല് ഉപാധ്യായ അവതരിപ്പിച്ച ‘അന്ത്യോദയ’ ദര്ശനമാണ് ഇതിന് മാര്ഗദര്ശകമെന്നും ഡീനോട്ടിഫൈഡ് നാടോടി ഗോത്രങ്ങളുടെ സംസ്ഥാനതല യോഗത്തില് അദ്ദേഹം വ്യക്തമാക്കി.
നാടോടി ഗോത്രങ്ങളെ ഇനി അവഗണിക്കാനാവില്ലെന്നും, അവരുടെ പ്രശ്നങ്ങള്ക്ക് പരിഹാരം കാണാന് കൂട്ടായ സമീപനം അനിവാര്യമാണെന്നും ഗവര്ണര് പറഞ്ഞു. ഓള് ഇന്ത്യ ഡീനോട്ടിഫൈഡ് നോമാഡിക് ട്രൈബ്സ് ഡെവലപ്മെന്റ് കൗണ്സില് സംഘടിപ്പിച്ച യോഗം ഇത്തരം സമൂഹങ്ങളെ ഒരുമിപ്പിച്ച് അവരുടെ പ്രശ്നങ്ങള് ചര്ച്ച ചെയ്യാനുള്ള പ്രധാന വേദിയാണെന്നും അദ്ദേഹം കൂട്ടിച്ചേര്ത്തു.
കൊളോണിയല് കാലഘട്ടത്തില് ജാതി, ഗോത്രം, മതം എന്നീ അടിസ്ഥാനങ്ങളില് സമൂഹത്തെ വിഭജിച്ചതാണ് ദേശീയ ഐക്യത്തെ ദുര്ബലമാക്കിയതെന്ന് അദ്ദേഹം ചൂണ്ടിക്കാട്ടി. മറ്റുള്ളവരെ കുറ്റപ്പെടുത്തുന്നതിനുപകരം ആത്മപരിശോധനയാണ് ആവശ്യമായതെന്നും, ”സമൂഹം വിഭജിക്കപ്പെട്ടപ്പോള് അത് ദുര്ബലമായി” എന്നത് ചരിത്രം പഠിപ്പിക്കുന്ന പാഠമാണെന്നും ഗവര്ണര് പറഞ്ഞു. ഇത്തരം വിഭജനങ്ങള് കൂട്ടായ ശക്തിയെ ക്ഷയിപ്പിച്ചതായും അദ്ദേഹം കൂട്ടിച്ചേര്ത്തു.
സ്വാതന്ത്ര്യാനന്തര കാലത്തും ഈ വിഭജനങ്ങളെ പൂര്ണമായി പരിഹരിക്കാന് കഴിഞ്ഞില്ലെന്ന് ഗവര്ണര് വ്യക്തമാക്കി. എന്നാല് ഇന്ന് സമൂഹ പ്രശ്നങ്ങളെക്കുറിച്ചുള്ള ബോധവല്ക്കരണം വര്ധിച്ചിട്ടുണ്ടെന്നും, ഭൂതകാല പാഠങ്ങളില്നിന്ന് പഠിച്ച് ഐക്യത്തിലേക്കുള്ള ശ്രമങ്ങള് ശക്തിപ്പെടുകയാണെന്നും അദ്ദേഹം പറഞ്ഞു.
രാജ്യത്തുടനീളം നടത്തിയ പഠനത്തില് 256-ല് അധികം ഗോത്രങ്ങള് പട്ടികജാതി, പട്ടികവര്ഗ്ഗം, ഒബിസി വിഭാഗങ്ങളില് ഒന്നിലും ഉള്പ്പെടാത്തതിനാല് ദീര്ഘകാലമായി അവകാശങ്ങളില്നിന്ന് വഞ്ചിക്കപ്പെട്ടതായി കണ്ടെത്തിയതായും അദ്ദേഹം വ്യക്തമാക്കി.
സമൂഹത്തിലെ ഏറ്റവും പിന്നാക്ക വിഭാഗങ്ങളുടെ ഉയര്ച്ച ഉറപ്പാക്കുമ്പോഴാണ് രാജ്യത്തിന്റെ സമഗ്ര പുരോഗതി സാധ്യമാകുകയെന്ന് ആവര്ത്തിച്ച ഗവര്ണര്, അതിന് കൂട്ടായ പ്രവര്ത്തനമാണ് അനിവാര്യമെന്നും ആഹ്വാനം ചെയ്തു.
